1 KORINICA 11

1Ni vakamurimuri au me vaka au sa vakamurimuri Karisito. 2Au sa dokai kemuni e na vuku ni nomuni nanumi au tiko ga, ka taura matua na i vakavuvuli au a vakadewataka vei kemuni. 3Ia au vinakata mo ni kila ni sa ulu ni tamata yadua na Karisito; sa ulu ni yalewa na tagane, ka ulu i Karisito na Kalou. 4Na tagane yadua e masu se parofisai ka ubi tiko na uluna sa beci Karisito na uluna. 5Na yalewa yadua e masu se parofisai ka sega ni ubia na uluna, sa beca na watina, na uluna, ka sa tautauvata ga sa tasivori. 6Ke dua na yalewa e sega ni ubia na uluna, e vinaka cake me tasivori. Ia me vaka ni ka vakamadua vua e dua na yalewa me tasivori se tasi na uluna, sa dodonu me ubia na uluna. 7Sa sega ni dodonu vua na tagane me ubia na uluna baleta ni sa vakaraitaka na i yaloyalo kei na lagilagi ni Kalou. Ia na yalewa, sa vakaraitaka na Iagilagi ni tagane. 8Ni a sega ni buli na tagane mai na yalewa, ia e a buli na yalewa mai na tagane. 9Ni sa sega ni buli na tagane me baleta na yalewa, ia e a buli na yalewa me baleta na tagane. 10O koya gona e na vukudra na agilosi, sa dodonu kina vua e dua na yalewa me ubia na uluna, me vakaraitaka ni vakarorogo ko koya vua na watina. 11Ia e na noda bula e na vuku ni Turaga, sa sega ni tu kina vaka i koya na yalewa mai vua na tagane, ka sega ni tu vaka i koya na tagane, mai vua na yalewa. 12Me vaka ni a buli na yalewa mai vua na tagane; sa vaka kina ni sa sucu na tagane mai vua na yalewa, ia sa vu na ka kece ga mai vua na Kalou. 13Ni lewa mada vaka i kemuni: sa kilikili beka li ki na yalewa me sega ni ubia na uluna ni masu ki vua na Kalou? 14Ko ni sega beka ni vulica na i tovo vakatamata, oya kevaka e balavu tu na drau ni uluna na tagane, sa ka velavela vua, 15ia kevaka e balavu tu na drau ni uluna na yalewa, sa ka dokai vua? Sa soli vua na drau ni uluna me ubia kina na uluna. 16Kevaka e dua e via veileti e na ka oqo, sa sega tale ni dua na i tovo keimami dau cakava se ra dau vakayacora na veisoqosoqo lewe ni lotu ni Kalou ni keimami dau soqoni me keimami lotu. 17E na veikoro oqo, au sega ni vakacaucautaki kemuni kina ni ko ni sa sega ni cakava na ka e vinaka cake ia na veika ga me ca sobu kina na nomuni soqoni. 18Na kena i matai au sa rogoca ni ko ni sa dau veisei e na gauna ko ni soqoni kina vaka i vavakoso, ia au sa vakabauta vakatikina ga na ka oqo. 19E sega ni vakatitiqataki ni yaco dina tiko na tatawasewase ena kemuni maliwa ka me ra na laurai vakavinaka kina ko ira era dodonu tiko. 20Ni ko ni sa soqoni vata vakaivavakoso sa sega ni rawa ni ko ni kania na i Vakayakavi ni Turaga. 21Ka ni ko ni sa vakariri mo ni dui kania ga na kemuni kakana ena gauna sa caka kina na kana, ka sa yaco kina me ra via kana tu ga eso ka so era mateni sara. 22Sa sega li na nomuni veivale mo ni kana ka gunu kina? Ko ni sa beca beka li na i soqosoqo lewe ni lotu, ka vakamaduataki ira na dravudravua e sega na kedra? Na cava ko ni nanuma me'u kaya vei kemuni e na ka oqo? Me'u dokai kemuni beka kina? E na sega sara ni vaka kina. 23Na i vakavuvuli au sa vakadewataka vei kemuni, au a taura sara ga mai vua na Turaga, oya ni a taura na madrai na Turaga ko Jisu e na bogi e a bukiveretaki kina, 24ia ni sa oti na nona vakavinavinakataka, sa qai dovia, ka kaya, “Oqo na yagoqu, sa soli e na vukumudou. Dou cakava na ka oqo mo dou dau vakananumi au kina.” 25A sa taura vaka tale ga kina na bilo ni sa oti na i vakayakavi, ka kaya, “Na bilo oqo na veiyalayalati vou e na noqu dra. E na gauna kece ga dou gunuva kina, dou kitaka mo dou dau vakananumi au kina” 26E na veigauna kece sara dou na kania kina na madrai oqo ka gunu e na bilo oqo, dou sa vakaraitaka tiko na mate ni Turaga me yacova na nona lesu tale mai. 27Ia ko koya yadua sa kania na madrai ni Turaga ka gunuva na bilo e na nona sega ni doka sa i valavala ca ki na dra kei na yago ni Turaga. 28Me dui dikevi koya na tamata yadua ni bera ni kania na madrai ka gunu mai na bilo ko ya. 29Kevaka e sega ni vakila ko koya na i balebale ni yago ni Turaga ena gauna e kana madrai kina ka gunu mai na bilo, sa kauta mai vua vakaikoya na rusa ena gauna e kana tiko kina. 30Sa i koya oqo na vuna era sa malumalumu ka tauvimate kina e lewe vuqa vei kemuni, ka ra mate sara kina e lewe vuqa. 31Ia kevaka e da sa vakadikevi keda vakavinaka e na sega ni lewai keda na Kalou. 32Ia ni sa lewai keda na Turaga, sa vakavulici keda, me da kakua kina ni vakarusai vata kei vuravura. 33O koya gona kemuni na wekaqu, ni ko ni sa soqoni vata mai mo ni kania na i Vakayakavi ni Turaga, ni bau dau veiwaraki. 34Ke dua sa via kana me kana ga mai vale, me kakua kina ni cudruvi kemuni na Kalou e na nomuni dau soqoni vata. Au na qai la'ki vakameautaka na veika sa vo ni'u sa na lako yani.

will be added

X\