1 Ngam maan un kor ta mum, ye tâa Fay lòni 'maton wàa kà yey gi, hîiwan is ta wun e tâa kà jàk gûurra beengiya, delliya, kâwrriya a ɗàm kpees wàa, e tâage daprum wun takundi ngam wàa. 2 Ta un getnjini hak wun a dikri tâarra yey ba, amma bunjin dànda wun e tâa fûuya, ha un kpàa un gerru di jày yiɗi Fay, un cèngni jày tâage mbâra, delliya, ngotiya a ɗàm kpees wàa gi. 3 Ngam mbâr yey kpàam a gin Fay gi mi gàanurre dun pî, ta koo wuna e dàn yèk hak wàa e hòmu di jày gese gi ba, amma sey e dàn yèk hak wàa kày ge getnji ni goosum yey hîiw Fay gi. 4 Ngam ot dii ni jàk ây dèy a is worro, amma a jàk ây pî a isi gi aw tèerre tèem kpolo ba. 5 Hû go orro ot nit ây dèy ɗi ot tâa kà isi kpolo a gin Kristu, ot 'mèmsi kà jàk ây a isi kpolo. 6 Ot dii ni hîir ây 'nang 'nang, kà yey hîina Fay a mbâr wàa gi. To nirri kpolo kpàa go hîir lònum yèk Fay, sey e lòni kà yey ge getnji ni goosum wàa. 7 To nirri kpàa go hîir tèerra a tèem mgbaanjum, sey e tèe tèem mgbaanjum. To nirri kpàa go hîir kàlnjum, sey e kàlnji. 8 To nirri kpàa go hîir kpèwsunum da nit ây, sey e kpèwsi daw. To nirri kpàa go hîirra hîir ây, sey e tèe cen dànjusum. Nit yey tâage tiɗàm kpeesi, sey e rîi kpèw a tèem maan. Nit yey tâage nit iirra 'maton, sey e ii 'maton ni tinîir kâwrra. 9 Sey yiide wun e tâa cen tibiw. Yiin tèem makta, un 'mèm a tèem mbâra. 10 Yiɗinjin a tîim wun ni yiide kor ây, coonjin mbâra! 11 Rîin kpèw a jày pî ta un loo ba, tâan hèmdiya a tinîiri ni Jungci Delliya, tèen tèem Nitcoorra! 12 Kâwsin tinîiri a jàk dànda wun, èfin tinîir wun ɗa a riirra 'màari, mòon waarra Fay, ta un woofa ba! 13 Mgbaanjin daw a gayam waw da nit della ta Fay, furrin ngota niwooy ây koo ningàa! 14 Mbârsin daw da nit ây ɗàagunu ɗàari gi. Mbârsin daw, ta un maasi daw ba. 15 Kâwsinjin tinîir wun ni nit ây kâwse tinîiri gi, umin ni nit ây umge gi! 16 Raknjin a tîim wun! Ta un 'misi hak wun ba, amma 'mèmsin ni nit ây ûuni hay. Ta un dàn ni hak wun nge un còycige gi ba. 17 Ta un kànsu tèem makta di nirri ni tèem makta ba. Kàmin tèerra jày tâage mbâra a ɗàm kpees nit ây pî! 18 To gun kpàaw go, haawan tâanjum mbâra ni nit ây pî! 19 Un nit ây yiɗim dun gi, ta un insi jàk makta ni hak wun ba, amma woofan jàk maan e tâa a kiita ngòlnji Fay. Ngam gàarre a defterre wàa: Miy mi Tooy Ɓèl mi Tooy kànsum kiita ɗi, ji gim jingsu jày di nirri. 20 Gàa bak: To fey àyurra go di nit yiir wey, hîiw tiriici e rii. To sòo ɓòyurre go, hîiw e njoo. Ngam to mu mbitɗe go kà yey gi, mu mòosurre lawsam, mu gàa mu kimjurrarre kîngsum a hak wàa. 21 Ta un woo jàk makta e sunnu ba, amma sunin jàk makta ni mbita jàk mbâri.
