1 KORINICA 14

1Ni vakasaqara taumada na loloma. Ni vakasaqara matua sara na veisolisoli vakayalo ka vakauasivi mo ni parofisai. 2O koya e vosa e na dua na vosa tani, e sega ni vosa vei ira na tamata, sa vosa vua na Kalou, ka ni sega ni dua na tamata e kila; ia sa vosataka na veika vuni e na veiceguvi ni Yalo Tabu. 3Ia ko koya e parofisai sa vosa vei ira na tamata me vakatataki ira cake, vakayaloqaqataki ira ka vakacegui ira. 4O koya e vosa e na dua na vosa tani, sa vakatataki koya cake vaka i koya ga. Ia ko koya sa parofisai sa vakatataki ira cake na i vavakoso lewe ni lotu. 5Au vinakata mo ni vosa kece ga e na vosa tani, ia au gadreva vakalevu cake ga mo ni parofisai. Ni sa levu cake ko koya sa parofisai vei koya sa vosa e na vosa tani, vaka vo ga ke dua e rawa ni vakadewataka me vakatataki cake kina na i vavakoso lewe ni lotu. 6Sa vaka kina kemuni na veiwekani, kevaka au lako yani vei kemuni ka vosa vei kemuni e na vosa tani, au na yaga vakacava vei kemuni kevaka au sega ni vakayagataka na vosa me vakatakilai kina vei kemuni na ka dina, se na vuku, se na parofisai, se na i vakavuvuli? 7Sa vaka kina na veika mate ka daurorogo me vaka na bitu ni vakatagi se na api. Kevaka e sega ni tu na duidui e na kedra i rorogo, e na kilai vakacava na i lagalaga ni sere sa vakatagitaki kina? 8Kevaka e na sega ni matata na domo ni davui ni valu, o cei e na vakarautaki koya ki na i valu. 9E na vaka kina ko i kemuni kevaka ko ni vosataka na vosa tawa macala, e na kilai vakacava na ka ko ni vosataka? Ko ni sa vosa wale ga ki na cagi. 10Sa dina ni sa vuqa sara na veimataqali vosa e vuravura, ia sa sega ni dua vei ira me sega na kena i balebale. 11Kevaka au sa sega ni kila na i balebale ni vosa, au sa kai tani mai vei koya sa vosa tiko, ka sa kai tani tale ga vei au ko koya. 12Sa vaka kina ko i kemuni ko ni sa gadreva vakalevu na veisolisoli vakayalo mai vua na Yalo Tabu, ni gumatua me toro cake kina na kena vakatataki cake na i soqosoqo lewe ni lotu. 13Ko koya sa vosa e na dua na vosa tani, me masulaka me soli vua na kaukauwa me vakadewataka rawa. 14Kevaka au masu e na dua na vosa tani sa na masu ga na yaloqu, ia sa na sega ni vakaitavi kina na noqu vakasama. 15A cava me'u na qai cakava? Au na masu e na yaloqu, ka masu tale ga e na noqu vakasama; au na laga sere e na yaloqu, au na laga sere tale ga e na noqu vakasama. 16Kevaka ko sa vakavinavinaka e na yalomu ga, e na vosa tani, e na kila vakacava na tamata wale me muria na nomu masu ni sa sega ni kila na ka ko kaya. 17E na daumaka sara beka na nomu vakavinavinaka, ia sa na sega ni vakatataki cake kina ko koya. 18Au vakavinavinaka vua na Kalou ni'u sa uasivi cake vei kemuni e na vosataki ni veivosa tani. 19Ni sa vinaka cake vei au me'u vosataka e lima ga na vosa e rawa me kilai ki na i soqosoqo lewe ni lotu, me ra vakavulici tale ga kina na tani, ka ca na tini na udolu na vosa e na dua na vosa tani era sega ni kila na tamata. 20Kemuni na veiwekani, ni kakua ni vaka tiko na gone e na nomuni vakasama. Mo ni gone e na i tovo ca, ka tamata bula e na nomuni vakasama. 21Ni sa volai tu e na Vola Tabu: “ʻAu na vosa vei ira na tamata oqo, vei ira na tamata era vosa e na vosa tani. Kei na gusudra na kai veimatanitu tani, ia era na sega ga ni vakarorogo vei au,ʼ sa kaya na Turaga.” 22O koya oqo, ni sa i vakatakilakila vei ira na tawa vakabauta na vosa e na veivosa tani e vuqa, ka segai vei ira na vakabauta. Ia na parofisai sa baleti ira sa vakabauta ka sega ni baleti ira era tawa vakabauta. 23O koya gona, kevaka era curu mai na tu e taudaku kei ira na tawa vakabauta; era na sega li ni kaya ni ko ni sa lialia? 24Ia kevaka era parofisai kece ka qai curu mai e dua na tawa vakabauta se dua mai taudaku, sa na lauti e na nodra vosa kece ga, ka sa na lewai ko koya e na nodra vosa kece sara; 25ka sa na vakavotui na veika vuni ni lomana. E na qai cuva sobu me qarava na Kalou ka tusanaka, “Sa tiko na Kalou e na kemuni maliwa” 26A cava me caka vei kemuni na veiwekani? Ni ko ni sa soqoni vata mo ni qarava na Kalou e na vakauqeti kemuni na Yalo Tabu, me dua e nona i tavi na sere, dua e nona na veituberi, dua tale me vakatakila vei ira e so na i tukutuku mai vua na Kalou e na gauna ko ya, dua tale e na vosa tani ka dua tale me na vakadewataka. Ia me caka na ka kece ga. 27Ke dua sa vosa e na vosa tani, me rua se tolu sara me ratou vosa veitarataravi ka dua me qai vakadewataka sara. 28Ke sega ni dua me vakadewataka me ratou galu tiko ga na tamata ko ya e na gauna ni lotu, ia me vosa ga vei koya vaka i koya ka vosa vua na Kalou. 29Me lewe rua se tolu na parofita me ratou vosa ka me ra qai vakarorogo na kena vo. 30Ia ke sa laurai na i vakatakilakila vua e dua e dabe tiko kina ni vakatakilai mai vua e dua na ka, ia me vosa mada ka me galu ko koya e vosa tiko. 31Ni sa rawa mo ni vosa yadudua ka mo ni vuli kece kina ka vakayaloqaqataki kece kina. 32Ni ra sa lewa na yalo ni parofita ko ira na parofita, 33ni sa sega ni vu ni veisei na Kalou, ia sa vu ni veisaututaki ga. Me vaka e na veivavakoso kece ga ni tamata ni Kalou, 34me ra dau galu na yalewa ni sa sega ni dodonu me ra vosa; ka me ra dau vakamalumalumutaki ira me vaka na lawa i Mosese. 35Kevaka era via kila e dua na ka me ra qai taroga ga na watidra mai vale, ni sa ka vakamadua me ra vosa na yalewa e na soqoni vakalotu. 36Sa taka li mai vei kemuni na vosa ni Kalou, se sa i kemuni duadua ga sa yaco vei kemuni? 37Kevaka e dua sa nanuma sa parofita se tamata vakayalo, me kila tiko ni sa i vunau ni Turaga au sa vola tiko yani vei kemuni. 38Ke dua e sega ni kauwaitaka, me kua tale ga ni kauwaitaki. 39O koya gona kemuni na wekaqu, ni gadreva vagumatua mo ni parofisai, ia ni kua ni tarova na vosa e na veivosa tani. 40Ia na ka kece ga me caka sara vaka vinaka ka tuvalaki vakamatau.

will be added

X\