1 PITA 5

1Au sa vakauqeti ira gona kina na qase e na kemuni maliwa me vaka ni'u bau dua tale ga na qase ko i au, ka'u bau dua tale ga ka vakadinadinataka na veika rarawa e a sota kaya na Karisito, ka'u na vaka i votavota tale ga vaka kina e na veika lagilagi e na vakaraitaki mai e na gauna mai muri: 2ni vakatawa na qele ni sipi ni Kalou era sa tiko e na kemuni maliwa; me kakua ni ka ni veivakasaurarataki, ia me caka ga e na yalo makutu; me kakua ni ka ni vaqara i sau ga, ia e na yalo ga e taleitaka me veiqaravi. 3Mo ni kakua ni viavia turaga vei ira ko ni qaravi ira tiko, ia mo ni vakarau ga vei ira na qele ni sipi. 4Ia ni sa na rairai mai na i Vakatawa Levu, e na qai vakaisalataki na ulumuni e na salusalu totoka ka sega ni dau malai rawa. 5Me vaka tale ga kina vei kemuni na cauravou; ni dau yalo malumalumu vei ira era qase cake vei kemuni. Ia vei kemuni kece, ni vakaisulutaki kemuni e na yalo malumalumu, mo ni veiqaraqaravi kina, ni sa volai, “Sa vorati ira na viavialevu na Kalou, ia sa lomani ira na yalo malumalumu” 6Mo ni vakayalomalumalumutaki kemuni gona kina e na ruku ni liga kaukauwa ni Kalou, ka me rawa ni vakacerecerei kemuni kina e na gauna sa lokuci. 7Mo ni tauca vua na nomuni lomaocaoca kece ga, ni sa dau nanumi kemuni ko koya. 8Mo ni yalo matua, ka yadra tiko! Sa veilakoyaki voli na nomuni meca, na tevoro, me vaka e dua na laione sa tagi ni sa vakasaqara e so me tiloma. 9Mo ni vorati koya, ka tu dei tiko ga e na nomuni vakabauta ni ko ni sa kila ni sa yaco tale tiko ga na veivakararawataki vaka oqo vei ira na wekamuni ka ra veituyaki tu e vuravura. 10Ia ni sa dede vakalailai na nomuni vakararawataki e na qai vakavinakataki kemuni sara, vakataudeitaki kemuni, ka vakaukauwataki kemuni na Kalou sa sinai e na loloma, ko koya sa kacivi kemuni ki na nona i serau tawa mudu e na vuku i Karisito. 11Me nona mada ga na lewa ka tawa mudu! Emeni. 12Au sa vola tiko yani na i vola lekaleka oqo e na veivuke i Silivenusi, o koya ka'u sa okata me noda i tokani yalo dina. Au gadreva me'u vakayaloqaqataki kemuni ka'u sa vakadinadinataka ni sa i koya oqo na loloma dina ni Kalou. Ni tu dei tiko kina. 13Era sa loloma tu yani vei kemuni na i soqosoqo lewe ni lotu e Papiloni, ko ira era sa digitaki tale ga mai vua na Kalou me vakataki kemuni; ka vaka tale ga kina na luvequ ko Marika. 14Ni veikidavaki vaka i kemuni e na veireguci ni veilomani va-Karisito. Me tiko mada ga na vakacegu vei kemuni kece ko ni sa nei Karisito! Emeni.

will be added

X\