1 JONI 1

1Keitou volavola yani vei kemuni me baleta na Vosa ni Bula, o koya ka a sa bula tu mai na i vakatekivu. Keitou a rogoci koya ka keitou a raica e na mata i keitou, io, keitou a raiei koya dina ka a tarai koya na liga i keitou. 2A sa yaco me rairai mai na bula oqo, ka keitou a raica, ka dau tukuna, ka vakatakila vei kemuni na bula tawa mudu ka a tu vua na Tamana, ka sa qai vakaraitaki mai vei keitou. 3Keitou tukuna vei kemuni na veika keitou a raica ka rogoca me rawa ni ko ni duavata kina kei keitou e na veitokani keitou sa veitokani tiko kina kei na Tamana kei na Luvena ko Jisu Karisito. 4Keitou vola yani na veika oqo me da sa vakasinaiti vata sara kina e na reki. 5Sa i koya oqo na i tukutuku keitou a rogoca mai vua na Luvena, ka keitou sa tukuna yani oqo vei kemuni: sa rarama na Kalou, ka sa sega sara vua na butobuto. 6Kevaka eda kaya ni da sa veitokani tiko kei na Kalou ka vakarautaka tiko ga na i vakarau butobuto eda sa lasu sara ka sega ni kitaka tiko na dina. 7Ia kevaka eda sa vakaraitaka tiko na i vakarau rarama, me vaka sa tiko ko koya e na rarama, eda sa qai veitokani vata kaya, ka sa vakasavasavataki keda mai na ca kece ga na dra i Jisu Karisito na Luvena. 8Kevaka eda kaya ni sega na noda i valavala ca, eda sa vakaisini keda ga ka sega vei keda na dina. 9Kevaka eda vakatusa na noda i valavala ca, sa yalodina ka yalododonu ko koya me bokoca na i valavala ca, ka vakasavasavataki keda mai na noda caka cala kece ga. 10Kevaka eda kaya ni da sega ni valavala ca, eda sa vakalasuya na Kalou, ka sega ni tiko vei keda na nona vosa.

will be added

X\