1 Un kor ta mum, mi yiɗi ni tinîir mum pî, ha nit ta mum ni-Israyel ây aw saa, mi waarre Fay ngam waw. 2 Ngam gàa gim gàa a hak waw, aw dii ni rîirra kpèw a ɗàm kpees Fay, amma a rîirra waw kpèw gi aw cèngnu mbâra ba. 3 Ye tâa aw èe cèngnum kày gòyni daw Fay ɗèm da nit ây a ɗàm kpees wàa gi, aw kàmde gòyrra ɗèm ni hak waw. Hû go aw ûuni hak waw a gòynum ɗèm Fay ba. 4 Kristu tâage nit gbèesum jày gàa yèk mgbèngda, ngam ha koo wun goosuwa ge kpàa gòyrra ɗèm a ɗàm kpees Fay. 5 E rri yey jày kère Muusa a yèk gòyrra ɗèm ni yèk mgbèngda gi, gàa: Nit yey tèege jày gàa yèk mgbèngda gi, gû ge gûy ni erra. 6 Amma a yèk gòyrra ɗèm ni goosum, gàarre kà yey: Ta mu gàa a tinîir wey ba: Wun ge naa a faktiturum, ngam e cina Kristu ya? 7 Ta mu gàa ɗa ba: Wun ge cir a gook yengdiya gbèeni cen, ngam e naasa Kristu a tîim nit ây wutke gi ya? 8 Amma ji gàa ya? Gàa: Yèk Fay dii gaarra a gin wey, a mgbelyèk wey ni tinîir wey. Yèk maan tâage yèk goosum yey sakna gi. 9 To mu lònirre go ni mgbelyèk wey nge Yeesu tâage Nitcoorra, mu goosirre go a tinîir wey nge Fay gûysu a wurra gi, saa gum saa. 10 Ngam ni tinîir wàa nirri ge goosi ha e kpàa gòyrra ɗèm. Ni mgbelyèk wàa nirri ge lòni goosum wàa ha e kpàa saarra. 11 Gàa a defterre Fay: Koo wun goosu di Kristu gi, lawsam ge mòow ba. 12 Ngam 'nangjum cen a tîim ni-Yude ây ni yòot ni-riiy ây kana ba. Aw pî aw dii ni Nitcoorra kpolo, hîige gbaarra mbâr wàa koo di wun 'naasu gi. 13 Ngam gàarre a defterre Fay: Koo wun 'naase nîir Nitcoorra ya, kpàa ge kpàa saarra. 14 Amma kà gaw 'naasi nîir Nitcoorra, to aw goosu go ba ya? Kà gaw goosu, to aw rak go yèk wàa ba ya? Kà gaw rak yèk wàa, to nit sakta cen go ba ya? 15 Kà gaw sak yèk maan, to nit tèerriya cen go ba ya? Gàarre a defterre Fay: Ji hòmge della da nak nit ây dike sakta yèk kâwrra gi ya? 16 Amma ti tâa aw pî ngorge Yèk Kâwrra ba. Isaya gàa mgban: Tooy Ɓèl, wun goose a sakta yèk worro ya? 17 Hû go goosum ana a sakta yèy, sakta yèy ngaa ana a yèk Kristu. 18 Ɗo gim gun: Mba ni-Israyel ây aw rak yèk maan ba yi? Oow, aw rage. Ngam gàa a defterre Fay: Gûn nit sakta ây yeski a deesi lang, yèk ta waw kpèrre ha a gbèeni kparri. 19 Gu gim gun bak: Mba ni-Israyel ây aw cèngni yèk maan ba yi? Oow, aw cèngnige, kà yey ɗàa nà gàarra Muusa gi: Aa gim aanjunu ngèeri ni nit ây tâa aw tâa nit ta mum takundi ba. Aa gim aanjunu ngòlnji ni nit ây tâa aw cèngni jày ba. 20 Isaya ɗa ti tol gàarra a yèk yey gàa Fay ba: A nit ây tâa aw kàmim ba, aw kpàame. Mi lòni hak mum a gin nit ây tâa aw gunim ba. 21 Amma a hak ni-Israyel ây gàarre: Unji pî mi patɗe kàn mum mi mgbaasa daw da nit ây hàwge rakta tuy, hàanje gi.
