1 JONI 5

1O koya yadua sa vakabauta ni sa Karisito ko Jisu sa luve ni Kalou, ia ko koya yadua sa lomana e dua na tama, sa lomana tale ga na luvena. 2Eda sa kila e na ka oqo ni da sa lomani ira na luve ni Kalou: koya ni da sa lomana na Kalou ka muria na nona i vakaro. 3Ni sa i koya oqo na lomana na Kalou: me da muria na nona i vakaro; a sa sega ni colacola bibi na nona i vakaro. 4Sa rawai vuravura ko ira yadua sa luve ni Kalou; ia sa i koya oqo na qaqa eda sa rawai vuravura kina: a noda vakabauta. 5Ko cei beka sa rawai vuravura? Ko koya ga sa vakabauta ni sa Luve ni Kalou ko Jisu. 6Sa i koya oqo ka a lako mai e na wai kei na dra: ko Jisu Karisito; e sega ni wai wale ga, ia e na wai kei na dra tale ga, ka sa kena i vakadinadina na Yalo Tabu, ni sa vu ni dina na Yalo Tabu. 7E ratou lewe tolu na i vakadinadina, 8na Yalo Tabu, na wai kei na dra; ka sa duavata na nodratou i tukutuku ko iratou oqo. 9Kevaka eda sa vakabauta na nodra i vakadinadina na tamata, sa uasivi cake na i vakadinadina ni Kalou; ni sa i koya oqo na i vakadinadina ni Kalou sa vakadinadinataka kina na Luvena. 10Ko koya sa vakabauta na Luve ni Kalou sa tiko e lomana na i vakadinadina. Ko koya e sega ni vakadinata na Kalou sa vakalasui koya ga, ka ni sa sega ni vakadinata na i vakadinadina ni Kalou me baleta na Luvena. 11Ia sa i koya oqo na i vakadinadina: sa solia vei keda na Kalou na bula tawa mudu, ka sa tiko na bula oqo vua na Luvena. 12Ko koya sa tu vua na Luvena, sa tu vua na bula; ko koya sa sega ni tu vua na Luve ni Kalou, sa sega ni tu vua na bula. 13Au vola yani na veika oqo vei kemuni ko ni sa vakabauta na yaca ni Luve ni Kalou, mo ni kila kina ni sa nomuni na bula tawa mudu. 14Ka sa i koya oqo eda sa nuidei kina e na mata ni Kalou: koya ni da kila ni na rogoci keda ko koya kevaka eda kerea e dua na ka me vaka na lomana. 15Ia kevaka eda kila ni sa dau rogoci keda ko koya e na veika kece ga eda kerea, eda sa kila tale ga kina ni na solia vei keda na veika eda kerea vua. 16Kevaka e dua na tamata e raica na wekana ni cala e na dua na i valavala ca e sega ni yaco kina na mate, sa dodonu me masulaka, ka na qai solia vua na bula na Kalou. Oqo e na vukudra e sega ni yaco ki na mate na nodra i valavala ca. Ia sa tu na i valavala ca sa yaco kina na mate. Au sega ni kaya me musulaki koya. 17Sa i valavala ca na i valavala tawa dodonu kece ga, ia sa tu na i valavala ca sa sega ni yaco kina na mate. 18Eda kila ni sa sega ni dau ia tiko ga na i valavala ca ko koya sa luve ni Kalou, ni sa maroroi koya na Luve ni Kalou, ka sa sega ni tarai koya na Vunica. 19Eda kila ni da sa nona na Kalou, veitalia ga ni sa tu na vuravura taucoko e na kaukauwa ni Vunica. 20Eda kila ni sa lako mai na Luve ni Kalou ka sa solia vei keda na kila ka vakayalo me da kila rawa kina na Kalou dina. Sa tu na noda bula vua na Kalou dina, vua na Luvena ko Jisu Karisito. Sa i koya oqo na Kalou dina kei na bula tawa mudu. 21Kemuni na luvequ lomani, ni taqomaki kemuni mai na veikalou lasu!

will be added

X\