1 KORINICA 5

1Sa rogo mai ni caka tiko na dauyalewa e na kemuni maliwa, na mataqali dauyalewa ka sega mada ga ni kune e na kedra maliwa na tawa lotu; oya ni dua vei kemuni e rau la'ki veimoceri tale tiko kei na tinana vakacabecabe! 2E rawa vakacava mo ni se viavialevu tiko ga? E sega li ni kena dodonu me rarawa na yalomuni e na vuku ni ka oqo, ka me vakatalai tani kina mai na kemuni maliwa ko koya e vakayacora tiko? 3Ia ko i au, e dina au tiko tani yani oqo vakayago, au sa tiko vata ga vakayalo kei kemuni, ka'u sa vakatauca oti na noqu lewa me baleta na tamata sa vakayacora na i tovo toro sobu oqo. 4E na yaca ni Turaga ko Jisu, mo ni soqoni vata, ka me tiko kei kemuni na yaloqu vata kei na kaukauwa ni noda Turaga ko Jisu, 5mo ni qai soli koya sara na tamata oqori vei Setani me vakarusai kina na yagona, ka me na vakabulai na yalona e na siga e na lesu mai kina na noda Turaga. 6E sega ni dodonu na nomuni vakadokadokai kemuni tiko. Ko ni sega beka ni kila ni vakalailai wale ga na i vakatubu sa rawa ni tubu kina na i buli madrai taucoko? 7O koya gona mo ni biuta tani na i vakatubu makawa ni valavala ca mo ni qai savasava sara kina. Ko ni sa na qai vaka kina e dua na i buli madrai vou sa sega ni vakatubutaki. Au kila ni ko ni sa vaka dina kina ko i kemuni, ni sa vakamatei oti ko Karisito, na noda Lami ni Lakosivia. 8Meda sa mai marautaka vata gona kina na solevu ni Lakosivia. Eda sega ni mai marautaka vata kei na madrai sa tu kina na i vakatubu ni valavala ca, ia ena madrai ga sa sega na kena i vakatubu koya na madrai ni savasava kei na dina. 9Au a vola yani e na noqu i vola mo ni kakua ni dau vaka i lala vata kei ira na tamata dau veidauci. 10Au a sega ni vakaibalebaletaka tiko kaya vei ira na tawa lotu ni vuravura oqo ka ra dau veidauci, se ko ira na daukocokoco, se daubutako se ko ira na dau qarava na matakau, ka ni na qai rawa ga oya ke ko ni sa lako tani e vuravura oqo. 11Ia na ka ga au vola tiko yani, oya mo ni kakua ni lala vata kaya e dua sa kaya tiko ni sa noda i tokani lotu va-Karisito ka qai dau veidauci tiko, se daukocokoco, se dau qarava na matakau, se dauveivakasewasewani, se daumateni, se daubutako; me kakua sara mada ga na kana vata kei na tamata vaka ko ya. 12Se cava li me la'ki noqu e na nodra lewai na tu e na taudaku? E na qai lewai ira na Kalou. Ia e sega li ni dodonu mo ni lewai ira na lewe ni nomuni i soqosoqo lotu? 13Ni sa kaya na i Vola Tabu, “Ni biuta tani mai na kemuni maliwa na tamata i tovo ca”

will be added

X\