1 JONI 3

1Ni bau raica mada na levu ni loloma sa lomani keda kina na Tamada, me da vakatokai kina me da luve ni Kalou; ka da sa vaka dina kina. Na vuna era sega ni kilai keda kina ko ira na lewe i vuravura koya ni ra sega ni kilai koya. 2O i kemuni na daulomani, eda sa luve ni Kalou tu oqo; ia e sa sega ga ni matata se da na vakaevei e muri. Na ka ga eda kila ni da na vakataki Karisito e na nona rairai mai, ka ni sa na raica na matana dina. 3Ia ko koya yadua sa vakanuinui tiko vei Karisito me vaka oqo, sa qarauni koya tiko me savasava me vaka sa savasava na Karisito. 4O koya yadua sa i valavala ca sa talaidredre ki na lawa ni Kalou, ni sa i valavala ca na talaidredre ki na lawa. 5Ko ni kila ni a rairai mai ko Karisito me kauta laivi na i valavala ca ni tamata; ko ni kila tale ga ni sega vua na i valavala ca. 6Ko koya sa tu dei tu vei Karisito, sa sega ni dau i valavala ea tiko ga; ia ko koya sa dau i valavala ca tiko ga, e sa sega ni raici koya se kilai koya. 7O i kemuni na luvequ lomani, me kakua ni vakacalai kemuni e dua na tamata. Ko koya sa caka dodonu sa tamata dodonu, me vaka sa dodonu ko Karisito. 8Sa mai vua na tevoro ko koya sa dau ia tiko ga na i valavala ca; ni sa i valavala ca mai na i vakatekivu na tevoro. Sa i koya ga na ka oqo sa rairai mai kina na Luve ni Kalou: me vaqeyavutaka na cakacaka ni tevoro. 9Ko koya sa vakasucumi koya na Kalou, sa sega ni valavala ca tiko ga, ni sa tiko vua na bula va-Kalou ka sa sega ni rawa ni ia tiko ga na i valavala ca, ni sa vakasucumi koya na Kalou. 10Sa vakatakilai e na ka oqo ko ira na luve ni Kalou kei ira na luve ni tevoro: ko koya yadua sa sega ni valavala dodonu tiko, ka sega ni lomana na wekana, sa sega ni luve ni Kalou. 11Sa i koya oqo na i tukutuku ko ni a rogoca mai na i vakatekivu: me da sa veilomani vaka i keda. 12Me da kakua ni vakataki Keni, na luve ni Vuniea, ka a labati tacina. A cava beka e a vakamatei tacina kina? E baleta ga ni cala na ka e a kitaka ka dodonu na ka e a kitaka ko tacina. 13Ni kakua ni kurabui, kemuni na wekaqu, kevaka era cati kemuni na lewe i vuravura. 14Eda sa kila ni da sa dewa oti mai na mate ki na bula, ni da sa lomani ira na wekada. Ko koya e sega ni lomana na wekana e sa tiko ga e na mate. 15Sa tamata daulaba ko koya yadua sa cata na wekana; ia ko ni kila ni sega ni dua na daulaba e tiko vua na bula tawa mudu. 16Ni sa solia na nona bula na Karisito e na vukuda eda sa kila rawa kina se cava na loloma. Sa dodonu vaka tale ga kina me da solia na noda bula e na vukudra na wekada. 17Ia kevaka e dua na tamata sa tu vua na i yau ni vuravura oqo ka sega ni lomana na wekana sa raica ni leqa tu, e kaya rawa vakacava ni tiko vua na loloma ni Kalou? 18O i kemuni na luvequ lomani me da sa kakua ni veilomani wale ga e na vosa se e na gusu, ia e na cakacaka ga kei na dina. 19Eda na kila gona e na ka oqo ni da sa dina tiko ka da na vakataudeitaka na yaloda e na mata ni Kalou 20e na gauna kece ga sa vakacalai keda kina na yaloda, ni sa cecere cake na Kalou mai na yaloda, ka sa kila na ka kece ga ko koya. 21Kemuni na wekaqu lomani, kevaka sa sega ni vakacalai keda na yaloda, sa qai rawa me da doudou e na mata ni Kalou. 22Eda sa rawata tiko mai vua na veika kece eda kerea, ni da sa muria tiko na nona i vakaro ka kitaka tiko na ka sa vinaka vua. 23Ia sa i koya oqo na nona i vakaro: me da sa vakabauta na yaca ni Luvena, ko Jisu Karisito, ka veilomani tiko me vaka ga e a vakarota vei keda ko Karisito. 24Ko ira kece era sa muria na i vakaro ni Kalou era sa tiko vua, ka sa tiko vei ira ko koya. Ia eda sa kila e na ka oqo ni sa tiko vata kei keda ko koya: oya e na Yalo Tabu sa solia vei keda ko koya.

will be added

X\