Ni-Roma ây 14

1Ngoruwan di nit yey dàngge a goosum di Fay gi, cen yèenjum a jàk dànda wàa. 2Ngam nit kpolo dii ni goosum ha e rii jày pî, amma nit yey dàngge a goosum gi, ge rii sey wasnàam gbè. 3Nit yey riige jày pî gi, ta e luusu di nit yey tâa ti rii jày pî ba. Nit yey tâa ti rii jày pî ba, ta e hiitu di nit yey riige jày pî gi, ngam Fay ngoruge. 4Muy mu wun ɗi, ha mu hiitu di lor nit ɓèl kana ya? Ngam gòyrra wàa koo yaarra wàa a gin nit ɓèl wàa tâaye. Amma ey gò ge gòyi, ngam Nitcoorra dii ni mbinum e gòynuwa. 5Nit kpolo dàni, a unji ây kana aw hòm daw 'mita da unji ây kana. Nit kana ɗa dànde, a unji ây pî aw getnji kpolo. Sey koo wuna e cèngsi jàk dànda wàa a yèk maan. 6Nit yey rapti unji kana hòmu 'mita di unji kana gi, mbitɗe kà yey ngam coonum di Nitcoorra. Nit yey riige jày pî gi, riiye ngam Nitcoorra, ye tâa gàawrre mbew di Fay ngam maan. Nit yey tâa ti rii jày pî ba, woofa riirra ngam Nitcoorra, ye tâa ey ɗa gàawrre mbew di Fay. 7Ngam cen nirri kpolo a tîim worro ge gûy ngam hak wàa ba. Cen nirri ge wut ngam hak wàa ba. 8Ot gûyrre go, ngam Nitcoorra gûyna. Ot wutɗe go, ngam Nitcoorra wutna. Hû go koo ot gûyrre go, koo ot wutɗe go, orro ot nit ta Nitcoorra ɗi. 9Ngam Kristu wurre, gûysige, ha e tâa Nitcoorra waw da nit ây wutke gi ni nit ây gûyge gi. 10Amma muy, ngam ji hiitumu di kor wey ya? Muy ɗa, ngam ji luusumu di kor wey ya? Orro pî gò got gòy a ɗàm kpees Fay a gbaat kiita wàa. 11Ngam dii kètiya a defterre Fay: Miy mi Tooy Ɓèl mi gàarre a jungci mum, takundi a nit ây pî gbâ gaw gbâygi a ɗàm kpees mum, mgbelyèk nit ây pî 'mi gaw 'misi nîir mum. 12Kà yey koo wuna a tîim worro goo ge goosi yèk hak wàa a ɗàm kpees Fay. 13Hû go ta ot hiitinji bak a tîim worro ba. Amma ndika un gbèesi dànda wun a yèk yey, ta un iiw timgbòlnji ni gin yaarra di kor wun ba. 14A gin Nitcoorra mi cèngni mbâra, cen jày tâage 'miskumya ni hak wàa ba. Sey to nirri raptu go di jàk maan kà jàk 'miskumya gi, jàk 'miskumya ɗi ngam wàa. 15To mu àysu go tinîiri di kor wey yèk tiriit yey riim gi, mu woofage tèerra ni yiide. Ta mu gbeesu di nit yey wurre Kristu ngam wàa gi ba. 16Ta mu woow di nirri e maasum a jàk yey tâagum jàk mbâra ba. 17Ngam wûun Fay ti tâa ni riirra tiriici koo ni njoorra jàk njoorra ba, amma gòyrra ɗèm ɗi, ni tâam mbâri, ni kâwum tinîiri hîi Jungci Delliya gi. 18Nit yey tèege tèem ngam Kristu kà yey gi, delu di Fay, dii mbâra ɗa a nis nit ây. 19Hû go dàan ot kàm tâam mbâri, ni jày ge mgbaanjina a tîim worro a goosum gi. 20Ta mu mboysifa tèem Fay ni yèk tiriici ba. A tiriit ây pî dele ngam riirra, amma jàk makta ɗi to nirri iiw go timgbòlnji di kor wàa yèk riirra tiriit kana. 21Kà yey hòme della to mu woofa go riirra jooci ni njoorra mbàl, ngam ta mu yaanu di kor wey a jàk maarra ba. 22Goosum yey tâagum gi, sey mu mòo ngam hak wey a ɗàm kpees Fay. Kâwum diiw di nit yey tâa ge hiiti hak wàa a jày dàne gi ba. 23Amma to nirri rii go jàk yey hàanje a tinîir wàa gi, yaa mgban a kiita, ngam ey ti tèe ni goosum ba. Amma tèem yey tâa ti ana a goosum ba, jàk maarra ɗi.

will be added

X\