1 CESALONAIKA 1

1Oqo na i vola mai vei iratou ko Paula, Sailasa kei Timoci—Ki na nodra i soqosoqo lewe ni lotu mai Cesalonaika, ko ira era sa nona na Kalou ko Tamada kei na Turaga ko Jisu Karisito. Me nomuni mada ga na loloma kei na vakacegu. 2Keitou sa dau vakavinavinaka tiko ga vua na Kalou e na vukumuni kece ga, ka dau nanumi kemuni e na neitou masu. 3E sega ni mudu na neitou vakananuma e na mata ni noda Kalou ko Tamada na nomuni vakavatukanataka na nomuni vakabauta, na nomuni cakacaka vagumatua e na vuku ni nomuni loloma, kei na tu dei ni nomuni vakanuinui vua na noda Turaga ko Jisu Karisito. 4Kemuni na wekai keitou, keitou sa kila ni sa lomani kemuni na Kalou ka sa digitaki kemuni ko koya mo ni nona dina sara. 5Ni keitou a sega ni kauta yani vei kemuni na i Tukutuku Vinaka e na vosa wale ga, ia e na kaukauwa ga kei na Yalo Tabu, kei na neitou sa vakadinadinataka e na vu ni yalo i keitou ni sa i tukutuku dina. Ko ni kila vinaka tiko na i vakarau ni neitou bula e na gauna keitou a sa tiko vata kina kei kemuni. Keitou a cakava vaka koya mo ni kila vinaka cake kina. 6Ko ni a mani vakadamurimuri keitou ka vakadamurimuria vaka tale ga kina na Turaga. Ka dina ga ni ko ni a vakararawataki vakalevu kina, ia ko ni sa vakabauta na i tukutuku e na reki sa vu mai vua na Yalo Tabu. 7Ko ni sa yaco kina mo ni vakaraitaki vei ira kece ga na tamata vakabauta mai Masitonia kei Akaia. 8Ka ni sega wale ga ni ko ni vakavuna me rogo na i tukutuku ni Turaga mai Masitonia taucoko kei Akaia, ia e a tete tale ga na i rogorogo ni nomuni vakabauta na Kalou ki na veiyasana kece ga, ka sa sega tale na ka me keitou kaya kina. 9Era sa dau veivosakitaka ko ira kece na tamata e kea na nomuni ciqomi keitou e na gauna keitou a sikovi kemuni kina, kei na nomuni a saumaki mai na veimatakau ki vua na Kalou, mo ni qarava kina na Kalou bula ka dina; 10ka mo ni waraka na Luvena me lako mai lomalagi, o koya ka a vakatura mai na mate, oya ko Jisu; o koya sa vakabulai keda mai na cudru ni Kalou e sa bera tiko mai.

will be added

X\