Ni-Roma ây 15

1Orro ot nit ây tâage kpèw gi, gesina ot mgbaanji daw dàngda waw da nit ây dàngge a goosum, ta ot kàm delsum hak worro ba. 2Sey koo wuna a tîim worro e kàm jày ge delu di nit tâanjum wàa yèk mbâr wàa, ha e mgbaanju dikta ɗàm kpeesi a goosum. 3Ngam Kristu ɗa ti kàm jày ge delu di hak wàa ba. Mbire kà yey tâa kètiya a defterre Fay gi, gàa: Fak mum, tinjàmni nit ây njàmrum aw gi yaa a hak mum. 4Jày pî tâage mgban kètiya a defterre Fay gi, kère ngam e kàlnjina ha ot kpàa jàk dànda a gin Fay ni èfta tinîiri, ni yèk kpèwsum yey hîina defterre wàa gi. 5Nge Fay a gin yey ana èfta tinîiri ni kpèwsum gi, e hîinu tâam mbâra ni raknjum a tîim wun kà yey kàlnunu Yeesu Kristu, 6ha un 'misu di Fay Tooy Yeesu Kristu Nitcoorra worro, ni tinîiri kpolo, ni gûn kpolo! 7Ngam maan ngotnjin a tîim wun, kà yey ngori dun ɗa Kristu ngam e 'misu di Fay gi. 8Amma mi gàarre, Kristu ire nit tèerra tèem mgbaanjum da ni-Yude ây ngam e lòni takundi Fay, ha e gbèesi jàk ây yèe nà Fay ni yèk mòonjum kàn da wosom ta waw gi. 9Dàarage ɗa ngam a nit ây èege nà yèk Fay gi aw kpàaw 'misum di Fay yèk 'maton wàa, kà yey gàa a defterre wàa: Ngam maan 'mi gim 'misum a tîim nit ây èege yèk wey, kâa gim kâani ndûu ni nîir wey. 10Gàarre ɗa: Kâwsin tinîir wun un nit ây èege yèk Fay, 'mèmsa ni nit ta wàa! 11Gàarre bak: 'Misuwan di Tooy Ɓèl, un nit ây pî èege yèk wàa gi! Yòot nit dees ây pî sey aw 'misuwa. 12Isaya ɗa gàa: Yòot Yessa dàa ge dàara, a ge an e wûun daw da nit ây èege yèk Fay, ii gaw ii jàk dànda waw a gin wàa. 13Nge Fay Tooy hîirra jàk dànda gi e mûununu ni kâwum tinîiri, ni tâam mbâri pî a goosum, ha jàk dànda wun e iisirra 'mita ni mbinum Jungci Delliya. 14Un kor ta mum, mi cèngni mbâra a hak wun, un mûu ni mbâri, ni cèngnum jày pî, kpàa gun kpàa un yèenji a tîim wun. 15Mi kèrfa dun yèk ây 'nang 'nang, mi tol koo jâ ba, ngam ha mi ɓaysunu jày cèngnunu diga mgban. Mi mbire ɗa hû go ngam yèk mbâr yey hîim Fay gi, 16ha mi tâa nit tèerra tèem Yeesu Kristu a gin nit ây èege yèk Fay, mi tèerre tèem wàa a Yèk Kâwrra, ngam ha a nit ây èege yèk wàa aw ir jàk gurfum ngotiya a ɗàm kpees wàa, ɓetkumya ni Jungci Delliya. 17Hû go a gin Kristu mi kpàa râanum tèem mum tèemi ngam Fay gi. 18Mi tolle yèerra jàk kana sey jàk yey tèe Kristu ni miy, ngam 'maarra da nit ây èege yèk Fay gi a rakta tuy. Mbire kà yey ni yèerra yèy, ni tèerra tèem, 19ni mbinum jàk lònum ây ni kayeefi ây, ni mbinum Jungci Delliya. Kà yey mi gîre koo a cewci hâ diga Yerusalem ha Illiriku, mi sage Yèk Kâwrra Kristu. 20Mi lekni hak mum a sakta Yèk Kâwrra a gin tâa aw haa rakta nîir Kristu ba, ngam ta mi jâa a gin yey tare nit kana ba, 21amma mi mbire kà yey gàa a defterre Fay: Da nit ây tâa aw sak daw yèk wàa ba, ra gaw rabu. A nit ây tâa aw rak yèk wàa ba, cè gaw cèngnu. 22Jày njanggim dikta a gin wun nak mûsi jày, ngam tèem kà yey. 23Amma kòsòng tèem kana ngasimda a dees ây ay gi ba. Diga yeri mûsi jày un lugim nisi ɗa, mi yiɗi mi difa a gin wun mi rapnu, 24a ye gim dik a Espaniya gi. A dikta maan mi dànde hòmda a gin wun, ha un isnim a farra, a ye gim tâanji ni un unji càa, gim kpàa kâwum a gin wun gi. 25Amma yey gi mi dikɗe a Yerusalem, ha mi tèe tèem ngam nit della ta wàa di Fay tâage a farra gi. 26Ngam del dawge da ni-Makedoniya ây ni ni-Akaya ây, aw kimji seede ngam nit èca ây a tîim nit della ta wàa di Fay tâage a Yerusalem. 27Takundi del dawge kà yey, gesi daw ɗa aw mbit daw jàk mbâri da nit èca ây gi. Ngam to a nit ây èege yèk Fay aw kpàa go jàk mbâri ni Jungci Delliya a gin ni-Yerusalem ây, gesi aw tèe daw ɗa tèem da ni-Yerusalem ây, aw mgbaanji daw a gayam is waw. 28A ye gim gbèesi tèem maan, mi hîi daw go da ni-Yerusalem ây hîir yey kpàama a kimjum seede gi, fu gim futfa ot gin wun a dikta Espaniya. 29Mi cèngni, mi difa go a gin wun gi, 'maa gim 'maafa dun gbaarra mbâr Kristu. 30Un kor ta mum, mi gàanurre ni nîir Yeesu Kristu Nitcoorra worro, ni yiide yey hîi Jungci Delliya gi, 'mèmsin ni miy ot rîi kpèw a waarra Fay ngam mum, 31ha mi saa a kàn nit ây hàwgu rakta tuy di Fay, tâage a dees Yude, ngam ha mi kpàa tèerra tèem mgbaanjum mum a gin nit della ta wàa di Fay tâage a Yerusalem, tèem maan ɗa e tâa ngotiya a gin waw. 32Kà yey kpàa gim kpàafa kpèta a gin wun ni kâwum tinîiri, mi wuysi ɗa a gin wun, to Fay yiɗi go gi. 33Fay Fak tâam mbâri e tâanji ni un pî! Amen.

will be added

X\