1 KORINICA 10

1Au vinakata mo ni kila na veiwekani, ni ra a vakarurugi kece na noda qase e na o ka ra lako kosova kece na Wasawasa Damudamu. 2Era a papitaisotaki kece vei Mosese e na o kei na wasawasa; 3era sa kania vata kece ga na kakana vakayalo, 4ka ra gunuva vata kece tale ga na wai ni gunu vakayalo; ni ra sa dau gunu mai na dua na vatu vakayalo sa muri ira tiko; sa i Karisito na vatu ko ya. 5Ia e lewe vuqa vei ira sa sega ni vinakati ira na Kalou; ka ra sa mate laivi tu yani e na vanua lala. 6Na veika oqo era sa i dusidusi vei keda, me da kakua kina ni dau garova na veika ca me vakataki ira. 7Ni kakua tale ga ni qaravi matakau me vakataki ira; ni sa volai e na i Vola Tabu, “Era sa dabe sobu na Isireli me ra kana ka gunu, ka ra qai tucake me ra meke, me ra qarava na matakau.” 8Me da kakua ni dauyalewa me vakataka e so vei ira, ka ra sa mate kina e lewe ruasagavulu katolu na udolu e na dua ga na siga. 9Me da kakua ni vakataki ira e so vei ira e na nodra vakatovolea na Turaga ka mani vakarusai ira kina na gata. 10Ni kakua tale ga ni daudidi me vakataka e so vei ira, ka mani tala mai kina na nona agilosi na Kalou me vakarusai ira. 11Era sa i dusidusi kece na veika e yacovi ira, ka ra sa volai tu me ra i vakasala vei keda e da sa bula e na gauna sa voleka mai kina na i vakataotioti. 12Sa i koya gona me qarauni koya kina ko koya sa nanuma ni sa tudei de qai bale. 13E sega ni dua na veivakatovolei ka sa yacovi kemuni me dua tani mai na kena e dau yaco ki na tamata. Sa yalo dina na Kalou, ka na sega ni laiva me sivia na nomuni kaukauwa na ka ko ni vakatovolei kina; e na solia ko koya e na gauna ni veivakatovolei na sala mo ni dro bula rawa kina kei na kaukauwa mo ni vosota kina. 14O koya oqo kemuni na wekaqu lomani, ni tarovi kemuni kina mai na qaravi matakau. 15Au vosa tiko vei kemuni me vaka au vosa vei ira na yalomatua; ka mo ni lewa vakataki kemuni na ka au kaya tiko. 16Na bilo ni vakavinavinaka e da dau vakavinavinaka kina, e sega li ni ka oqo e da veitokani vata kina e na dra i Karisito? Na madrai e da dau dovia, e sega li ni ka oqo e da veitokani vata kina e na yago i Karisito? 17Me vaka ni sa dua ga na madrai ko i keda kece dina ga e da sa lewe vuqa, e da dua ga na yago ni da sa vakaivotavota kece mai na dua ga na i buli madrai. 18Vakasamataki ira mada na mata tamata na Isireli: Ko ira era kania na ka e vakacabori me i soro era votai e na ka e vakacabori vua na Kalou e na i cabocabo ni soro. 19A cava na i balebale ni ka au kaya tiko oqo? Au sega ni kaya ni matakau e vakacabori kina na kakana era kalou dina. 20Na ka au kaya sa i koya oqo: na kakana e vakacabori ki na veimatakau e vakacabori vei ira na tevoro ka sega ni vakacabori vua na Kalou. Au sega ni vinakata mo ni qarava na tevoro. 21E sega ni rawa mo ni gunu mai na nona bilo na Turaga ka gunu tale ga e na nona bilo na tevoro; e sega ni rawa mo ni vakaivotavota mai na teveli ni Turaga kei na teveli tale ga ni tevoro. 22Se e da via vakacudruya li na Turaga? E da sa kakauwa cake li vua? 23Sa tara na ka kece ga, ia sa sega ni dau veivukei na ka kece sara. Sa tara na ka kece ga, ia sa sega ni veivakatataki cake na ka kece sara. 24Me kakua na qara na ka me baleti keda ga me da qara tale ga na ka me ra vinaka kina na tani. 25Sa tara mo ni kania na ka kece ga e volitaki e na vale ni volitaki lewe ni manumanu ka kakua tale ni via vaqaqa ena nomuni lewa e loma. 26Ni sa kaya na i Vola Tabu, “Ni sa nona na Turaga na vuravura kei na ka kece ga sa tu kina.” 27kevaka ko ni sa vakadonuya na nona sureti kemuni e dua na tamata tawa lotu, ni kania na kakana kece ga sa vakarautaka vei kemuni ka kakua tale ni via vaqaqa e na nomuni lewa e loma. 28Ia ke mani dua e kaya vei kemuni “Na kakana oqo sa vakacabori oti ki na matakau” ni kakua ni kania e na vuku i koya sa tukuna vei kemuni kei na vuku tale ga ni lewa e loma, 29e sega ni nomuni lewa e loma o koya au tukuna oqo, ia na nona lewa e loma na tamata ko ya. A cava e mai yalani kina na noqu galala, e na vuku ni nona lewa e loma e dua tani na tamata? 30Kevaka au vakavinavinaka vua na Kalou e na ka au kania, a cava me'u vosa vakacacataki kina e na vuku ni ka au vakavinavinaka tiko kina. 31O koya gona, se ko ni kana se ko ni gunu, se cava ga ko ni cakava, mo ni cakava kece sara me vakarokorokotaki kina na Kalou. 32Mo ni kakua ni vu ni veivakacalai vei ira na Jiu se vei ira na kai Kirisi, se vei ira na i soqosoqo lewe ni lotu ni Kalou, 33me vaka au sa tovolea me'u vinaka vei ira na tamata kece ga e na ka kece ga au cakava. Au sega ni qara kina na ka me yaga taudua ga vei au, ia na ka ga me yaga vei ira na lewe vuqa me ra vakabulai kina.

will be added

X\