1 KORINICA 15

1Ia oqo kemuni na veiwekani, au gadreva me'u tukuna tale vei kemuni na i Tukutuku Vinaka au a vunautaka vei kemuni, sa i koya ko ni sa ciqoma ka tudei tu kina. 2Na i tukutuku vinaka ko ni sa vakabulai kina kevaka ko ni taura dei tiko. Ke sega, sa sega ni yaga na nomuni a sa vakabauta. 3Au sa vakadewataka yani vei kemuni na ka bibi duadua au a sa ciqoma tale ga ko i au. Oya ni a mate na Karisito e na vuku ni noda i valavala ca me vaka sa volai tu e na i Vola Tabu. 4Ni a bula ka qai vakaturi cake tale e na i katolu ni siga me vaka sa volai tu e na i Vola Tabu. 5A qai rairai vei Pita, ka vaka kina vei ira na lewe tinikarua. 6E a qai rairai vei ira e sivia e lewe lima na drau na veiwekani e na dua vata ga na gauna, e lewe vuqa vei ira oqori era sa bula tiko ga edaidai, ka so era sa vakacegu yani. 7Ia e a qai rairai e muri vei Jemesa, ka vaka tale ga kina vei Ira kece na i apositolo. 8E muri sara e a qai rairai tale ga vei au me vaka e dua sa sucu dole. 9Ni sa i au na i murimuri duadua ni apositolo; sa sega ni yaga me'u vakatokai me'u apositolo, baleta ni'u a vakacacana na i soqosoqo lewe ni lotu ni Kalou. 10Ia e na vuku ni loloma soli wale ni Kalou au sa yaco rawa kina me'u vaka tu oqo edaidai, ka sa sega ni maumau wale na nona loloma vei au. Au sa cakacaka vakaukauwa cake vei ira kece ga na i apositolo, ia oqori e sega ni ko i au, na loloma ga ni Kalou e lomaqu. 11Ia se ko i au se ko ira; sa i koya oqo na ka keimami vunautaka, ka sa i koya na ka ko ni sa vakabauta. 12Ia kevaka sa vunautaki na Karisito ni sa vakaturi cake tale mai na mate; era sa qai kaya vakacava e so vei kemuni ni sa sega na tucake tale mai na mate? 13Kevaka sa sega na tucake tale mai na mate, ke a sega ni vakaturi cake tale mai na mate na Karisito. 14Ia kevaka e a sega ni vakaturi cake tale mai na mate na Karisito, sa qai tawa yaga na neitou i vunau ka tawa yaga tale ga na nomuni vakabauta. 15Keitou sa na kune tale ga ni keitou i vakadinadina lasu ni Kalou, baleta ni keitou vakadinadinataka na nona vakaturi Karisito cake tale na Kalou, ia sa sega ni vakaturi koya cake tale, kevaka e dina ni ra na sega ni vakaturi cake tale na mate. 16Kevaka era na sega ni vakaturi cake tale na mate, ke a sega ni vakaturi cake tale mai na mate na Karisito. 17Ia kevaka e sega ni vakaturi cake tale mai na mate na Karisito, sa qai sega ni yaga na nomuni vakabauta, ka sa tu ga vei kemuni na nomuni i valavala ca. 18Era sa rusa tale ga ko ira era sa vakabauti Karisito era sa mate. 19Kevaka sa ka wale ga ni bula oqo na noda i nuinui vei Karisito, e da sa qai tamata vakaloloma duadua mai vei ira na tamata kece ga. 20Ia sa ka dina na nona a sa vakaturi cake tale mai na mate na Karisito ka sa kena i sevu kina vei ira na sa mate. 21Me vaka ni a vakavuna na mate e dua ga na tamata sa vakavuna tale ga na tucake tale mai na mate e dua na tamata. 22Me vaka ni sa mate kece ga na tamata e na vuku i Atama, era sa na vakabulai kece tale ga e na vuku i Karisito. 23Ia sa dui muria ga na kena veitarataravi: sa kena i sevu na Karisito, ka tarava ko ira era sa nei Karisito ni sa lesu tale mai ko koya. 24Sa na qai yaco mai na i otioti ni a sa solia na matanitu ki vua na Kalou na Tamana ka sa vakawabokotaki ira oti na daulewa kece ga, na veiliutaki kece ga kei na kaukauwa. 25Ni sa na lewa tiko ga ko Karisito me yacova ni sa vakamalumalumutaki ira kece ga na nona meca na Kalou e na ruku ni yavana. 26Na i otioti ni meca me na vakawabokotaki sa i koya ko mate. 27Ni sa tukuna na i Vola Tabu, “Ni sa vakamalumalumutaka na Kalou na ka kece ga e na ruku ni yavana.” Ni kainaki, sa vakamalumalumutaki na ka kece ga, sa macala ni sa sega ni okati kina na Kalou o koya sa vakamalumalumutaka na ka kece ga vei Karisito. 28Ia ni sa vakamalumalumutaki oti na ka kece ga vei Karisito, sa na qai vakamalumalumutaki koya tale ga na Karisito vua na Kalou o koya sa vakamalumaIumutaka na ka kece ga vei koya ga me lewa tiko kina na Kalou na veika kece ga. 29Kevaka sa sega na tucake tale mai na mate, a cava era na cakava ko ira era papitaisotaki e na vukudra na mate? Kevaka era na sega ni vakaturi cake tale na mate, na cava era papitaisotaki kina na tamata e na vukudra. 