1 PITA 2

1O koya gona mo ni qai biuta laivi kina na loma ca kece ga kei na veivakaisini kei na vuvu kei na vosa veivakacacataki kece ga. 2Me vakataki ira na gone dramidrami ni dau gadreva na wai ni sucu vakayalo sa sega na kena ca, mo ni tubu cake kina mo ni vakabulai. 3Me vaka e kaya na i Vol Tabu, “Ko ni sa tovolea oti na yalo vinaka ni Turaga.” 4Ni lako mai vua na Turaga o koya na vatu bula, na vatu era a cata na tamata ia sa digitaki ka talei e na mata ni Kalou. 5Ia ni lako mai me vaka na veivatu bula, ka mo ni tara cake me vale ni soro vakayalo, mo ni veiqaravi kina me matabete yalo savasava, mo ni dau vakacabora na veimadrali vakayalo sa vinaka vua na Kalou e na vuku i Jisu Karisito. 6Ni sa kaya na i Vola Tabu, “Raica, au sa digitaka e dua na vatu talei, ka'u vakaduria me i vakadei e na tutu ni vale mai Saioni; ia ko koya sa vakabauti koya e na sega ni vakamaduataki” 7Sa talei na vatu oqo vei kemuni sa vakabauta, ia vei ira era sega ni vakabauta: “Na vatu sara ga ka ra a cata na matai ni vale, sa yaco me i vakadei ni tutu ni vale.” 8Ni sa kaya tale ga na i Vola Tabu, “Sa i koya oqo na Vatu era na vakatarabetaki kina na tamata; na vatu e na vakavuna me ra bale.” Ni ra sa tarabe e na vuku ni nodra cata ni vakabauta na vosa, me vaka e a sa nakita oti tu na Kalou me ra na cakava. 9Ia ko i kemuni na kawa tamata digitaki, a matabete vakatui, a matanitu yalo savasava, a nona umatamata vaka i koya na Kalou, ko ni sa digitaki mo ni tukuna na veicakacaka uasivi ni Kalou, o koya sa kacivi kemuni tani mai na butobuto ki na nona rarama e veivakurabuitaki. 10Ko ni a sega ni nona matatamata na Kalou e liu, ia oqo ko ni sa qai nona matatamata; ko ni a sega ni lomani e liu, ia oqo ko ni sa qai lomani. 11O i kemuni na wekaqu daulomani, au sa vakamasuti kemuni me vaka ni ko ni sa kai tani ka tu vakavulagi tu, ni tarovi kemuni mai na veigagadre ca kece ga ni yagomuni, ka ra sa dau veivala tiko kei na yalomuni. 12Me vinaka tiko ga na nomuni i vakarau e na kedra maliwa na tawa lotu, ke mani yaco me ra beitaki kemuni me vaka na tamata caka cala, me ra raica na nomuni cakacaka vinaka ka vakalagilagia na Kalou e na siga e na lesu tale mai kina. 13Ni dau vakarorogo ki na veiliutaki vakatamata kece ga e na vuku ni Turaga, se ki vua na tui me vaka sa cecere sara, 14se ki vei ira na kovana, me vaka era sa talai mai vua me ra vakaitotogitaki ira era sa caka cala, ka vakacaucautaki ira era sa caka dodonu. 15Ni sa loma ni Kalou mo ni vagaluya na nodra sesewa na tamata lialia e na nomuni i valavala vinaka. 16Ni bula tiko me vaka na tamata galala, ia me kakua ga ni vakayagataki na nomuni galala me i ubi ni nomuni caka ca; ia mo ni bula tiko ga me vaka na tamata bobula ni Kalou. 17Doka na tamata kece ga. Lomani ira era sa nei Karisito. Rerevaka na Kalou. Vakarokorokotaka na tui. A i Vakaraitaki ni Rarawa ka a Colata na Karisito 18O i kemuni na dauveiqaravi, ni dau vakarorogo vei ira na nomuni turaga e na yalo e veidokai; me kua ni caka wale ga vei ira na yalo vinaka ka yalo malua, vei ira tale ga na tamata i tovo kaukauwa. 19Ni sa ka me vakavinavinakataki, kevaka sa vosota rawa e dua na tamata na veika rarawa e caka vakatawadodonu vua ni sa kila tiko na loma ni Kalou. 20Se ko ni na vakavinavinakataki li vaka evei kevaka ko ni sa vosota ni ko ni sa vaculaki e na vuku ni nomuni cala? Ia kevaka ko ni sa vosota na vakararawataki ni ko ni sa caka dodonu, e na vakalougatataki kemuni kina na Kalou. 21Ni sa ka oqo sa kacivi kemuni kina na Kalou baleta ni a vakararawataki tale ga na Karisito e na vukumuni, ka sa laiva tu vei kemuni na kena i vakaraitaki, mo ni muria na we ni yavana. 22E a sega ni cakava e dua na i valavala ca ko koya, e a sega tale ga ni kune e gusuna na veivakaisini. 23Ni a vakasewasewani ko koya, e a sega ni veivakasewasewani lesu tale; ni a vakararawataki, e a sega ni yalataka me na sauma; ia e a laivi koya ga vei koya sa dau lewa vakadodonu. 24E a colata vaka i koya ko Karisito na noda i valavala ca e na yagona e na kau me rawa kina me da mate ki na i valavala ca ka bula ki na i valavala dodonu. Na we ni kena kuita ko ni sa vakabulai kina. 25Ko ni a vakataki ira tu na sipi lako sese, ia oqo ko ni sa qai saumaki tale vua sa dau vakatawa ka dau maroroya na yalomuni.

will be added

X\