1 PITA 4

1Me vaka ga ni a vakararawataki na Karisito e na yagona e na vukuda, ni vakaiyaragitaki kemuni e na vakasama vata ka a tiko vua; ka ni ko koya yadua sa vakararawataki e na yagona sa na mudu na nona i valavala ca tiko. 2Me tekivu oqo e dodonu me liutaki kemuni na lewa ni Kalou e na vo kece ga ni gauna ko ni sa bula tiko kina, ka me kua tale ni lewai kemuni na veigagadre vakayago. 3Me sa tei rauta mada na veigauna sa sivi yani ko ni a dau vakayacora kina na veika era dau cakava na tawa lotu. Ko ni a dau vakayacora voli kina na veivakarau vakasisila; na garogaro ca, na mateni, na marau vakavuravura, na dau gunu yaqona sivia, kei na i vakarau ni qaravi kalou tani, na ka a sega ni vakatarai vei kemuni. 4Era sa kurabui ni ko ni sa sega ni duavata e na gauna oqo e na veivakarau velavela sivia vaka koya, ka ra sa vosa vakacacataki kemuni kina. 5Ia era na qai la'ki vakamacalataki ira ga vua na Kalou, o koya sa vakarau tu me veilewaitaki ira na bula kei ira na mate. 6Oqo na vuna e a vunautaki kina na i Tukutuku Vinaka vei ira tale ga era sa mate oti; ni dina ga sa lewai me mate na yagodra me vaka na tamata kece ga, ia na yalodra e na bula me vaka sa bula na Kalou. 7Sa roro mai na i otioti ni veika kece ga. O koya gona mo ni qai yalo matua ka me yadra tiko na nomuni vakasama me rawa kina ni ko ni masu. 8Ia me kena i lutua, me kakua ni luluqa na nomuni veilomalomani vaka i kemuni, ka ni sa dau ubia na i valavala ca e vuqa na loloma. 9Ni dui dolava na nomuni katuba ni vale vei ira na wekamuni era veilakoyaki voli vakavulagi, ia me kua ni caka e na vosa kudrukudru. 10Me vaka ni sa solia vei kemuni na Kalou e yadua na i solisoli, ni vakayagataka mo ni veiqaraqaravi kina me vaka na dauniyau vinaka ni solisoli ni Kalou. 11Kevaka e dua e vunau, me vunautaka na vosa ni Kalou; kevaka e dua e veiqaravi, me veiqaravi e na kaukauwa sa solia vua na Kalou; me rawa kina ni vakalagilagi na Kalou e na veika kece ga e na vuku i Jisu Karisito; o koya sa nona na lagilagi kei na lewa ka tawa mudu! Emeni. 12O i kemuni na wekaqu lomani, ni kakua ni kurabui e na vuku ni rarawa levu sa yaco tiko vei kemuni mo ni vakatovolei kina, me vaka beka e se qai yaco tiko vei kemuni e dua na ka vou. 13Ia mo ni reki ga ni ko ni sa vakaivotavota e na veika rarawa e a sota kaya na Karisito, me rawa ni ko ni reki ka marau tale ga ni sa vakaraitaki mai na nona i serau. 14Kevaka ko ni sa vakasewasewani e na vuku ni yaca i Karisito, ko ni sa kalougata kina, ni sa mai tiko vei kemuni na Yalo lagilagi, na Yalo ni Kalou. 15Ia me kakua ga ni vakararawataki e dua vei kemuni me baleta ni laba, se butako, se cakacala se dau via lewa na nodra ka na tani. 16Ia kevaka e vakararawataki e dua ni sa nei Karisito me kakua ni madua kina, me vakalagilagia ga na Kalou e na vuku ni yaca koya. 17Ni sa yaco mai na gauna me tekivutaki kina na veilewai, ka ra na lewai e liu na tamata ni Kalou; ia kevaka sa tekivu vei keda, a cava e na kedra i tinitini ko ira era sega ni talairawarawa ki na i Tukutuku Vinaka ni Kalou? 18Me vaka sa kaya na i Vola Tabu, “Ia kevaka sa vovoleka mada ga ni ra sega ni vakabulai rawa na tamata yalo dodonu, era na tini ki vei ko ira ka ra sega ni via kila na Kalou, kei ira na i valavala ca?” 19O koya gona, me ra qai laivi ira kina vua na Dauveibuli yalo dina ko ira era sa vakararawataki me vaka na loma ni Kalou, ka me ra caka dodonu ga ka vakararavitaka na yalodra vua.

will be added

X\