Ni-Roma ây 4

1Ɗo ji got gàa a hak Abraham wosom worro gi ya? 2To Abraham kpàa go ngin gòyrra ɗèm ni tèem wàa gi, râa ge râani ngin hak wàa, amma ge kpàaw râanum a ɗàm kpees Fay ba. 3Ji gàa a defterre gi ya? Gàa: Abraham goosuge di Fay, Fay de sagu nit gòyrra ɗèm. 4Nirri tèe go tèem, gaw rapti bèeb tèem wàa kà jàk hîiri ba, amma jày gesu e kpàa gi ɗi. 5To nirri tèe go jày ba, amma goosu go di Tooy gòynum ɗèm da nit makta ây gi, tâa ge tâa saktiya nit gòyrra ɗèm ɗi ni goosum wàa. 6Kà yey gàa Dawda ɗa, ye yèe yèk kâwum tinîir nit ây sagi daw Fay ɗèm cen raptum tèem waw gi: 7Kâwum tinîiri dii daw da nit ây yaafi daw Fay mamji waw, butkifa daw jàk maarra waw gi. 8Kâwum tinîiri diiw di nit yey tâa Fay Tooy Ɓèl ti sak jàk maarra wàa ba gi. 9Kâwum yey tâa ngam nit rrèpnum ây gbè yi? Koo ngam nit èca rrèpnum ây ɗa yi? Ngam ot gàaye: Fay sagu di Abraham nit gòyrra ɗèm ɗi a goosum wàa. 10Ningàa sagu kà yey ya? A dat yey rrèpni gi yi, koo ye tâa ɗà ti rrèpni ba yi? Ti tâa a dat maan ba, amma ɗoko ye rrèpni gi. 11Kpàa rrèpnum a is wàa kà ticèngsunum a gòyrra ɗèm, ngam goosum yey tâagu mgban ɗoko ye rrèpni gi, ha e tâa tooy nit èca rrèpnum ây pî gaw goosu di Fay gi, aw tâa saktiya nit gòyrra ây ɗèm ɗi kà yey. 12Abraham tâage ɗa tooy nit rrèpnum ây gi, ti tâa kpàage rrèpnum gbè ba, amma futke ɗa a goosum yey tâagu di too worro Abraham, ye tâa nà ɗà rrèpni ba gi. 13Fay yèewe nà yèk mòonjum kàn di Abraham ni hàm ta wàa, gàawe kpàa gaw kpàa kparri kà jàk koyrra waw. Ti yèew yèk maan ngam tèem yèk mgbèngda ba, amma ngam gòye ɗèm ni goosum. 14To a nit ây mòoge yèk mgbèngda kpàage go ngin jàk koyrra gi, goosum tâa ge tâa ngin jàk ɓa hû go, yèk mòonjum kàn ɗa ge mboy ngin nà. 15Ngam yèk mgbèngda 'maararre ngòlnji Fay. A gin tâa yèk mgbèngda cen gi, yewrra a yèk mgbèngda ɗa cen. 16Kà yey sey a nit ây goose gi aw kpàa jàk koyrra. Ngam gesi nà jàk koyrra e tâa hîir Fay ɗi a mbâr wàa, ha yèk mòonjum kàn e gòy ngam hàm ta Abraham pî, tâage hàm ta wàa naa ni yèk mgbèngda gbè amma ni 'mèmsum a goosum wàa gi ɗa. Hû go Abraham tâagina pî too worro, 17kà yey tâa kètiya a defterre Fay, gàa: Mi iim mu tâa tooy yòot nit ây dèy. Hû go ey tâagina too worro a ɗàm kpees Fay, goosuge di Fay Tooy Ɓèl gûysi daw da nit ây a wurra gi, 'naasi di jày tâa ti tâa ba ha e tâa gi. 18Abraham goosu di Fay ni mòorra jàk dànda, koo a gin yey tâa jàk dànda cen ba gi, ngam ha e ir tooy yòot nit ây dèy, kà yey gàaw Fay: Hû go ge tâa mûsa yòot ta wey. 19A mgbàr maan dii ni yeri ji ge ii temèrre, rapti is wàa wàrfige, faat kpàani hàm di kin wàa Sara ɗa wurre. Amma koo hû go ti loo a goosum wàa ba. 20Ti hàanji ni èca goosum a yèk yey yèew Fay ni yèk mòonjum kàn gi ba, amma goosum wàa kpèwsuge, de 'misi nîir Fay. 21Suuwe mbâra, nge jàk yey yèe Fay ni yèk mòonjum kàn gi, ge mbin tèerra ɗa. 22Ngam maan Fay de sagu nit gòyrra ɗèm ɗi. 23Ye gàa «sagu nit gòyrra ɗèm» gi, ti tâa ngam hak wàa gbè ba, 24amma gàarre ngam worro ɗa, dot nit ây got kpàa gòyrra ɗèm a ɗàm kpees Fay, ot nit ây goosu di Fay Tooy gûysum di Yeesu Nitcoorra worro a wurra gi. 25Ngam hîiwe e wut yèk jàk maarra worro, gûysu ha ot kpàa gòyrra ɗèm.

will be added

X\