1 PITA 3

1O i kemuni na yalewa vakawati, ni vakamalumalumutaka vaka kina na yalomuni vei ira na watimuni. Kevaka e so vei ira era sega ni vakabauta na vosa ni Kalou, e na rawa ni yaco me ra vakabauta e na vuku ni nomuni i vakarau ga na watidra, ka na sega ni yaga mo ni tauca e dua na vosa 2ni ra sa na raica tiko ga na nomuni i vakarau vakarokoroko ka savasava. 3Ni kakua ni sauni kemuni vakarairai wale ga e taudaku, e na tali drau ni ulu, se na vakaiukuuku koula, se na tokari i sulu vinaka. 4Ia me sauni ga na yalo sa tabogo e na i ukuuku talei sa tawa vuca rawa, koya na yalo malumalumu kei na yalo malua, ni sa ka talei sara oqo e na mata ni Kalou. 5Ni ra a dau sauni ira vaka tale ga kina e liu na yalewa lotu dina, ko ira era a dau vakanuinui vua na Kalou, ka ra dau yalo malumalumu vei ira na watidra. 6E a vaka koya ko Sera; ni a dau talairawarawa vei Eparaama ka vakatokai koya me nona turaga. Ia oqo ko ni sa luvena, kevaka ko ni sa caka dodonu ka sega ni dua na ka mo ni rerevaka. 7E vaka tale ga kina vei kemuni na tagane, ni dau nanuma na watimuni; ni dau dokai ira na yalewa me vaka ni ra sa ka malumalumu cake vei kemuni, me vaka ko ni na taukena vata na bula soli wale me kakua kina ni dua na ka e vakalatilati ki na nomudrau masu. 8Me'u tinia, e dodonu mo ni yalovata kece, ni veinanumi, ni veilomani me vaka na veitacini, ni yalo vinaka ka yalo malua. 9Ni kakua ni sauma na ca e na ca, se sauma na veivakasewasewani e na veivakasewasewani, ia mo ni sauma ga na ka e caka vei kemuni e na vosa veivakalougatataki ni ko ni kila ni a kacivi kemuni na Kalou mo ni na vakalougatataki. 10Ni sa kaya na i Vola Tabu, “Ko koya sa via marautaka na bula ka via raica na gauna vinaka, me tarova na yamena mai na ca, kei na tebe ni gusuna mai na vosataka na ka lasu. 11Me gole tani ko koya mai na ca, ka kitaka na ka vinaka; me vakasaqara na vakacegu e na yalona taucoko. 12Ni sa wanonovi ira na yalo dodonu na mata ni Turaga; ka sa vakarorogo tu na daligana ki na nodra masu; ia na matana sa saqati ira na i valavala ca.” 13Ko cei me na vakacacani kemuni kevaka ko ni sa gumatua tiko e na caka dodonu? 14Ia kevaka mada ga ko ni mani vakararawataki e na vuku ni valavala dodonu, ko ni sa kalougata kina. Ni kakua ni rerevaki ira, ka kakua tale ga ni kidroa. 15Mo ni vakarokorokotaki Karisito ga e yalomuni me nomuni Turaga. Mo ni dau vakarau tu e na veigauna kece ga mo ni vakamacalataka vua na tamata yadua e via kila na i nuinui sa tu vei kemuni. 16Ia mo ni kitaka e na yalo malumalumu kei na vakarokoroko; ka qarauna me savasava tiko na nomuni lewa e loma, me yaco kina, ni ko ni sa vakasewasewani, me ra madua ko ira era vosa vakacacataka na nomuni i vakarau vinaka e na nomuni sa tu vata kei Karisito. 17Ka ni sa vinaka cake, mo ni vakararawataki e na vuku ni caka dodonu, kevaka sa vaka kina na loma ni Kalou, ka ca ni ko ni sa caka cala. 18Ni a sa vakararawataki oti tale ga vakadua e na vuku ni valavala ca ko Karisito, ko koya na yalo dodonu, e na vukudra na dau caka cala, me kauti keda rawa kina vua na Kalou; ni a vakamatei vakayago ia sa vakabulai vakayalo. 19E na i tuvaki ni bula koya e a lako kina ko koya ka vunau vei ira na yalo era tu e na vale ni veivesu. 20Sa i ira koya na yalodra ka ra a sega ni talairawarawa vua na Kalou, e na nona a vosoti ira tu vakadede e na gauna e a taya tiko kina na waqa ko Noa. Era a mani lewe vica ga, koya era lewe walu wale ga, era a vakabulai mai na wai. 21Na wai koya, na i vakatakarakara ni papitaiso, na ka sa vakabulai kemuni edaidai, e sega ni savai laivi kina na duka mai na yago, ia e ka ga ni yalayala vua na Kalou mai na lewa e loma savasava. Sa vakabulai kemuni na papitaiso e na vuku ni tu cake tale mai na mate i Jisu Karisito, 22o koya ka sa lako cake ki lomalagi ka sa tiko e na liga i matau ni Kalou, o koya ka sa lewai ira kece ga na agilosi, kei ira sa kaukauwa vata kei ira sa dau lewa mai lomalagi.

will be added

X\