1 PITA 1

1Oqo na i vola i Pita, e dua na i apositolo i Jisu Karisito. Ki vei ira na tamata digitaki ni Kalou era tiko vakavulagi ka ra sa dui veiseyaki tu mai Ponito, Kalatia, Kapatosia, Esia kei Picinia. 2Ko ni a sa digitaki ka lesi oti tu mai vua na Kalou ko Tamada ka vakatabui e na Yalo Tabu mo ni talairawarawa vei Jisu Karisito ka mo ni vakasavasavataki e na nona dra. Me vakalevutaki mada ga vei kemuni na loloma kei na vakacegu! 3Me da ia na vakavinavinaka vua na Kalou na Tama ni noda Turaga ko Jisu Karisito! Sa vakasucumi keda vou ko koya e na vuku ni nona loloma levu, me noda kina na i nuinui bula, e na nona vakaturi Jisu Karisito cake tale mai na mate; 4ka me noda tale ga na i votavota sa sega ni rusa rawa, sa sega ni dukadukali ka sega ni malai rawa, sa maroroi tiko mai lomalagi e na vukumuni. 5Sa i kemuni ko ni sa taqomaki tiko e na kaukauwa ni Kalou e na vuku ni vakabauta, me na nomuni kina na veivakabulai sa vakarau tu me vakatakilai e na i otioti ni gauna. 6Mo ni reki tiko e na ka oqo, e dina ga ni ko ni sa kune rarawa tiko mada e na dua na gauna lekaleka oqo, e na vuku ni veimataqali veivakatovolei e vuqa sa yaco tiko vei kemuni. 7Sa kena i naki me na kune kina na dina ni nomuni vakabauta ka mo ni na vakacaucautaki, vakalagilagi ka dokai kina e na gauna e na rairai mai kina ko Jisu Karisito. Ni sa talei vakalevu cake na nomuni vakabauta mai na koula sa caca rawarawa, e dina ga ni dau vakatovolei e na bukawaqa. 8Ko ni se sega ni raici Jisu Karisito, ia ko ni sa lomani koya tiko. E dina ga ko ni sa sega ni kunei koya e na gauna oqo, ia ko ni sa vakabauti koya tiko, ka reki tiko e na reki sa lagilagi ka tawa vakamacalataki rawa; 9ni sa nomuni na i tinitini ni nomuni vakabauta, koya na vakabulai ni yalomuni. 10Era a vakasaqara ka vakatarotaroga matua na veivakabulai oqo ko ira na parofita. Era a parofisaitaka na loloma ni Kalou ka na mai nomuni. 11Era a vakatarotaroga tiko se na yaco e na gauna cava ka na yaco vaka cava na veivakabulai oqo. Sa i koya oqo na gauna e a dusia tiko na Yalo i Karisito sa tiko e lomadra ka sa tukuna rawa tiko kina na veika rarawa e a sota kaya na Karisito kei na lagilagi e na tarava mai. 12E a vakatakila vei ira na Kalou ni ra a sega ni cakacaka tiko e na vukudra ga, ia e na vukumuni ga, koya e na veika era sa qai tukuna oqo vei kemuni, ko ira era vunautaka vei kemuni na i Tukutuku Vinaka e na Yalo Tabu ka a talai mai lomalagi. A veika oqo era a bau gadreva tale tu ga na agilosi me ra kila. 13O koya me qai yadra tiko kina na nomuni vakasama, ka mo ni yalomatua ka vakanuinui vakatabakidua ki na loloma e na nomuni e na gauna e na rairai mai kina ko Jisu Karisito. 14Ni talairawarawa vua na Kalou, ni kakua ni soli kemuni mo ni muria na veigagadre ca ka a dau tu vei kemuni e liu e na gauna ko ni sa lecaika tu kina. 15Ia me vaka sa yalo savasava ko koya ka a kacivi kemuni, mo ni yalo savasava vaka tale ga kina e na nomuni i valavala kece ga; 16ni sa kaya na i Vola Tabu, “Mo ni yalo savasava, ni'u sa yalo savasava ko i au .” 17Ia kevaka ko ni sa masuti koya me vaka sa Tamamuni ko koya sa dau lewa vakadodonu na cakacaka ni tamata yadua, ka sega ni dau veitotaki, ni vakaitovotaki kemuni e na vakarokoroko vua na Kalou e na gauna taucoko ni nomuni bula e vuravura. 18Ko ni sa kila na ka ko ni a voli laivi tani mai kina mai na i vakarau ni bula tawa yaga ka a dewa sobu mai vei ira na nomuni qase. Ko ni a sega ni voli e na veika caca wale me vaka na siliva se koula, 19ia e na dra talei ga i Karisito, me vaka na dra ni dua na lami e sega na kena ca se duka. 20E a sa lesi oti tu ko koya ni sa bera ni buli na vuravura, ia sa qai vakatakilai ga mai e na i otioti ni gauna oqo e na vukumuni. 21Sa i koya na Karisito sa yaco kina mo ni vakadinata na Kalou, na Kalou ka a vakaturi koya cake mai na mate ka solia vua na lagilagi; ka me sa i koya ga na Kalou ko ni sa vakabauta ka vakanuinui kina. 22Ia oqo ni ko ni sa vakasavasavataka na yalomuni e na nomuni talairawarawa ki na ka dina e na kaukauwa ni Yalo Tabu, ka sa lomani ira na wekamuni vakabauta, ni veilomani dina sara e na vu ni yalomuni taucoko. 23Ko ni sa vakasucumi vou oti, e na sore ni kau sa sega ni luca rawa, koya ga na vosa ni Kalou sa bula ka tu dei. 24Ni sa kaya na i Vola Tabu, “Sa vaka na co na tamata kece ga, ka sa vaka na se ni co na nodra lagilagi kece ga. Sa dau malai na co, ka sa mira na sena, 25ia na vosa ni Turaga sa tu dei ga ka tawa mudu” Ia na vosa koya, na i Tukutuku Vinaka sa vunautaki vei kemuni.

will be added

X\