30A cava tale ga keitou sa bolea tu ga kina na mate e veigauna kece ga? 31Kemuni na veiwekani au sota kaya na mate e na veisiga. Na noqu marau e na vukumuni e na noda bula vata kei Karisito e vakavuna na noqu tusanaka na ka oqo. 32A cava na kena yaga vei au na noqu a vala kei na manumanu kila mai Efeso ke tu vei au na i naki vakatamata ga? Kevaka era sega ni vakaturi cake tale na mate, ia “Me da kana ka gunu, ka ni da na mate ni mataka” me vaka e kaya na i Vola Tabu. 33Ni kakua sara ni vakacalai. “Sa dau vakarusa na i vakarau vinaka ko ira na i tokani ca.” 34Ni yalomatua mada ka kakua ni ia tiko na i valavala ca. E so vei kemuni era sega tu ni kila na Kalou, au tukuna na ka oqo mo ni madua kina. 35Ia e so na tamata era na taroga, “Era na vakaturi cake tale beka vakacava ko ira na mate? Na mataqali yago vakacava era na taurivaka?” 36O iko na tamata sesewa, na sore ni kau ko kaburaka e na sega ni bula kevaka e sega mada ni mate. 37Na ka ko kaburaka ki na qele e sore ni kau wale ga, e sore ni sila beka, se sore ni witi, se sore ni dua tale na kau. E sega ni yago ni kau e na tubu cake mai. 38Sa solia na Kalou na yagona, me vaka na nona lewa, ka sa solia ki na veisore ni kau yadua na yago e dui rauta. 39Sa sega ni tautauvata na lewe ni ka bula kece ga. Sa dua na kena mataqali na yago ni tamata, sa dua tani na lewe ni manumanu, dua tani tale na lewe ni manumanu vuka ka dua tani na lewe ni ika. 40Era sa tu na yago vakalomalagi, ka ra tu tale ga na yago vakavuravura; sa tu na lagilagi ni yago vakalomalagi, ka sa tu tale ga na lagilagi ni yago vakavuravura. 41Sa tiko ga na lagilagi ni matanisiga, ka dua tani ga na lagilagi ni vula, sa dua tani tale ga na lagilagi ni veikalokalo; sa duidui tale ga na lagilagi ni veikalokalo yadua. 42Sa vaka tale ga kina na nodra vakaturi cake tale na mate. Ni sa bulu na yago sa na vuca; ni sa vakaturi cake tale, sa na sega ni vuca rawa. 43Ni sa bulu e na kena beci ka malumalumu, ia na sa vakaturi cake tale sa lagilagi ka kaukauwa. 44Ni sa bulu sa yago vakayago ga, ni sa vakaturi cake tale sa yago vakayalo. Kevaka sa dua na yago vakayago, sa dua tale ga na yago vakayalo. 45Ni sa volai e na i Vola Tabu, “Sa yaco na i matai ni Atama me tamata bula” ia sa yaco na i otioti ni Atama me dau soli bula. 46Ia sa sega ni taumada na ka vakayalo ia, sa taumada na ka vakayago ka qai muri na ka vakayalo. 47Sa buli na i matai ni Atama mai na kuvu ni soso, ia na i karua ni Atama sa lako mai lomalagi. 48Era sa vakataki koya sa vakavuravura ko ira era sa vakavuravura, ka ra sa vakataki koya sa lako mai lomalagi ko ira era sa vakalomalagi. 49Me vaka sa ucui koya sa caka mai na qele, e da na ucui koya tale ga sa lako mai lomalagi. 50Kemuni na veiwekani, sa i koya oqo na ka au kaya tiko. E sega ni rawa ni vakaivotavota e na matanitu ni Kalou na yago sa vakalewe ka vakadra, ka sega ni rawa ni vakaivotavota na ka e dau vuca e na veika e tawa vuca rawa. 51Ni rogoca me'u tukuna vei kemuni e dua na ka vuni. E da na sega ni mate kece, e da sa na vukici ga vakasauri, 52me vaka na sauriva ni mata ni sa uvu na i otioti ni davui. Ni sa tagi na davui, era na qai vakaturi cake na mate me ra kua tale ni mate rawa, ka na qai veisau kece tale ga na yagoda. 53Ni sa na vakaisulu na yago vuca oqo me kua ni vuca rawa, ka vakaisulu na yago mate oqo me kua ni mate rawa. 54Ia ni sa vakaisulu tu na yago dau vuca oqo me kakua ni vuca rawa ka vakaisulu na yago mate oqo me kakua tale ni mate rawa, sa na qai vakayacori kina na ka sa volai: “Sa vakarusai ko mate; sa rawa na qaqa.” 55“Ko iko mate sa e vei na nomu qaqa? Mate sa e vei na nomu bati gaga?” 56Na bati gaga ni mate na i valavala ca, ia na kaukauwa ni valavala ca na lawa. 57Ia me vakavinavinakataki na Kalou o koya sa solia vei keda na qaqa e na vuku ni noda turaga ko Jisu Karisito. 58O koya oqo kemuni na wekaqu, ni tudei ka kakua ni vakayavalati. Ni vakaogai kemuni tiko ga e na cakacaka ni Turaga, ni ko ni sa kila, sa sega ni ka wale na nomuni cakacaka e na vuku ni Turaga.

will be added

X\