1 KORINICA 7

1Ia e na vuku ni veika ko ni a vola mai vei au, e vinaka cake vua na tagane me kua ni vakawati. 2Ia e na vuku ni kena sa rui levu na veibutakoci sa dodonu me vakawati na tagane yadua ka vakawati na yalewa yadua. 3Sa dodonu me vakayacora na tagane vua na watina yalewa na nona i tavi e na bula vakaveiwatini, ka sa dodonu tale ga me vakayacora na yalewa vua na watina tagane na nona i tavi e na bula vakaveiwatini. 4Sa sega ni lewa ga vaka i koya na yagona na yalewa vakawati, sa lewai koya na watina. Sa vaka kina na tagane vakawati, sa sega ni lewa vaka i koya ga na yagona, sa lewai koya na watina yalewa. 5Ni kakua ni dui bureitaki kemuni vua na dui watimuni, vaka vo ga ke ko ni sa loma vata kina, e na dua na gauna, mo ni galala kina ka qarava na nomuni masu. Ni oti ko ya mo ni qai tiko vata tale de na veretaki kemuni ko Setani e na nomuni sa sega ni lewai kemuni rawa. 6Au tukuna na ka oqo vei kemuni me vaka e dua na ka e tara tu, ka sega ni ka e vakaroti. 7Au diva me ra kua ni vakawati vakataki au na tamata kece, ia sa tu vua na tamata yadua na dui nona i solisoli mai vua na Kalou, e dua me vaka oqo ka dua me vaka ko ya. 8Vei ira na sega ni vakawati kei na yada: au kaya ni vinaka cake vei ira me ra kakua ni vakawati me vakataki au. 9Ia kevaka era sega ni lewai ira rawa, me ra vakawati, ka ni vinaka cake me ra vakawati ka ca me ra daugagano. 10Ia au sa vakarota vei ira na vakawati, e sega ni noqu i vakaro, sa nona i vakaro na Turaga: Me kakua ni biuta na watina na yalewa sa vakawati, 11ia vua na watina, ka me kakua sara ni sereka na watina na tagane vakawati. 12Ia vei ira na kena vo au sa kaya, (sega ni kaya na Turaga): Ke dua na wekada sa sega ni lotu na watina yalewa, ka sa loma i watina me rau tiko vata tiko ga, me kakua ni sereki koya. 13Ia ke dua na yalewa e tawa lotu na watina koya. 14Ni sa vakasavasavataki na tagane tawa lotu e na vuku ni watina ka sa vakasavasavataki tale ga na yalewa tawa lotu e na vuku ni watina. Kevaka sa sega ni vaka kina, era sa gone tawa savasava na nomuni gone, ia oqo era sa vakabau. 15Ia kevaka sa via veibiu ko koya ka tawa lotu, laiva ga me lako, sa na sega ni vauci kina na tagane se na yalewa lotu kevaka e vaka ko ya. Ni sa kacivi kemuni na Kalou mo ni tiko vakacegu ga. 16Ko iko na yalewa vakawati, ko sega ni kila ko na vakabula na watimu se sega, kei iko na tagane vakawati ko sega ni kila ko na vakabula na watimu se sega. 17Me dui bula na tamata yadua me vaka na i solisoli sa solia vua na Turaga, me vaka sa kacivi koya kina na Kalou. Sa i koya oqo e dua na i vakaro au sa lewa me caka e na veisoqosoqo lotu kece. 18Ke dua e qai kacivi ni sa cilivi oti tu, me kakua ni via kauta tani na we ni nona cilivi, ia kevaka e dua e kacivi ni se bera ni cilivi me kakua ni saga me cilivi. 19Sa ka wale ga na cili se na tawa cili; na ka ga e bibi sa i koya me da muria na i vakaro ni Kalou. 20Me dei tiko ga na tamata yadua e na nona i tutu e na gauna e kacivi kina. 21Ko a dua tiko li na bobula e na gauna ko a kacivi kina? Kakua ga ni vuturi kina, ia kevaka sa rawa mo sereki, mo qai vakayagataka na nomu galala. 