1 KORINICA 9

1Au galala tu ka'u sega ni bobula ia au sa i apositolo. Au sega li ni raici Jisu na noda Turaga? E sega li ni ko i kemuni na vua ni cakacaka ni ligaqu e na vuku ni Turaga? 2Kevaka au sa sega ni apositolo vei ira na tani, sa i vakatakilakila ni noqu cakacaka vakaiapositolo na nomuni tu vata kei na Turaga. 3Au dau kaya vaka oqo vei ira era vakalewai au: 4E sega li ni tu vei keitou na dodonu me keitou kana ka gunu? 5E sega li ni tu vei keitou na dodonu me keitou kauta voli e yadua na wati keitou me vakataki ira na i apositolo tale e so, kei iratou na tacina na Turaga, vata kei Kifa? 6Se ko i keirau beka ga kei Panapasa e dodonu me keirau vaqara na ka me keirau bula kina? 7O cei na sotia sa bau lako ki na i valu ka saumi koya vaka i koya ga? O cei sa bau tea e dua na were ni vaini ka sega ni bau vakayagataka e so na vuana? Se ko cei sa bau vakania e dua na qele ni sipi ka sega ni vakayagataka e so na kena sucu? 8Au kaya li na ka oqo e na kaukauwa vakatamata? E sega li ni tukuni tale ga e na i vunau? 9Sa volai tu e na i vunau i Mosese, “Mo kakua ni vesuka na gusu ni bulumakau ni butu sila tiko.” E kauwaitaki ira ga li na bulumakau na Kalou? 10E sega beka li ni vosa sara tiko ga e na vukuda na Kalou? Sa volai sara ga e na vukuda, ni sa dodonu me siviyara na dausiviyara e na vakanuinui, ka butu sila na daubutu sila e na vakanuinui ni na dua na kena i votavota. 11Kevaka keitou a kaburaka na veika vakayalo vei kemuni sa na sivia beka kevaka keitou tamusuka na veika vakayago e so, mai vei kemuni? 12Kevaka era sa votai mai vei kemuni e so e na vuku ni nodra dodonu, e sega beka ni levu cake sara na dodonu e tu vei keitou. Ia keitou sa sega ni vakayagataka na dodonu ko ya; keitou sa vosota ga na ka kece ga me kakua kina ni keitou vakalatilati ki na i Tukutuku Vinaka kei Karisito. 13Ko ni sa sega beka ni kila ni ko ira era dau qarava na cakacaka tabu e na Valenisoro era rawata na kedra mai na Valenisoro, kei ira era dau qarava na i cabocabo ni soro era dau votai e na i soro e dau vakacabori kina. 14Sa vakarota vaka kina na Turaga vei ira sa kauta na i tukutuku vinaka me ra rawata na nodra bula mai na i tukutuku vinaka. 15Ia au sa sega ni via vakayagataka e dua vei ira na noqu dodonu oqori. Au sega tale ga ni vola yani na ka oqo me sa na qai caka kina vei au; e vinaka cake vei au me'u mate, ka ca me dua me kauta tani na ka au sakitaka. 16Kevaka au sa dau vunautaka na i tukutuku vinaka, oqori e sega ni ka me'u sakitaki au kina. Au sa vakacolati kina, ka sa noqu i tavi. Au sa na kalouca ke'u sega ni vunautaka na i tukutuku vinaka! 17Ia kevaka au sa cakava na ka oqo e na noqu lewa vaka i au ga, au sa na namaka me'u saumi kina. la kevaka e a sega ni lomaqu, sa i koya kina oqo e dua na i tavi au sa nuitaki kina. 18A cava e na qai kequ i sau? Sa i koya ga oqo: Me yaco na Kosipeli me kakua ni saumi e na noqu vanua; me'u kua kina ni vakayagataka ne noqu dodonu taucoko e na vuku ni Tukutuku Vinaka. 19Au sega ni bobula vua e dua na tamata, ia au sa qisi au me'u bobula ki na tamata kece ga me'u rawai ira kina e lewe vuqa. 20Ni'u tiko kei ira na Jiu au sa yaco me'u vaka e dua na Jiu me'u rawai ira kina na Jiu, ka'u sa yaco me vaka e dua sa vauci tu e na lawa i Mosese vei ira sa vauci tu e na lawa me'u rawai ira kina sa vauci tu e na lawa, ka dina ga niʼu sega ni vauci tu e na lawa. 21Au sa yaco me vaka e dua e tu e na daku ni lawa i Mosese vei ira sa tu e daku ni lawa ko ya, me'u rawai ira kina era tu e taudaku ni lawa. 22Au sa vaka e dua e malumalumu na nona vakabauta vei ira na malumalumu na nodra vakabauta me'u rawai ira kina. Au sa yaco me'u ka kece ga vei ira na tamata kece ga me'u vakabulai ira kina e so e na sala kece ga e rawa. 23Au sa cakava na ka kece ko ya e na vuku ni tukutuku vinaka me'u bau vakaivotavota kina e na kena kalougata. 24Ko ni sega li ni kila ni ra cici kece na daucici e na dua na veitau cici, ka qai dua wale ga e na taura na i covi? Ni cici vaka kina mo ni liu. 25Sa dau lewai koya vakavinaka sara na daucici yadua e na veika kece ga. Era cakava oqori me ra rawata kina e dua na i sala sa cori ka rawa ni ca, ia ko i keda me dua kina na kena e sega ni ca rawa. 26Au sega kena ni cici vakaveitalia wale ga; ka'u sega kina ni vacuvacu me vaka e dua sa vacuka wale ga na cagi. 27Ia au sa dau lewa vinaka na yagoqu de'u qai vuvunau tiko ga vei ira na tamata ka qai kunei ni'u sega ni rawata na i sala ko ya.

will be added

X\