Ni-Roma ây 1

1Miy mi Pawlu mi sàay Yeesu Kristu ɗi, mi nit yey 'naasim Fay ha mi tâa ni tèerriya, carrim ngam sakta Yèk Kâwrra wàa, 2yey ɗàa nà yèerra ni mòonjum kàn ni mgbelyèk nit lònum ây a defterre wàa delliya gi. 3Yèe yèk maan a hak Yeesu Kristu Hàm wàa, Nitcoorra worro, anga a yòot Dawda a tâam wàa ni isi. 4Amma a tâam wàa ni Jungci Delliya, Fay gûysu a wurra, gòynu ni mbinum e tâa Hàm wàa. 5Ni ey Fay hîina ot tâa nit tèerra ây ngam 'mita nîir wàa, ha ot 'maa daw a goosum ni rakta tuy da nit ây anga koo a dees hâ. 6Un ɗa un 'mèmsi ni aw, ye tâa Fay 'naasunu un tâa nit ta wàa di Yeesu Kristu. 7Mi kèpfa dunde dun nit ây pî tâage a Roma. Fay yiɗunu gi 'naasunu un tâa nit della ta wàa. Nge ey Too worro gi ni Yeesu Kristu Nitcoorra, aw hîinu mbâr waw ni tâam mbâri! 8Màrra mi gàawrre mbew di Fak mum ni nîir Yeesu Kristu ngam wun pî, ye tâa aw yèerre yèk goosum wun a deesi lang. 9Fay Fak yey tèemi ngam wàa ni tinîir mum pî, a sakta Yèk Kâwrra Hàm wàa gi, ey seedimde a hak mum kày ɓaysim dun a waar mum unji pî cen hèntum. 10Mi waawrre koo ningàa, ha e hîim ot mbâra mi difa a gin wun to yiɗi go gi. 11Un lugim nisi ha mi difa mi rapnu, ngam ha mi hîinu hîiri ni Jungci Delliya, mi kpèwsunu, 12kà gàarra ye gim tâa a tîim wun, ot suusinji tinîir worro miy a goosum wun, un ngaa a goosum mum. 13Un kor ta mum, mi yiɗi un cèngni, nge nak mûsi jày mi kàmde orri mi difa a gin wun, ngam ha tèem mum e lòni jàk repta a tîim wun ɗa, kà yey lòni a tîim ni-dees ây kana. Amma ha kòsòng jày njanggimde. 14Ngam gesi mi dik sakta yèk Fay a tîim nit ây pî, a tîim ni-Girèk ây ni ni-riiy ây kana, a tîim nit ây tâage còycumya ni nit ây tâa aw cèngni jày ba. 15Kà yey mi yiɗirre dèy mi difa mi saknu Yèk Kâwrra, dun nit ây tâage a Roma gi ɗa. 16Gim ii lawsam a Yèk Kâwrra gi ba, ngam mbinum Fay ɗi ha e saani daw da nit ây pî goosu gi, màrra da ni-Yude ây, a dat maan da yòot ni-riiy ây kana. 17Ngam Yèk Kâwrra lòni kày gòyni daw Fay ɗèm da nit ây ni goosum. Gòyrra ɗèm maan ana a goosum, 'maarre ɗa a goosum. Gàarre kà yey a defterre wàa: Nit gòyrra ɗèm gû ge gûy ni goosum. 18Fay lòna ngòlnji wàa a gin nit ây pî hàanju gi, tèege tèem makta, butkifa yèk takundi ni tèem makta waw gi. 19Ngam jày ge kpàa nirri e cèngni a gin Fay, dii lòtiya a tîim waw, ngam Fay lòna dawge. 20Koo ye tâa nirri ti rabu di Fay ba, ey dii lòtiya ni tèem wàa diga mbangsum kparri. Hû go a nit ây kpàa gaw kpàa cèngnum mbinum wàa tâam timgbàri, kày tâa ey gi, ha aw tâa cen hàanjum a yèk maan. 21Koo ye tâa aw cèngnu di Fay, aw coow kà yey gesi ba, aw gàaw mbew ba. Amma dànda waw ire jàk ɓa hû go, tinîir waw raya ɗi kupti kulpiya. 22Aw râanirre hak waw aw gàarre aw còycige, amma aw a rak ây ɗi. 23Aw ini 'mita Fay yey tâa ge gbee ba gi ni tirèenjunum nirri ge gbee gi, ni tirèenjunum jooy ây, ni jàk tinak ây, ni jòoy ây. 24Ngam maan Fay woo dawge ɗa aw fut gayam tinîir waw a tèerra tèem 'miskum, ha aw mboynji is waw a tîim waw. 25Aw bunji yèk Fay takundi ni yèk rèeng. Aw coorre aw daprirre di jàk mbangsumya, hòmi di Tooy mbangsum jày pî gese 'mita e tâaw tâam timbàri gi! Amen. 26Kà yey Fay woo dawge ɗa aw fut jàk gayrum yey maage gi. A kin ta waw aw woofa kûunjum ni nihun ây kà yey gesi gi, aw kûunji a tîim waw kà yey tâa ti gesi ba. 27Hû go a nihun ây ɗa aw woofa kûunjum ni nikin ây kà yey gesi gi, aw mòonji ni gayam a tîim waw, ha aw mbitɗe jàk lawsam nihun ni nihun. Aw kpàa mgban kiita a hak waw a gbeerra ot waw. 28Ye tâa ti deli daw aw cèngsu di Fay ba, Fay de woo daw aw fut a dànda waw tâa ti del ba, ha aw tèe jày tâa ti gesi ba. 29Aw mûuni ni tèem yey tâa ti gòy ɗèm ba, ni tèem makta, ni gayrum jàk ây, ni gbokri, ni ngèeri, ni ɓàta nirri, ni tilètnjum, ni tibiw, ni kperrem, ni tiyaynjurum. 30Aw yèerre yèk makta a hak nit ây kana, aw yiiwrre di Fay, aw riisi dawrre 'màari da nit ây, aw 'misirre hak waw, aw râangirre a jàk ta waw, aw mbangsirre tèem makta ây, aw rakɗe tuy da too rra waw ni nuu rra waw ba. 31Aw cèngni koo jâ ba, aw gòy koo a yèk waw ba, aw èe yiide, aw èe 'maton. 32Aw koo ye tâa aw cèngni yèk mgbèngda Fay, nge a nit ây mbirge kà yey gi aw gerre wuta, aw futɗe mbita jàk ây gi, aw ɓòlmirre ɗa da nit ây tèege tèem maan.

will be added

X\