22O koya e a bobula ni a kacivi koya na Turaga, sa na qai nona tamata galala na Turaga. E vaka kina vei koya e a tamata galala tu ni kacivi koya na Turaga, sa na qai bobula i Karisito. 23Sa sauma oti na Kalou e dua na i sau levu e na vukumuni mo ni kakua kina ni nodra bobula na tamata. 24Kemuni na veiwekani, me tudei na tamata yadua vua na Kalou me vaka e na gauna a kacivi kina. 25Ia e na vukudra na sega ni vakawati: E sega ni tu vei au e dua na i vakaro mai vua na Turaga, ia au na tusanaka ga na noqu vakasama me vaka e dua sa yaga me vakadinati e na vuku ni loloma ni Turaga. 26E na vuku ni gauna dredre e da donuya, au nanuma ni vinaka cake vua e dua na tamata me tu ga e na i tutu sa tu kina. 27Sa dua li na watimu? Kakua ni via veisere. Ko sa sega beka ni vakawati? Ke sega, kakua ni via vakawati. 28Ia kevaka ko mani vakawati, ko sa sega ni cala kina; kevaka tale ga sa vakawati e dua na gone yalewa sa sega ni cala kina. Ia ko ira era vakawati era na sota kaya na leqaleqa ni bula vakavuravura, ka'u sa via maroroi kemuni mai kina. 29Kemuni na veiwekani, sa i koya oqo na ka au kaya, sa lekaleka sara na gauna. Me tekivu oqo; ko ira sa vakawati me ra vakataki ira sa sega ni vakawati, 30kei ira era tagi me ra vakataki ira era a sega ni tagi, kei ira era marau me ra vakataki ira era a sega ni marau, kei ira era a volivoli me ra vakataki ira sa sega ni taukena na ka era a volia; 31kei ira sa dau oca e na ka ni vuravura oqo me vaka era sa sega ni oga kina. Ni sa vakarau takali tiko yani na vuravura oqo. 32Au gadreva mo ni galala mai na lomaocaoca. Na tagane sega ni vakawati sa dauvakananuma tu ga na veika ni Turaga, se me vakayalovinakataka vakaevei vua na Turaga. 33Ia na tagane vakawati sa lomaocaocataka na veika vakavuravura se me na vakayalovinakataki koya vakaevei na watina, 34ka sa wase rua tu kina na lomana. Ko koya tale ga na yalewa sega ni vakawati se na gone yalewa sa dau vakananuma na veika ni Turaga, se me vakasavasavataka vakacava na yagona kei na yalona. I a na yalewa vakawati sa dauvakananuma ga na veika ni vuravura se me vakayalovinakataka vakacava na watina. 35Au tukuna tiko na ka oqo vei kemuni me yaga vei kemuni ia au vinakata ga mo ni cakava na ka dodonu, ka kilikili, ka me ka taucoko na nomuni soli kemuni ki na cakacaka ni Turaga. 36E na vukudrau e lewe rua e rau sa nakita me rau na vakamau; kevaka e nanuma na tagane ni sa tawa kilikili na nona i vukivuki vua na nona i tokani gone yalewa, ia kevaka sa rui kaukauwa na nona gagadre vua, ka sa nanuma me rau sa vakamau, ia me rau qai vakamau me vaka sa vinakata ko koya. Sa sega ni dua na i valavala ca e na ka oqo. 37Ia ko koya sa dei sara na lomana ka sega ni vakasaurarataki kina, ka sa nakita me kua ni vakawati, sa vinaka vua me kua ni vakamautaka na nona i tokani gone yalewa. 38Ko koya sa vakamautaki koya sa caka vinaka, ia ko koya sa sega ni vakawatitaki koya sa caka vinaka cake. 39Sa vauci tu na yalewa vakawati vua na watina e na gauna kece sara sa bula kina, ia ke sa mate na watina tagane, sa na qai galala me vakawati kei na dua na tagane sa vinakata ko koya, ia me vaka na loma ni Turaga. 40Ia e na marau cake ko koya ke tiko voli mada ga vaka ko ya. Sa i koya oqo na noqu vakasama, ia au nanuma ni sa tiko tale ga vei au na Yalo ni Kalou.

will be added

X\