Ni-Roma ây 2

1Ngam maan mu nit yey hiiti daw da nit ây kana, koo mu wun ɗi ya, gum kpàaw hàanjum yèk wey ba. Ngam a jày hiitum di nit kana, muy ngaa mu yaanirre hak wey a kiita, ye tâa muy ɗa mu mbitɗe kà ey gi. 2Ot cèngni, Fay hii ge hiiti daw ni yèk takundi da nit ây mbirge jàk ây gi. 3Mu nit yey hiiti daw da nit ây mbirge jàk ây gi, amma muy ɗa mu mbitɗe kà aw, mu dànde gum yâa a kiita Fay gi yi? 4Koo mu luusirre gbaarra mgbergum Fay, ni woorra wàa, ni èfta tinîir wàa gi? Mu cèngni, nge mgbergum Fay 'maamde a inum tinîiri ba yi? 5Amma ye tâa mu dii ni tinîir ndèktiya, mu hàwrre inum tinîir wey gi, mu kimjirre ngòlnji Fay a hak wey ha unji ngòlnji wàa, a ye ge lòrra kiita wàa ɗèm gi. 6Ey kà ge kànsu koo di wuna kày tâa tèem wàa. 7Hîi ge hîi gûyrra tâam timgbàri da nit ây futke tèerra tèem mbâri, kàmge 'mita, ni coorra, ni jungci yey tâa ge lòo ba gi. 8Amma ii ge ii ngòlnji wàa ngaktiya da nit ây hàanje, hàwge rakta tuy a yèk takundi, rake tuy a tèem makta gi. 9'Màari ni jàk àyrriya kpè ge kpèt daw da nit ây pî tèege jàk makta, màrra da ni-Yude ây, a dat maan ɗa da yòot ni-riiy ây kana. 10Amma 'mita, ni coorra, ni tâam mbâri tâa ge tâa daw da nit ây pî tèege tèem mbâri, màrra da ni-Yude ây, a dat maan ɗa da yòot ni-riiy ây kana. 11Ngam Fay ti raptirre nis nit ây 'nang 'nang ba. 12A nit ây pî tèege jàk maarra a èca cèngnum yèk mgbèngda gi, gbee gaw gbee ɗa a èca cèngnum yèk mgbèngda. A nit ây pî tèege jàk maarra a cèngnum yèk mgbèngda, kpàa gaw kpàa kiita ni yèk mgbèngda. 13Ngam ti tâa a nit ây rake gbè yèk mgbèngda, tâage nit gòyrra ây ɗèm a ɗàm kpees Fay ba, amma a nit ây tèege jày gàa yèk mgbèngda gi. 14To a nit ây èege yèk Fay ni yèk mgbèngda, aw tèerre go ni hakkilo waw jày gàa yèk mgbèngda gi, aw mbangsirre yèk mgbèngda ngam hak waw. 15Kà yey aw kàlnirre, tèem yèk mgbèngda kètiya ɗi a tinîir waw. Dànjum tinîir waw ɗa kàlnirre kà yey, ye tâa dànda waw yèe dawrre koo suusi dawrre. 16Dànjum waw gi lò ge lòt a unji yey ge hiiti Fay ni Yeesu Kristu jày fûuge pî a tinîir nit ây, kà yey gàa Yèk Kâwrra sakmi gi. 17Amma muy mu nit yey înge hak wey mu ni-Yude ɗi gi, mu gòyrre mu wuysirre a yèk mgbèngda, mu râanirre ngam Fak wey. 18Mu cèngni jày yiɗi Fay, yèk mgbèngda ɗa kàlnjumde ha mu ɗòlnji jàk mbâri ni jày tâa ti diknji ba. 19Mu gàarre ni hak wey muy mu nit nàta râay ây ɗi, mu kayang ɗi da nit ây tâage a kulpi, 20mu nit mgbèngda ɗi da nit ây tâa aw cèngni jày ba, mu nit kàlnjum hàm ây ɗi. A yèk mgbèngda gi mu dii ni jàk kàlnum mbâra a takundi ni cèngnum jày. 21Amma muy mu nit yey kàlnji di nit kana, naa mu woofa kàlnjum hak wey naa? Muy mu nit yey sake di nit kana ta e oo ba, naa mu oorre naa? 22Muy mu nit yey gàage di nit kana, ta e ii njeenu ba, naa muy mu iirre njeenu naa? Mu nit yey yiige jàk mâri, naa mu atɗe jày a àay mâri naa? 23Muy mu nit yey râani ni yèk mgbèngda, naa mu mboysirre 'mita Fay ni yewrra a yèk maan naa? 24Gàarre kà yey a defterre Fay: Ngam yèk wun a nit ây èege yèk Fay aw maasurre nîir wàa. 25Rrèpnum jàk mbâra ɗi, to mu tèenirre go jày gàa yèk mgbèngda gi. Amma to mu yewrre go yèk maan, rrèpnum wey ire mu gàa mu rrèpni ba. 26Amma to nit yey tâa ti rrèpni ba mòorre go jày gàa yèk mgbèngda gi, Fay ge sagu a èca rrèpnum wàa kà nit rrèpnum ba yi? 27Ɗo nit yey tâa ti rrèpni diga kpàarra wàa ba tèerre go jày gàa yèk mgbèngda gi, hii ge hiitum dum ni-Yude yewge a yèk maan, koo ye tâa mu dii ni yèk maan mgban kètiya a defterre, mu rrèpni gi. 28Ngam ni-Yude yey lòni tâam wàa ni isi gbè, tâa ni-Yude takundi ba. Rrèpnum ɗa to lòt go a isi gbè, ti tâa rrèpnum takundi ba. 29Amma to nirri tâa go ni-Yude ni tinîiri, ey tâage ni-Yude takundi. Rrèpnum ɗa to tâa go a tinîiri ni Jungci Fay, e tâage rrèpnum takundi, ti tâa ni yèk kèta a defterre ba. Ni-Yude takundi kpàa ɓòlmum wàa a gin Fay, ti tâa a gin nit ây ba.

will be added

X\