1 KORINICA 3

1Ia kemuni na veiwekani au na sega ni rawa ni vosa vei kemuni me vaka au vosa tiko vei ira na tamata sa tiko vei ira na Yalo Tabu; au na vosa ga vei kemuni me vaka ko ni se tamata vakavuravura tiko ga, ka me vaka na gone dramidrami e na vakabauta vakarisito. 2Au a vagunuvi kemuni e na sucu, ka sega ni vakani kemuni e na kakana dina, ka ni a sega ni se rauti kemuni e na gauna ko ya; ia e na gauna oqo e sa sega tiko ga ni ganiti kemuni, 3ka ni ko ni sa tamata vakavuravura tiko ga. Ni sa kune tiko ga e na kemuni maliwa na veivuvutaki, kei na veileti e sega li ni ko ni sa tamata vakavuravura ka i tovo vakayago tiko ga? 4Nikaya tiko e dua vei kemuni, “O i au, au nei Paula” ka dua tale, “O i au, au nei Apolosa” e sega li ni ko ni se vakarautaka tiko ga na i vakarau vakavuravura? 5O cei o Apolosa? Se o cei o Paula? Keirau sa i talai wale ga, ka keirau a vakayagataki mo ni vakabauta kina, me vaka sa lesi keirau kina na Turaga. 6Au sa tea ko i au na nomuni vakabauta ka vakasuasuataka ko Apolosa, ia na Kalou ga sa qai vakatubura. 7Sa ka wale ga kina ko koya sa tea kei koya sa vakasuasuataka, ia sa levu duadua ga na Kalou, o koya sa vakatubura. 8E rau sa tautauvata ga ko koya sa tea kei koya sa vakasuasuataka, ia e na dui taura na tamata yadua na kena i sau me vaka na nona cakacaka. 9Eda sa matacakacaka vata kei na Kalou; ka ko ni sa i teitei ni Kalou. Ko ni sa vale tale ga ni Kalou. 10E na solisoli e a solia vei au na Kalou, au sa virikotora kina e dua na yavu, me vaka e dua na dau ni tara vale maqosa; ia e dua tani tale e qai mai tara vale kina. la me lewa vinaka na tamata yadua na i valavala ni nona tara vale e kea. 11Ni sa i Jisu Karisito ga na yavu sa virikotori tu, ka sa sega ni rawa ni virikotori e dua tani tale na yavu. 12Ia kevaka e dua e tara e na yavu ko ya na koula, na siliva, na vatu talei, na kau, na co malai se na vu ni witi; 13e na qai vakaraitaki ga mai na cakacaka ni tamata yadua; e na vakatakilai e na Siga i Karisito e na bukawaqa, ni na vakatovolei kina na i vakarau ni cakacaka ni tamata yadua e na bukawaqa. 14Kevaka sa sega ni kama yavu na ka sa tara e dua na tamata e na yavu ko ya, e na soli vua na kena i sau. 15Ia kevaka sa na kama yavu na nona cakacaka, sa na sega ni dua na ka e vo vua, ia sa na vakabulai ga ko koya, me vaka e dua e bula mai na dua na kama. 16Ko ni sega beka ni kila ni ko ni sa vale tabu ni Kalou ka sa tiko vei kemuni na Yalo ni Kalou? 17Kevaka e dua na tamata e vakarusa na vale tabu ni Kalou, ena vakarusai koya na Kalou; ni sa savasava na vale ni Kalou ka sa i kemuni sara ga na vale ko ya. 18Me kakua ni dua me vakaisini koya vaka i koya. Ke dua vei kemuni e nanuma ni sa vuku e na vuravura oqo, me yaco mada me tamata lialia me rawa ni qai vuku dina kina. 19Ni sa ka lialia vua na Kalou na vuku ni vuravura oqo. Ni sa volai e na i Vola Tabu, “Sa vesuki ira na vuku ko koya e na nodra i lawaki” 20Sa volai tale ga vaka oqo e na i Vola Tabu, “Sa kila na Kalou ni sa ka mate wale na nodra vakasama na vuku.” 21O koya gona oya me kakua kina ni dua me sakitaka na ka e rawata na tamata. Ni sa nomuni na ka kece 22se ko Paula, se ko Apolosa, se ko Kifa, se na vuravura, se na bula, se na mate, se na gauna oqo, se na gauna sa bera mai, sa nomuni na ka kece ga; 23ia ko ni sa nei Karisito ka sa nona na Kalou na Karisito.

will be added

X\