1 KORINICA 1

1Ko i au ko Paula, au sa kacivi e na wekada me vola yani na noqu i vola oqo. lewa ni Kalou me'u i apositolo i Jisu 2Ki na i soqosoqo lewe ni lotu ni Kalou Karisito; au sa vakayagataki Sosiceni na mai Korinica, vei ira era sa tu vata kei Karisito ka ra sa vakasavasavataki me ra nona, vata kei ira kece ga mai na veivanua kece ga era sa dau masuta na yaca ni noda Turaga ko Jisu Karisito, o koya sa nodra Turaga ka noda tale ga: 3Me nomuni mada ga na loloma kei na vakacegu mai vua na Kalou ko Tamada, kei na Turaga ko Jisu Karisito. 4Au sa dau vakavinavinaka tiko ga vua na noqu Kalou e na vukumuni, e na vuku ni nona loloma sa soli vei kemuni e na vuku i Karisito Jisu. 5Ni ko ni sa vakavutuniyautaki kina e na ka kece ga e na vukuna, e na i vakarau ni nomuni vosa kece ga kei na nomuni kila ka. 6Me vaka ni sa vakadinadinataki e na nomuni bula na i tukutuku kei Karisito, 7sa sinai tu kina vei kemuni e na gauna oqo na veisolisoli vakayalo kece ga e na nomuni waraka tiko na gauna e na basika tale mai kina na noda Turaga ko Jisu Karisito. 8E na vakataudeitaki kemuni tu ko koya, mo ni kakua ni vakacalai me yacova na i vakataotioti, na Siga e na lesu tale mai kina na noda Turaga ko Jisu Karisito. 9Sa yalodina na Kalou, o koya sa kacivi kemuni mo ni veitokani vata kei na luvena, ko Jisu Karisito na noda Turaga. 10Au sa vakamasuti kemuni na veiwekani e na yaca ni Turaga ko Jisu Karisito, me duavata ga na ka ko ni kaya me kakua kina na veisei e na kemuni maliwa; ia mo ni sa duavata sara e na vakasama kei na lewa. 11Eratou vakaraitaka mai vei au na lewe ni vuvale i Kiloi ni yaco tiko na veisei e na kemuni maliwa na wekaqu. 12E so vei kemuni era kaya ni ra nei Paula, ka so era kaya ni ra nei Apolosa; e so era kaya ni ra nei Kifa ka so tale era kaya ni ra nei Karisito. 13Sa tatawasewase beka na Karisito? Se ko ni a papitaisotaki beka ena yaca i Paula? 14Au sa vakavinavinaka vua na Kalou ni'u a sega ni papitaisotaka e dua vei kemuni, ko i rau ga ko Kirisipo kei Keio; 15de qai kaya kina e dua vei kemuni ni a papitaisotaki e na yacaqu. 16Oi, au a papitaisotaki iratou tale bagi ga na vuvale i Sitiveni; ia au sega ni nanuma rawa tale e dua au a papitaisotaka. 17Ni a sega ni talai au mai na Karisito me'u mai veipapitaisotaki, ia me'u vunautaka ga na i Tukutuku Vinaka, sega e na vosa vuku vakatamata de vakatawayagataki kina na kaukauwa ni kauveilatai i Karisito. 18Ni sa ka lialia na vunautaki ni kauveilatai vei ira era sa lako sese tiko, ia sa kaukauwa ni Kalou vei keda eda sa vakabulai kina. 19Ni sa kaya na Kalou e na i Vola Tabu: “Au na vakarusa na nodra vuku na tamata vuku, ka'u na vakatawayagataka na nodra kila ka na tamata kila ka.” 20Era sa qai i vei na tamata vuku? Era sa i vei na tamata kila ka? Era sa i vei na matai ni veileti ni vuravura oqo? Sa sega beka li ni cakava na Kalou me rairai lialia na vuku ni vuravura oqo? 21Io, e na vuku ni Kalou sa cakava kina ko koya me ra kakua ni kilai koya rawa na tamata e na nodra vuku vakatamata ga. A sa dodonu ga e lomana me vakabulai ira era sa vakabauta e na i tukutuku rogorogo vakalialia keitou sa vunautaka tiko. 22Era sa dau taroga e so na i vakatakilakila ko ira na Jiu, ka ra vaqara na vuku na kai Kirisi; 23ia ko i keitou, keitou sa vunautaka ga na Karisito ka a lauvako e na kauveilatai; a i tukutuku sa dredre sara vei ira na Jiu me ra vakabauta ka sa ka lialia vei ira na kai Kirisi. 24Ia vei ira ga sa kacivi ira na Kalou, se ra Jiu se ra kai Kirisi, sa i Karisito na kaukauwa kei na vuku ni Kalou. 25Ni sa vuku cake na sesewa ni Kalou mai na nodra vuku na tamata, ka sa kaukauwa cake na malumalumu ni Kalou mai na nodra kaukauwa na tamata. 26Ni vakasamataka mada na veiwekani na i tovo ni nomuni kacivi. E lewe vica wale sara vei kemuni era tamata vuku e na i vakatagedegede vakatamata, e lewe vica wale sara era cecere, ka lewe vica wale ga era sucu turaga. 27Ia sa digitaka na Kalou na ka sa okati e vuravura me ka lialia me vakamaduataki ira na vuku; ka sa digitaka na Kalou na ka sa okati e vuravura me malumalumu me vakamaduataka na ka kaukauwa. 28Sa digitaka na Kalou na ka sa malumalumu ka beci e vuravura, io na veika era nanuma na tamata ni sega na betedra, me vakarusa na veika era sa tudei tu; 29me kakua kina ni sakitaki koya e dua na tamata e na mata ni Kalou. 30Ka ni sai i koya ga na Kalou sa vu ni nomuni tu vata kei Karisito Jisu, ka sa i Jisu sa qisia na Kalou me vu ni vuku vei keda ka vu ni noda vakadonui, noda vakasavasavataki, kei na noda vakabulai. 31Me vakayacori kina na ka sa volai tu, “O koya sa via sakitaka e dua na ka, me sakitaka ga na Turaga.”

will be added

X\