Titus 3

1Ɓaysi daw pî, aw ûuni hak waw a gin wûun ây ni nit tiɗàm kpees ây, aw rak daw tuy, aw kîr a tèerra tèem mbâra pî. 2Ta aw maasu koo di wuna ba, ta aw tâa nit tilètnjurum ây ba, amma aw tâa nit mgbergum yèk ây, aw lòni fetkum tinîiri da nit ây pî. 3Ngam orro ɗa ot dii nà mgban ray, nit hàanjum ây, ot dii nà a ot gbeerra, ot dii nà kà sàay ây a gayrum jàk ây ni yiɗum jàk ây 'nang 'nang. Ot dii ot tâarre nà a tèem makta, a ngèeri. Aw yiinarre nà, orro ɗa ot yiinjirre a tîim worro. 4Amma ye tâa Fay Tooy saanum worro lòni mgbergum wàa, ni yiide wàa a gin nit ay gi, 5de saanina, ti tâa ngam ot tèe tèem gòyrra ɗèm ba, amma ngam 'maton wàa. Saaninage a kòlla ni kpàasum cukti, Jungci Delliya insinage fûuya. 6Fay hîina gbaarra Jungci Delliya ni Yeesu Kristu Nitsaanum worro, 7ngam ha ot kpàa gòyrra ɗèm a ɗàm kpees Fay ni mbâr wàa, ha ot kpàa jàk koyrra tâage gûyrra tâam timgbàri, kà yey dànna gi. 8Yèk yey yèk takundi ɗi. Mi yiɗi, mu gòy kpèw a yèerra jàk ây gi, ngam ha a nit ây goosu di Fay aw ii hak waw a tèerra tèem mbâri. Kà yey dele, mgbaa ge mgbaanji daw da nit ây. 9Amma kpâa a gbusum yèk ray a futnji wosom ây, ni tilètnjum, ni tihàanjum a yèk mgbèngda. Ngam yèk ây gi aw mgbaanji koo jâ ba, jàk ɓa hû go ɗi. 10Sey mu yèew nak kpolo koo nak cuk di nit yey ɗòlnjiri da nit ây kana, a dat maan mu woowa. 11Ngam mu cèngnige, nirri kà yey ire nit mbita jàk maarra, ii kiita a hak wàa. 12Ye gim tèefa Artema koo Ticiku a gin wey, sey mu kîra dàarra a gin mum a Nikopolis. Ngam mi dàne ɓella cot iiy a farra. 13Mgbaanji daw mbâra a dikta wooy waw da Jena nit còycum a yèk kiita gi, ni Apollo, ta jày e âyrra daw ba. 14Ndika a nit ta worro ɗa aw èngni tèerra tèem mbâri, aw hâr mgbaanjum a jàk gayam ây 'nang 'nang, ngam ta aw tâa ɓa hû go ba. 15A nit tâanjum ta mum aw kèbumfarre. Kèbi daw da nit ây yiɗina a goosum di Fay gi. Mbâr wàa e tâanji ni un pî!

will be added

X\