1 Mi lònunurre Foybe kor worro nikin, tèege tèem mgbaanjum da nit kimjum ây tâage a Kenkereya gi, 2 ngam ha un ngoru mbâra ni nîir Nitcoorra, kà yey gesi daw da nit della ta wàa di Fay, un mgbaanju koo a tèem hâ gesu e tèe gi. Ngam ey mgbaanji dawge da nit ây dèy, mgbaanjimge dim ɗa. 3 Kèbin daw da Piriskilla ni Akila, nit ây tèenje ni miy a tèem Yeesu Kristu gi. 4 Aw aw hîi hak waw ngam saanum jungci mum. Yèk maan ti tâa miy gbè gàagi daw mbew ba, amma a nit kimjum ây pî a tîim nit ây èege nà yèk Fay gi ɗa. 5 Kèbin daw ngaa da nit kimjum ây a àay waw. Kèbuwan di Epaynetu nit yey yiɗim, tâage nit màrra a goosum nîir Kristu a dees Asiya gi. 6 Kèbuwan di Mariya, kin yey hàrge dèy a tèerra tèem ngam wun. 7 Kèbin daw da Andaraniku ni Yuniya anga a yòot kpolo ni miy, tâanje nà a kultuma ni miy. Daw aw coo dawrre a tîim nit ây tèe daw Yeesu gi, aw ɗàagim goosum di Kristu. 8 Kèbuwan di Ampiliyatu, nit yiɗum mum a gin Nitcoorra. 9 Kèbuwan di Urbanus, ni tèenjum ni orro a tèem Kristu. Kèbuwan di Estaki nit yey yiɗim gi. 10 Kèbuwan di Apelles nit gòyrra mbâra a gin Kristu. Kèbin daw da nit àay rra wàa di Aristobulu. 11 Kèbuwan di Herodiyon anga a yòot kpolo ni miy. Kèbin daw da nit àay rra wàa di Narkissu, goosu di Nitcoorra gi. 12 Kèbin daw da Tarifayna ni Tarifosa, hàrge tèerra tèem Nitcoorra gi. Kèbuwan di Perside kin yiɗumya, hàrge dèy a tèerra tèem Nitcoorra ɗa. 13 Kèbuwan di Rufu, gòyge mbâra a gin Nitcoorra, ni nuu wàa tâagim ɗa kà nuu mum gi. 14 Kèbin daw da Asinkiritu, ni Felegon, ni Hermes, ni Patoroba, ni Hermas, ni kor goosum ây tâanji ni aw gi. 15 Kèbin daw da Filologus, ni Yuliya, ni Nèriyu ni say wàa, ni Olimpas, ni nit della ta wàa di Fay pî tâanje ni aw gi. 16 Kèpnjin a tîim wun ni tikapni kor goosum ây! A nit ta Kristu kimje gi pî aw kèpfa dunde. 17 Un kor ta mum mi gàanurre, faasin hak wun a gin nit ây 'maarga tilètnjum, iirge timgbòlnji da nit goosum ây ni jàk ây tâa ti getnji ni kàlnjum yey kpàanu un gi ba. Kpâanjin ni aw! 18 Ngam a nit ây gi aw tèerre tèem Kristu Nitcoorra worro ba, amma sey tèem himni waw. Aw rûfnirre tinîir nit ây tâa aw cèngni jày ba, ni yèerra yèk ây kâwrriya, ni delsum yèy. 19 Amma yèk rakta tuk wun di Nitcoorra kpèrre koo u hâ a gin nit ây pî. Hû go tinîir mum kâwimde yèk wun, mi yiɗi un tâa nit còycum ây a tèerra jàk mbâri, un faasi hak wun a jàk makta ha un tâa ɓet ɓet. 20 Fay Fak tâam mbâri nà ge nàmu di Seyɗan yaale a pàal nak wun. Mbâr Yeesu Kristu Nitcoorra worro e tâanji ni un! 21 Timote nit tèenjum ni miy, 'mèmsa ni Lukiyu, ni Yason, ni Sosipataru anga a yòot kpolo ni miy gi aw kèpfa dunde. 22 Tèrtiyu nit kèta ɗerrewol mum kèpfa dunde ɗa ni nîir Nitcoorra. 23 Gayu a gin nit yey cirmi gi, a gin kimjum nit goosum ây pî, kèpfa dunde. Erastu nit waatum bèeb riiy yey, ni Kawartu kor worro ɗa aw kèpfa dunde. ( 24 Nge mbâr Yeesu Kristu Nitcoorra worro e tâanji ni un pî! Amen.) 25 Dàan ot 'misu di Fay tâage ni mbinum e kpèwsunu a goosum wun, ni Yèk Kâwrra yey sagim gi tâage yèk Yeesu Kristu, lòni jày tâage fûurriya diga mgbàr ây dèy hòmge gi, 26 amma kòsòng lòrre a kayang ni defterre ta waw da nit ây lòni yèk Fay, tâa cèngnumya a gin nit dees ây pî kà yey gàa Fak tâam timgbàri gi, ngam ha aw goosu aw ragu tuy. 27 'Mita e tâaw ni Yeesu Kristu tâam timgbàri ha tâam timgbàri di Fay kpolo tâage Fak còycum gi! Amen.
