Matta 8

1Yeesu ye cisa a fak gopri, mûsa nit ây dèy de furruwan. 2E rri yey nit rak isi de dàara de gbâyge a ɗàm kpees wàa de gàaw: Nitcoorra, gum kpàam ndòosum to mu yiɗi go. 3Yeesu de parre kàn wàa, de banggurra de gàaw: Mi yiɗige, sey àyci wey e ndòom! Rak isi nà ndòowe di nit maan yaale. 4Yeesu de mgbènggu de gàaw: Raksi mbâra, ta mu sak koo jâ di nirri ba. Amma dik mu kàlni is wey di nit daprum, mu 'maa jàk hîiri kà yey gàa nà Fay a defte Muusa, ngam kàlnum àyci wey ndòoye. 5Yeesu ye lege a Kafernahum, nit ɓèl sooje ây de dàara a gin wàa, de waawa, 6de gàa: Nitcoorra, nit tèem mum kûurre àyci wuta isi a àay, riirre 'màari dèy ni ɓèlla. 7Yeesu de gàaw: Di gim difa mi ndòosuwa. 8De goosi de gàaw: Nitcoorra, mi get ha mu lek a àay mum ba. Amma yèe yèy kpolo gbè, àyci wàa di nit tèem mum ndòo ge ndòowa. 9Ngam miy mi dii a kàn nit ɓèl kana, mi dii ɗa ni sooje ây a kàn mum. Mi gàaw go di nirri «digi», di ge digi. Mi gàaw go di nit kana «dàara», dàa ge dàara. Mi gàaw go di nit tèem mum «tèe jàk yey gi», tèe ge tèe hû go. 10Yeesu ye rage yèk maan, de tâaw 'nang, de gàa daw da nit ây futku gi: Takundi mi gàanurre, koo a tîim ni-Israyel ây mi haa kpàarra goosum kà yey a tinîir nirri ba! 11Mi gàanurre: A nit ây dèy a gaw ana a ɓani unji ni lekni unji, tâa gaw tâa a wûun Fay a faktiturum, aw rii tiriici ni Abraham, ni Isak, ni Yakob. 12Amma da nit ây gaw tâa ngin nà a wûun Fay, 'mà gaw 'màktifa daw a tuma kulpi a gbaa, a gin tâa umda rîsim ni riisum temgi. 13Yeesu de gàaw di nit ɓèl sooje ây: Koyi, e mbirum kà yey tâa goosum wey! Ayci ndòowe di nit tèem wàa nà a saa'i maan. 14Yeesu de dige a àay Piyèr. De kpàaw sàr wàa kûurre àyci mâarra isi. 15Yeesu de mòow a kàn, àyci wàa ndòowe. De ana e kàmurra tiriici di Yeesu. 16Ye cii mbona, de 'maaran a gin Yeesu nit ây dèy tâage ni tindòom makta ây. De yuuni daw da tindòom ây ni yèk wàa, de ndòosi daw da nit àyci ây pî. 17Mbire hû go ngam ha e gbèe jày gàa nà Isaya nit lònum yèk Fay: Ey atfage àyci worro, toge 'màar worro. 18Yeesu ye rabe a nit ây aw mûu dèy a cewci wàa, de gàa daw da lor ta wàa aw yewnu a taga kana a sòo ɓèl. 19Nit còycum kana de hèewrra de gàaw: Nitkàlnjum, mi yiɗi mi furrum a gin gum dik lang. 20Yeesu de gàaw: A gbaw ây aw dii ni gook ây, a jooy ây aw dii ni àay rra waw. Amma Hàm nirri gin kûunum hak wàa cenu ba. 21Nit kana a tîim lor ta wàa de gàaw: Nitcoorra, woom mi ir mi sipta too mum ɗà. 22Yeesu de gàaw: Furrimi! Woo daw da nit wuta ây aw sipti wurra waw. 23Yeesu de lege a koombowal. A lor ta wàa de furru wan aw diknji ni ey. 24E rri yey hiski ɓèl anage a sòo, de gîira sòo dèy a koombowal. Amma Yeesu ey kûurre. 25A lor ta wàa de hèewrran aw mûysuwa, de gàan: Nitcoorra, saanina, ot gàarre ot gbee! 26De gàa daw: Ngam jâ tolnu ya un nit èca goosum ây gi? De ane de kpânu di hiski ni sòo ɗa. Jày pî tâaye baak baak. 27De tâa daw 'nang da nit ây, de gàan: Nit yey nit ji rri ya? Ngam koo hiski ni sòo aw raguge. 28Yeesu ye kpèrre a taga sòo ɓèl a dees ni-Gadareni ây, de kpàanjin ni nit tindòom ây cuk a gook geb ây. Aw dii kà jàk nûr ây, ha a nit ây aw tol dawrre, aw kpàawrre hòmda a ot maan ba. 29De bimin de gàan: Mu Hàm Fay gi, ji tâanjina ni muy ya? Mu dàara ay gi ha mu riisina 'màari diga unji worro ɗà kpèrra ba yi? 30Mûsa gicim ây dèy aw dii a farra kpâarra càa, aw faarre. 31A tindòom makta ây nà de waawan di Yeesu de gàawan: To mu yuunina go, tèena ot dik ot lek a mûsa gicim ây gi. 32De gàa daw: Digin! De yuun a gin nit ây cuk nà, de digin aw lek a gin gicim ây nà gi. E rri yey mûsa gicim ây pî de lamin a kpàang gopri, de yaan a sòo ɓèl, de wutkin a farra. 33A hàm faat gicim ây de 'nòon a riiy ɓèl, de sagin da nit ây pî yèk nit tindòom ây cuk nà. 34A ni-riiy maan pî de yuun aw dàara a gin Yeesu. Ye rabuwan gi, de waawan e yuu a dees waw.

will be added

X\