Ni-Roma ây 5

1Ye tâa ot kpàa gòyrra ɗèm ni goosum, tâam mbâri diina ni Fay ngam Yeesu Kristu Nitcoorra worro. 2Ni ey kpàana ot lekta a mbâr Fay ni goosum. Ot gòyrre a mbâr maan, ot kâwsirre tinîiri a jàk dànda worro iina a 'mita Fay gi. 3Ot kâwsi tinîiri a jàk yey gbè ba, amma a riirra 'màar worro ɗa, ngam ot cèngni, riirra 'màari 'maararre èfta tinîiri, 4èfta tinîiri 'maararre gòyrra mbâra, gòyrra mbâra ngaa 'maararre jàk dànda. 5Jàk dànda ge mòosina lawsam ba, ngam yiide Fay lege a tinîir worro ye hîina Jungci Delliya gi. 6Ngam a ye tâana nà bak dàngdiya a jàk maarra gi, Kristu wurre yèk nit ây hàanju di Fay a mgbàr yey gòyni gi. 7Kpâa dèy ha nirri kpolo e wut ngam nit gòyrra ɗèm gi. Mba ngam nit mbâra nirri ge tol wuta ba. 8Amma Fay lònage yiide wàa a gin worro, ngam ye tâana nà ot nit mbita jàk maarra ây ɗi gi, Kristu wurre ngam worro. 9Ye tâa ot kpàa gòyrra ɗèm ni njîim wurra wàa, sakko saa ge saanina a ngòlnji Fay ɗa. 10Ye tâa Fay raknjisi ni orro ni yèk wurra Hàm wàa, a mgbàr yey tâana nà nit yiir ta wàa gi, sakko kòsòng ye tâana raknjusumya ni ey, saa got saa ni jungci Hàm wàa. 11Ti gbèe ni raknjusum gbè ba, amma ot kâwsirre ɗa tinîiri a gin Fay yèk Yeesu Kristu Nitcoorra worro, nit yey hîigina kòsòng raknjum ni Fay gi. 12Jàk maarra lege a kparri yèk nirri kpolo, nîir wàa Adam. Jàk maarra gi 'maara wurra. Hû go wurra yeskige a gin nit ây pî, ngam aw pî aw mbire jàk maarra. 13Ɗoko Fay hîi yèk mgbèngda gi, jàk maarra dii mgban a kparri, amma ti sak jàk maarra gi ba, ye tâa ɗà ti hîi yèk mgbèngda ba. 14Koo hû go, diga Adam ha Muusa, wurra wûuni a hak nit ây, koo ye tâa aw mbir jàk maarra yey rèenji ni woy Adam gi ba. Ey tâage jàk kàlnum nit yey ge dàara gi. 15Amma jàk maarra yey mbire Adam gi, ti rèenji ni hîir Fay hîi a mbâr wàa gi ba. Ngam a nit ây dèy aw wurre yèk jàk maarra nirri kpolo. Amma mbâr Fay tèe jày hòmgu di yey gi, ye tâa hîi gbaarra hîir wàa da nit ây dèy ni nirri kpolo, Yeesu Kristu gi. 16Hîir Fay ɗa 'nangji ni jàk maarra yey mbire nirri kpolo gi. Ngam kiita yey furre jàk maarra nirri kpolo, yaani daw da nit ây pî a kiita. Amma hîir Fay hîigi ngam jàk maarra nit ây dèy gi, 'maara gòyrra ɗèm. 17Ye tâa wurra wûuni a hak nit ây yèk jàk maarra nirri kpolo gi, sakko a nit ây pî kpàage gbaarra mbâr Fay ni hîir gòyrra ɗèm gi, wûu gaw wûuni a gûyrra tâam timgbàri ngam nirri kpolo Yeesu Kristu. 18Ngam maan, kà yey yaani daw jàk maarra nirri kpolo da nit ây pî a kiita, hû go ɗa tèem ɗèm nirri kpolo, Yeesu Kristu gi, gòyni daw ɗèm da nit ây pî ha aw gûyi. 19Kà yey ini daw èca rakta tuk nirri kpolo da nit ây dèy nit mbita jàk maarra gi, hû go ɗa rakta tuk nirri kpolo gòyni dawrre ɗèm da nit ây dèy. 20Yèk mgbèngda lege, ngam ha jàk maarra e iisirra 'mita. Amma a gin yey iisirra jàk maarra 'mita gi, mbâr Fay hòmge 'mita dèy. 21Ngam kà yey wûuni nà jàk maarra ni wurra gi, hû go ɗa mbâr Fay wûunde a gòyrra ɗèm, ha e 'maana a gûyrra tâam timgbàri ni Yeesu Kristu Nitcoorra worro.

will be added

X\