Titus 2

1Amma muy, yèe jàk yey getnji ni yèk kàlnjum takundi gi! 2Gàa da toonji ây, aw tâa ni dànda tèes, aw tâa mbâra a nis nit ây, aw tâa nit hakkilo ây, aw gòy mbâra a goosum, a yiide, a èfta tinîiri ɗa. 3Gàa daw da mâynji kin ây ngaa, aw mbir kà yey gesi a dikri nit ta Fay, ta aw cîinji yèy, aw tâa tinjoorgurum mbàl ba. Sey aw kàlnji yèk mbâra, 4ha aw kàl daw da kin sapri ây, aw yiɗi maa rra waw ni hàm ta waw, 5aw dàn ni hakkilo, aw mòosi hak waw, aw tâa kin tèerra tèem a àay waw, aw tâa kin mbâr ây, aw rak daw tuy da maa rra waw, ngam ta yèk Fay e tâa maasumya ba. 6Hû go mgbèng daw da lor ây ɗa, aw tâa ni hakkilo. 7Muy ngaa, sey mu ir jàk kàlnum da nit ây ni tèem mbâri. Mu kàlnjirre go, yèe ni takundi, ni gòyrra tèes, 8mu yèe ni yèk yey getke, tâa nirri ge kpàaw hàanjum ba gi, ha lawsam e mòo daw da nit yiir ta wey, ngam gaw kpàa yèerra yèk maarra a hak worro ba. 9Gàa daw da sàay ây, aw rak daw tuy da nit ɓèl ta waw a jày pî, aw tâa mbâra a nis waw, ta aw hàanji daw ba, 10ta aw atkiri daw jày da nit ɓèl ta waw ba, amma aw kàlni jàk mbâra a mòorra tèem waw, ngam ha koo a jâ pî aw gòyni yèk Fay èngnin gi, yèk Tooy saanum worro. 11Ngam Fay lòni mbâr wàa getke e saani nit ây pî, 12ye tâa mbâr maan nàtnarre ha ot hàw tèem yey tâa ti diknji ni yèk Fay ba, ot hàw jàk gayrum nit kparri ây, ha ot dik ni hakkilo, ni gòyrra ɗèm, ot tolu di Fay a mgbàr yey, 13ha ot waa ni jàk dànda kâwrriya a unji yey ge lòrra 'mita Fak ɓèl, ni Yeesu Kristu Nitsaanum worro gi. 14Yeesu gi hîi hak wàa ngam worro, ha e sàasina a tèem makta pî, ha e ɓetkinina, ot tâa yòot nit ta wàa, ot rîi kpèw a tèem mbâri. 15Sey mu kàl yèk ây gi, mu mgbènggi daw da nit kimjum ây, mu yèe daw ni kpèw kpèw. Ta mu woo koo wuna e luusum ba.

will be added

X\