1 JONI 2

1O i kemuni na luvequ lomani, au vola yani na veika oqo vei kemuni mo ni kakua kina ni valavala ea; ia kevaka e mani valavala ea e dua na tamata sa tiko e dua na noda dauveimasulaki e na mata i Tamada, ko Jisu Karisito na yalododonu. 2Sa i bula ni noda i valavala ea ko koya, io, e sega ni noda wale ga, na nodra i valavala ca tale ga na tamata kece ga e vuravura. 3Kevaka eda sa muria tiko na i vakaro ni Kalou, eda sa vakadinadinataka kina e lomada ni da sa kilai koya. 4Kevaka e kaya e dua na tamata, “Au sa kilai koya” ka qai sega ni muria tiko na nona i vakaro, sa tamata lasulasu ko koya, ka sega vua na dina. 5Ia ko koya yadua sa muria na vosa ni Kalou sa taucoko vinaka na nona loloma vua na Kalou. Eda sa rawa ni vakadinadinataka e lomada e na ka oqo ni da sa tu vata kei na Kalou: 6ko koya e kaya ni sa tu vata kei na Kalou sa dodonu me bula tiko me vaka na i vakarau ni bula i Jisu Karisito. 7O i kemuni na wekaqu lomani, au sega ni vola tiko yani vei kemuni e dua na i vakaro vou, na i vakaro makawa ga ka a tu vei kemuni mai na i vakatekivu; na i vakaro makawa sa i koya na vosa ko ni a sa rogoca oti. 8Ia sa vou tale ga na i vakaro au sa vola yani oqo vei kemuni, ni sa kune na kena dina vei Karisito kei kemuni tale ga, ka ni sa takali tiko yani na butobuto, ka sa cila tu oqo na rarama dina. 9Ko koya e kaya ni sa tu e na rarama, ka sega ni lomana tiko na wekana, e sa tu ga e na butobuto ka yacova na siga oqo. 10Ko koya e lomana na wekana sa tiko e na rarama, ka sa sega vua na ka ni veivakatarabetaki. 11Ia ko koya sa cata na wekana sa tiko voli ga e na butobuto, ka sa lako voli e na butobuto, ka sa sega ni kila na vanua e lako tiko kina, ni sa vakamatabokotaki koya na butobuto. 12Au sa volavola yani vei kemuni na luvequ lomani ni sa bokoci na nomuni i valavala ca e na vuku ni yaca i Karisito. 13Au sa volavola yani vei kemuni na qase ni ko ni sa kilai koya sa bula mai na i vakatekivu. Au sa volavola yani vei kemuni na cauravou ni ko ni sa vakadruka na Vunica. 14Au sa volavola yani vei kemuni na gone ni ko ni sa kila na Tamada. Au sa volavola yani vei kemuni na qase ni ko ni sa kilai koya ka a bula mai na i vakatekivu. Au sa volavola yani vei kemuni na cauravou ni ko ni sa kaukauwa tiko, ka sa tiko ga vei kemuni na vosa ni Kalou, ka ni ko ni sa qaqa vua na Vunica. 15Ni kakua ni lomani vuravura se na veika vakavuravura. Kevaka sa lomani vuravura e dua na tamata sa sega vei koya na loloma vua na Tamada. 16Ka ni veika kece sa tu e vuravura: na gagadre ca ni yago, na gagadre ca ni mate, kei na yalo e dokadokataka na veika ni bula oqo, era sega ni tubu mai vei Tamada, mai vuravura ga. 17Ia sa takali tiko yani na vuravura kei na kena gagadre ca; ia ko koya ga sa vakayacora na loma ni Kalou sa tu dei ka tawa mudu. 18O i kemuni na luvequ lomani, sa i otioti ni gauna oqo! Ia me vaka ko ni a rogoca ni na lako mai na meca i Karisito, sa lewe vuqa vaka kina na meca i Karisito era sa tu oqo. Sa i koya oqo eda sa kila kina ni sa i otioti ni gauna oqo. 19Era a sega dina ga ni noda i tokani ko ira koya, koya na vuna era a lako tani kina vei keda. Kevaka era a noda i tokani ke ra a sa tiko dei vata toka ga kei keda. Ia era sa lako tani ga me vakatakilai kina ni ra a sega kece ga ni noda i tokani. 20Ia ko i kemuni ko ni a sa lumuti oti e na Yalo Tabu mai vei Karisito, ka ko ni sa kila kece tiko kina na dina. 21Au sega ni volavola tiko yani vei kemuni me baleta ni ko ni lecava na dina, ia e baleta ga ni ko ni sa kila tiko, ka kila tale ga ni sega na lasu e tubu mai na dina. 22Sa qai ko cei beka na tamata lasulasu? O koya ga e cakitaka ni sa Karisito ko Jisu. Sa i koya oqo na meca i Karisito: o koya sa cakitaka na Tamana kei na Luvena. 23E sega ni dua e cakitaka na Luvena me tiko vua na Tamana. Ia ko koya sa vakatusa na Luvena sa tiko tale ga vei koya na Tamana. 24Me dei tiko e lomamuni na veika ko ni a rogoca mai na i vakatekivu. Kevaka e dei tiko ga e lomamuni na veika ko ni a rogoca mai na i vakatekivu ko ni na tu dei tiko ga vua na Luvena kei na Tamana. 25Ka ni sa i koya oqo na ka e a yalataka vei keda ko Karisito: na bula tawa mudu. 26Au vola yani na veika oqo vei kemuni me baleti ira era via vakauti kemuni tiko vakatani. 27Ia me baleti kemuni, sa lumuti kemuni oti ko Karisito e na Yalona. Ia me vaka ga ni sa tiko vei kemuni na Yalona sa sega ni ganita me vakatavulici kemuni e dua tani tale. Ni sa vakatavulici kemuni na Yalo Tabu e na ka kece ga, ka sa dina na veika e vakatavulica ka sega ni lasu. Mo ni muria gona na i vakavuvuli ni Yalo Tabu, ka tu dei tiko vei Karisito. 28Ia oqo, kemuni na luvequ lomani, ni tu dei tiko ga vua; me rawa kina ni da yalodoudou ni sa yaco mai ko koya, ka sega ni da via vunitaki keda mai vua e na madua e na gauna e na lako mai kina. 29Kevaka ko ni kila ni sa dodonu ko Karisito sa dodonu tale ga mo ni kila ni sa luve ni Kalou ko koya sa caka dodonu.

will be added

X\