1 Miy mi Pawlu, mi nit yey leknimin a kultuma ngam Yeesu Kristu gi, ni Timote kor worro, ot kèbumfarre Filemon, mu nit yiɗum worro, mu nit tèenjum ni orro. 2 Ot kèpfa dawrre ɗa da nit kimjum ây a àay wey, ni Afiya say worro a goosum, ni Arkippu nit 'mèmsum ni orro a haarra gbàat Fay. 3 Nge Fay Too worro ni Yeesu Kristu Nitcoorra aw hîinu mbâr waw ni tâam mbâri! 4 Mi ɓaysumde, Filemon, a waarra Fay koo ningàa, mi gàawrre mbew di Fak mum. 5 Ngam mi rage yèk goosum wey di Yeesu Nitcoorra, ni yiide wey a gin nit ta Fay pî. 6 Mi waawrre di Fay ngam 'mèmsum wey ni orro a goosum e lòni jày, e iisumda cèngnum jàk mbâri pî kpàana a gin Kristu gi. 7 Kor mum, yiide wey kâwsimde tinîiri dèy, suusimde, ngam mu kpèwsi daw tinîiri da nit ta Fay. 8 Ye tâa mi gòyrre tolnji cen a gin Kristu, orri diimi mi gàamfa jày gese mu mbir gi. 9 Amma yèk yiide, gesi mi waamfa ni waacu. Miy mi Pawlu, mi wàrfi toonji ɗi, kòsòng ɗa aw leknim a kultuma ngam Yeesu Kristu, 10 mi waamde yèk Onesimu, irge hàm mum a nîir Kristu, a ye leknimin a kultuma ay gi. 11 A mgbàr kana ey ti tâam nit mgbaanjum ba, amma kòsòng mgbaa ge mgbaanjumu ni miy ɗa. 12 Hû go mi insufarre di nit yey tâage kà yòot kpolo ni miy, e koyfa a gin wey. 13 Mi yiɗi ngin e tâanji ni miy ay gi, ngam e koyrra a tèem wey e mgbaanjimi, ye tâa aw leknim a kultuma ngam Yèk Kâwrra gi. 14 Amma mi yiɗi mi mbir koo jâ ba, sey to mi gunum go, ngam ta tèem mbâr wey e tâa ni ndakcu ba, sey ni yiide tinîiri. 15 Mba Onesimu de ɗòlnji nà ni muy càa, ngam ha mu kpàasu tâam timgbàri, 16 naa kà sàay, amma ji hòmgu di sàay, kà kor yiɗumya. Ey tâage nit yiɗum mum dèy gi, sakko a gin wey tâa ge tâa nit yiɗum, naa kà sàay gbè amma kà kori a nîir Nitcoorra. 17 Yòo maan to muy ɗa mu dànde go ot 'mèmsi kpolo, ngoruwa kà yey gum ngorim dim. 18 To ey mbirum go jàk maarra, koo mu furrurre go kiri gi, sak jàk maan a hak mum. 19 Miy mi Pawlu miy kèrge yèk yey ni kàn mum, ji gim jinggum ngam wàa. Gim gàa, jungci wey dii kà kiri a gin mum ba. 20 Mi waamde ndògòn, kor mum, mgbaanjim ngam nîir Nitcoorra, suusim tinîir mum kà kori a gin Kristu. 21 Ye tâa mi kèrumfa yèk yey, mi dànde ra gum ragimi. Mi cèngni, mbi gum mbir jày hòmge di jàk yey gunum dum gi. 22 Mbangsimda ara gin kûum, ngam mi dàni, Fay ngo ge ngor waar wun, ha e njelim ay gi, e insimfa a gin wun. 23 Epafaras, nit tâanjum ni miy a kultuma ngam Yeesu Kristu, kèbumfarre, 24 hû go ɗa Marku, ni Aristarku, ni Dema, ni Luka, nit tèenjum ta mum. 25 Mbâr Yeesu Kristu Nitcoorra e tâanji ni un!
