Ni-Roma ây 9

1Takundi gàami, miy mi nit 'mèmsum ɗi ni Kristu, mi rèengde rèeng ba. Ɗànjum tinîir mum seedimde ni Jungci Delliya, kàlimde hû go ɗa, 2nge mi dii ni ngòlnji dèy, àyrra ti suumde a tinîir mum ba. 3Ngam mi yiɗi ngin, miy ni hak mum mi tâa lètiya mi ɗòlnji ni Kristu, mba ge mgbaanji daw go ngin kà yey da kor ta mum tâage yòot kpolo ni miy, ha aw saa. 4Aw tâage yòot ni-Israyel ây, nîir waw a hàm ta Fay ɗi. Fay lòni ɗa 'mita wàa a tîim waw, aw dii ni yèk wasta wàa, ni yèk mgbèngda wàa, ni ot daprum a ɗàm kpees wàa, ni yèk ây a yèk mòonjum kàn ɗa. 5Aw a hàm ta wosom ây ɗi diga Abraham, ni Isak, ni Yakob. Kristu ɗa lòrre a yòot waw ni isi, nit yey tâage hay a jày pî. 'Mita e tâaw di Fay tâam timgbàri! Amen. 6Gim gàa, yèk Fay yèe nà a hak waw gi ir jàk ɓa hû go ba. Ngam ti tâa aw pî 'naasin daw ni-Israyel ây, tâage ni-Israyel ây takundi ba. 7Koo ye tâa aw a yòot ta Abraham ɗi gi, aw pî aw tâa hàm ta wàa takundi ba. Ngam gàa a defterre Fay: Sey a hàm ta Isak gim 'naasi yòot wey. 8Yèk yey yiɗi gàarra, ti tâa a hàm ây a kpàarra ni isi tâage hàm ta Fay ba. Amma a hàm ây kpàan daw a yèk mòonjum kàn gi, daw gaw sak yòot wàa takundi. 9Ngam kà yey gàa yèk mòonjum kàn nà: A dat yeri kpolo kà mgbàr yey gàami gi i gim ira, Sara kpàa ge kpàa hàm nihun. 10Ti tâa kà yey ni hàm wàa di Sara gbè ba, amma ni hàm ta wàa di Rebeka ɗa kpàage fûri ni Isak wosom worro gi. 11A ye tâa ɗa a hàm ta wàa aw kpàa ba, aw ɗà aw tèe jàk mbâri koo jàk makta ba, Fay de gbèesi dànda wàa de carri daw, 12ngam ha yèk wàa e gòyi, ti tâa ni tèerra tèem ba amma ni 'naasum yey 'naasu Fay di nirri gi, de gàaw di Rebeka: Ɓèlnji tèe ge tèewrra tèem di kaanji. 13Gàarre kà yey a defterre Fay: Mi yiɗu di Yakob, amma mi yiiwrre di Esuwa. 14Ɗo ji got gàa ya? Fay Tooy èca ɗèm ɗi yi? Ti tâa hû go ba sam! 15Ngam gàawe nà di Muusa: Ii gim ii mbâr mum di nit yey yiɗim gi, go gim gobu ni 'maton di nit yey yiɗim gi ɗa. 16Hû go to Fay carru go di nirri, ti tâa ni yiɗum wàa di nirri koo ni wet wàa ba, amma ni 'maton Fay ɗi. 17A defterre, Fay gàawe nà di Farong: Mi iimi wûun, ngam ha mi kàlni mbinum mum a gin wey, ha nîir mum e yeski a deesi lang. 18Hû go Fay gopɗe 'maton di nit yey yiɗe gi, ndèksurre tinîiri di nit yey yiɗe gi. 19A yèk yey gum gàam: To tâa go kà yey, Fay kà ge yèe daw bak da nit ây gi ya? Wun ge njang jày yiɗe Fay gi ya? 20Mu nirri, mu wun ɗi ha mu hàanju di Fay ya? Taang kà ge gàaw di kin yey mbangsu gi «ngam jâ jâam dim kà yey» ya? 21Di kin jâarra ti jâam orri cenu, ha e jâa ni mûta bàan kpolo taang delliya koo taang kana hû go ngam dukta jày ba yi? 22Kà gum gàa a hak Fay gi ya? Ngam koo ye tâa yiɗi ngin e kàlni ngòlnji wàa, e cèngnini mbinum wàa gi, de èfe tinîir wàa dèy a gin nit ây gese aw kpàa kiita ngòlnji wàa aw gbee gi, 23ha e kàlnina kày tâa gbaarra 'mita wàa dot nit ây kpàage 'maton wàa, dot nit ây ɗàana mbangsum ngam 'mita wàa, 24dot nit ây 'naasina gi, ti tâa a tîim ni-Yude ây gbè ba, amma a tîim nit ây èege nà yèk wàa gi ɗa. 25Gàa kà yey a defterre Hoseya: 'Naa gim 'naasi daw nit ta mum da nit ây tâa nà aw tâa nit ta mum ba. 'Naa gim 'naasi daw nit yiɗum ta mum da nit ây tâa nà mi yiɗi daw ba. 26A gin gàan daw nà «un tâa nit ta Fay ba», a farra 'naa gaw 'naasi daw hàm ta Fak beengiya. 27Isaya bime nà a hak ni-Israyel ây, gàa: Koo ye tâa sakri ni-Israyel ây dii kà kaksoori a cewci sòo ɓèl, sey a nit ây càa gaw saa gbè. 28Ngam Tooy Ɓèl gbèe ge gbèesi tèem wàa pî yaale a deesi, kà yey gàa yèk wàa. 29Tâa kà yey ɗàana gàarra Isaya nà: To Tooy Ɓèl Tooy mbinum a jàk ây pî woona go ngin hàm ây ba, tâa got tâa ngin kà riiy Sodom, rèe got rèenji ngin ni riiy Gomorra. 30Ji got gàa bak ya? A nit ây èege nà yèk Fay, tâa aw kàm gòyrra ɗèm ba, aw kpàa gòyrra ɗèm kà gàarra ɗèm yey tâage ni goosum gi. 31Amma a ni-Israyel ây kàmge nà gòyrra ɗèm ni tèem yèk mgbèngda gi, aw kpèt a jày gàa yèk mgbèngda waw ba. 32Ngam ji rri ya? Ngam aw kàm gòyrra ɗèm a ɗàm kpees Fay ni goosum ba, amma ni tèem yèk mgbèngda. Aw mgbòle a gòok timgbòlnji, 33kà yey gàa a defterre Fay: E rri yey mi iirre gòok timgbòlnji, ni kpata yaanum a Siyona. Nit yey goosu gi, lawsam ge mòow ba.

will be added

X\