1 KORINICA 2

1E vaka kina ko i au, kemuni na veiwekani; e na gauna au a lako yani kina vei kemuni au a sega ni lako yani ka vunautaka vei kemuni na i tukutuku ni Kalou e na vosa matau se vosa vuku. 2Ni'u a sa vakadeitaka tu e lomaqu me'u kakua ni kila e dua tale na ka e na kemuni maliwa, ko Jisu Karisito duadua ga kei na nona lauvako e na kauveilatai. 3O koya gona e na noqu a tiko vata kei kemuni au tiko e na malumalumu kei na rere kei na sautaninini; 4ia a sega ni tau na noqu vosa kei na noqu i tukutuku e na vosa ni veirawai ni vuku vakatamata, ia e a tau ga e na vosa sa vakadinadinataki votu kina na kaukauwa ni Yalo ni Kalou; 5me kakua kina ni vakararavi tiko na nomuni vakabauta ki na vuku ni tamata, ia ki na kaukauwa ga ni Kalou. 6Ia e dina tale ga ni keitou sa dau vosataka na vosa vuku vei ira sa matua vakayalo, ia e sega ni vuku ni vuravura oqo, se nodra vuku na daunilewa ni vuravura oqo, ka ni sa ka wale tiko ga mai na vuku vaka koya. 7Ia na vuku keitou tukuna tiko oqo na vuku ni Kalou ka a vunitaki tu; sa i koya na vuku ka a sa nakita oti tu kina ko koya ni se bera ni buli na vuravura me da na vaka lagilagi kina. 8E sega ni dua vei ira na i liuliu ni vuravura oqo e kila rawa na vuku oya; kevaka era a kila, ke ra a sega ni vakota ki na kauveilatai na Turaga vakaiukuuku. 9Ia me vaka ga sa volai tu e na i Vola Tabu: “A veika sega ni se bau dua na mata me raica se na daliga me rogoca; ka sega ni sa bau curuma mada na vakasama ni tamata me kila rawa kina, sa i koya na veika sa vakarautaka tu na Kalou me nodra era sa lomani koya.” 10Ia sa vakatakila mai na Kalou na veika oqo vei keda e na Yalo Tabu. Ni sa dau dikeva na ka kece ga na Yalo Tabu, ka vaka kina na veika titobu ni Kalou. 11O cei li na tamata e kila na vakasama ni dua tani tale na tamata? Na yalo ga ni tamata koya sa tiko e lomana. Sa vaka tale ga kina na Kalou, sa sega ni dua sa kila na loma ni Kalou, na Yalo Tabu ga ni Kalou. 12Ia eda sa sega ni taura me noda na yalo ni vuravura, na Yalo ga sa lako mai vua na Kalou, me da kila rawa kina na veika sa solia wale mai vei keda na Kalou. 13Sa i ira tale ga oqo na veika keitou a kaya, e sega e na vosa e vakatavuvulitaki e na vuku vakatamata, ia e na veivosa ga sa vakatavuvulitaka na Yalo Tabu, me sereki kina na veika vakayalo vei ira ga sa tiko vei ira na Yalo Tabu. 14Ia sa sega ni rawa ni ciqoma na tamata vakayago na veika ni Yalo ni Kalou, ni ra sa ka lialia vua, ka sa sega ni rawa ni kilai ira ni ra sa dau kilai rawa ga e na ka vakayalo. 15Ia na tamata sa tiko vua na Yalo Tabu sa dikeva ka vakalewa na yaga ni veika kece ga ia e sega ga ni dua e rawa ni dikeva ka vakalewa na lomana. 16Me vaka e kaya na i Vola Tabu, “O cei sa kila na loma ni Turaga? O cei sa rawa ni vakavulici koya?” Ia sa tiko vei keda na loma i Karisito.

will be added

X\