1 KORINICA 12

1Kemuni na veiwekani, e na vuku ni veisolisoli vakayalo, au sega ni vinakata mo ni lecava tiko. 2Ko ni sa kila ni ko ni a sa tawa lotu tu, ko ni a vakauti ki na so na veimatakau galu, ia ko ni sa lako tu. 3Sa i koya gona au vinakata kina mo ni kila, ni sega ni dua na tamata e vosa e na yalo ni Kalou me na vosa vakacacataki Jisu rawa, ka sega tale ga ni dua me rawa ni kaya ni sa Turaga ko Jisu kevaka e sega ni vuna na Yalo Tabu. 4Sa duidui na veisolisoli vakayalo, ia sa dua bau ga na Yalo Tabu o koya sa vakavuna kece ga. 5Sa vuqa na sala meda veiqaravi kina, ia sa dua bauga na Turaga meda qarava. 6Sa vuqa na mataqali cakacaka, ia sa dua bauga na Kalou o koya sa vakavuna vei ira na tamata yadua. 7Sa votai na tamata yadua e na i vakaraitaki ni cakacaka ni Yalo Tabu e na dua na ka me yaga raraba. 8Sa soli ki vua e dua na vosa vuku e na cakacaka ni Yalo Tabu, vua tale e dua sa soli kina na kila ka e na cakacaka tale ga ni Yalo Tabu, 9ki vua tale e dua na vakabauta e na cakacaka tale ga ni Yalo Tabu, ki vua tale e dua me veivakabulai. 10Ki vua tale e dua na veicakacaka mana, vua tale e dua na parofisai, vua tale e dua, me rawata me tukuna na kedra duidui na veisolisoli e vuna na Yalo Tabu kei na kena e vakavuna na tevoro, vua tale e dua me vosa e na veimataqali vosa, vua tale e dua me tukuna na i balebale ni veimataqali vosa. 11Ia sa dua ga ka sa i koya tiko ga na Yalo Tabu sa vakavuna na veika kece oqo, sa i koya tale ga sa veivotayaka vei ira na tamata yadua me vaka na lomana. 12Me vaka sa dua bauga na yago ka vuqa na veitikina, ia na veitiki ni yago sa vuqa sara, sa buli kina e dua na yago taucoko. Sa vaka tale ga kina na Karisito. 13E da sa papitaisotaki kece ki na dua ga na yago e na dua bauga na Yalo Tabu. Se da Jiu se da kai Kirisi, se da bobula se da tamata galala, e da sa vagunuvi tale ga mai na dua bauga na Yalo Tabu. 14Ni sa sega ni dua wale ga na tiki ni yago, sa vuqa sara na veitikina. 15Kevaka e kaya na yava, “Au sega ni tiki ni yago ko i au baleta ni'u sega ni liga,” e sega ni ka oqori e sega kina ni tiki ni yago. 16Kevaka e kaya na daliga, “Au sega ni tiki ni yago koi au baleta ni'u sega ni mata,” e sega ni ka oqori e sega kina ni tiki ni yago. 17Kevaka e mata na yago taucoko, a cava e na qai rogo kina? Ke daliga na yago taucoko, a cava e na boica kina na ka? 18Ia oqo sa tuvana na Kalou na veitiki ni yago e na yago, na veitiki ni yago yadua me vaka na lomana. 19Kevaka era sa yago kece me dua ga na tiki ni yago, e na qai yaco me cava na yago? 20Ia oqo sa vuqa na veitikina, ka sa duabau ga na yago. 21Ia oqo e na sega ni kaya rawa na mata ki na liga, “E sega na kemu yaga vei au.” Se me kaya na ulu ki na yava, “E sega na kemu yaga vei au.” 22Ia e da raica na kena veibasai; na veitiki ni yago era rairai malumalumu era sa yaga sara. 23Na veitiki ni yagoda malumalumu sa yaga sara ki na noda bula kei na veitiki ni yagoda e sega so ni rairai vinaka e da sa dau qarauna vakalevu, 24na ka sa sega ni gadreva na veitiki ni yagoda rairai vinaka. Sa i koya ga na Kalou sa bulia na yago e na kena i bulibuli me dokai vakalevu cake kina na veitikina malumalumu. 25Me kakua kina ni veisei na veitiki ni yago. 26Kevaka sa rarawa e dua na tiki ni yago, era sa rarawa vata kaya na veitikina kece ga; kevaka sa dokai e dua na tikina, era sa reki vata kece tale ga kina na veitiki ni yago kece ga. 27Sa i kemuni na yago i Karisito ka dui veitikina yadua kina. 28A sa lesia na Kalou ki na i soqosoqo lewe ni lotu: na i matai ko ira na i apositolo, na kena i karua ko ira na parofita, na kena i katolu ko ira na i vakavuvuli, tarava ko ira na daucaka mana, tarava ko ira na dauveivakabulai kei ira na dauveivuke kei ira na daulewa kei ira era kila na veimataqali vosa. 29Era sa i apositolo kece li? Era sa parofita kece li? 30Era sa dau veivakabulai kece li? Era sa kila kece li na veimataqali vosa? Era sa na dau vakadewataka kece li na veimataqali vosa? 31Ia mo ni gadreva vakalevu na veisolisoli sa uasivi cake. Ia au sa na vakatakila vei kemuni e dua na sala sa uasivi cake.

will be added

X\