1 JONI 4

1O i kemuni na wekaqu lomani, ni kakua ni vakadinati ira kece ga era kaya ni sa tiko vei ira na Yalo Tabu, ia ni vakatovolei ira ga me laurai kina se sa mai vua na Kalou na yalo ka tiko vei ira se sega; ka ni ra sa lako yani ki vuravura e lewe vuqa na parofita lasu. 2Ko ni na kila na Yalo ni Kalou e na ka oqo: a tamata kece ga sa vakatusa ni sa liatamata ko Jisu Karisito sa tiko vua na Yalo sa lako mai vua na Kalou. 3Ia na tamata kece ga e sega ni vakatusai Jisu vaka koya sa sega ni tiko vua na Yalo ni Kalou. Sa i koya oqo na yalo ni meca i Karisito, o koya ko ni a rogoca ni na lako mai, ka sa tiko sara ga e vuravura e na gauna oqo. 4Ia ko i kemuni na luvequ lomani, ko ni sa nona na Kalou, ka ko ni sa rawai ira oti na parofita lasu, ni sa kaukauwa cake na Yalo sa tiko vei kemuni ka malumalumu na yalo sa tiko e vuravura. 5Era sa nei vuravura; o koya gona era sa dau vosa kina vakavuravura, ka sa vakarogoci ira ko Ira na kai vuravura. 6Eda sa nona na Kalou ko i keda. O koya yadua sa kila na Kalou sa vakarogoci keda, ka sa sega ni vakarogoci keda ko koya sa sega ni nona na Kalou. Eda sa kila e na ka oqo na Yalo ni dina kei na yalo dauveivakacalai. 7O i kemuni na wekaqu lomani, me da veilomani, ni sa mai vua na Kalou na loloma. Sa luve ni Kalou ka sa kila na Kalou ko koya sa dau loloma. 8O koya sa sega ni dau loloma sa sega ni kila na Kalou: ni sa loloma na Kalou. 9Sa vakaraitaki vei keda na loloma ni Kalou e na nona a tala mai ki vuravura na Luvena e dua bauga ka a vakatubura me rawa ni da bula e na vukuna. 10Sa i koya oqo na loloma: a sega ni baleta ni da a lomana na Kalou, ia ni a lomani keda ga ko koya, ka a tala mai kina na Luvena me i bulu ni nodu i valavala ca. 11O i kemuni na wekaqu lomani, kevaka sa lomani keda vaka oqo na Kalou, sa dodonu sara tale ga me da veilomani. 12E sega ni sa bau dua na tamata e sa raica na Kalou; ia kevaka eda sa veilomani, sa bula tiko e lomada na Kalou, ka sa taucoko vinaka kina e na noda bula na noda loloma ki vua. 13Sa solia vei keda na Yalo Tabu na Kalou. Ka sa i koya oqo na ka eda sa kila kina ni da sa tiko vua na Kalou ka sa tiko vei keda ko koya. 14Keitou sa raica oti tale ga ka tu tukuna vei ira na tamata ni a tala mai na Luvena ko Tamada me i vakabula kei vuravura. 15O koya yadua sa vakatusa ni sa Luve ni Kalou ko Jisu, sa tiko vei koya na Kalou ka sa tiko ko koya vua na Kalou. 16Eda sa kila ka vakadinata na loloma sa lomani keda kina na Kalou. Sa loloma na Kalou; ia ko koya sa tiko na loloma e na nona bula sa tiko vata kei na Kalou, ka sa tiko vua na Kalou. 17Sa i koya oqo sa vakataucokotaki kina vei keda na loloma: koya me da sa yalodei rawa e na Siga ni Lewa, me vaka ni sa tautauvata tiko kei na bula i Karisito na noda bula e na vuravura oqo. 18Sa sega na rere e na loloma, ia na loloma sa maucokona vinaka sa vakasava tani na rere. Ka ni sa yaco na yaluma e na rere, ia ko koya sa rere tiko e sa sega ni taucoko vinaka e na loloma. 19Eda sa dau loloma ni sa lomani keda taumada na Kalou. 20Ke dua e kaya, “Au sa lomana na Kalou” ka cata na wekana, sa tamata lasulasu ko koya. Kevaka e sega ni lomana na wekana sa raica e matana, e na lomana rawa vakacava na Kalou, ko koya ka sa sega ni raica? 21Ia sa solia mai vei keda na i vakaro oqo ko Karisito: ko koya sa lomana na Kalou, sa dodonu me lomana tale ga na wekana.

will be added

X\