Matta 7

1Ta un hiiti da nit ây kana ba, ngam ta Fay e hiitunu ba. 2Ngam ni kiita yey hiitunu da nit ây kana, ni erra Fay ge hiitunu ɗa. Ni tigeni yey genunu da nit ây kana, ni erra Fay ge getnunu ɗa. 3Ngam jâ raptum pòong a nis kor wey, amma mu rap ɓulnji a nis wey ba ya? 4Kà gum gàaw di kor wey «woo mi yuunumfa pòong a nis wey», amma muy mu rap ɓulnji a nis wey ba ya? 5Mu nit tibiw ɗi, yuuni ɗà màrra ɓulnji a nis wey, ha mu rap mbâra, mu yuunufa pòong a nis kor wey gi! 6Ta un hîi jàk delliya da dun ây, ha aw ira aw numnu ba. Ta un 'màkti tiɗoon wun da gicim ây, ha aw nafnjifa ba. 7Waan Fay, hîi ge hîinu. Kàmin, kpàa gun kpàa. Gàan «mi lekfarre», faa ge faarunu nin. 8Ngam koo wun waage ya, ngo ge ngori. Nit yey kàmge gi, kpàa ge kpàa. Nit yey gàage «mi lekfarre» gi, nin faa ge faaruwa. 9Wun ɗi a tîim wun, to hàm wàa waaw go tàarri, hîi ge hîiw gòoy yi? 10Koo waaw go cîici, hîi ge hîiw jòoy yi? 11To un nit ây tâage maktiya, un cèngni go hîirra jàk mbâra da hàm ta wun, sakko kà tâa Too wun a faktiturum tâa ge hîi jàk mbâri da nit ây waagu gi ba ya? 12Jày yiɗunu pî a nit ây aw mbitnu gi, un ɗa mbirin daw hû go. Ngam kà yey gàa yèk mgbèngda Muusa, ni defterre nit lònum ây. 13Legin a nin luurriya! Ngam nin tâage wàrngumya, ot maan ɗa kpàklige ge 'maa a gin gbeerra, a nit ây dèy aw lekɗe a farra. 14Ngam nin tâage luurriya, orri ɗa mbèerrige ge 'maa a gin gûyrra gi, a nit ây càa gaw kpàa a farra. 15Faasin hak wun a gin nit ây lòni yèk rèeng, rèenjini hak waw kà mgbâay ây gi, amma a mîis tinîir waw a jàk timòorgum ây ɗi. 16Cè gun cèngni daw a repta waw. Nirri ge hap nîirra timgbokcum a cikci yi, koo nîirra jâaci a kari yi? 17Koo futifak hâ tâage futifak mbâra re ge rep jàk nîirra mbâra. Amma futifak makta re ge rep jàk nîirra maktiya. 18Hû go futifak mbâra ge kpàaw repta jàk nîirra maktiya ba. Futifak makta ɗa ge kpàaw repta jàk nîirra mbâra ba. 19Koo futifak hâ tâa ti rep jàk nîirra mbâra ba, njaa gaw njaafa aw 'màktufa a ebi. 20Ngam maan cè gun cèngni daw a repta waw. 21Ti tâa nit ây pî gàagim «Nitcoorra, Nitcoorra» gaw lek a wûun Fay a faktiturum ba, amma sey nit ây tèege jày yiɗi Too mum tâage a faktiturum gi. 22A unji gbèeni a nit ây dèy gàa gaw gàami: Nitcoorra, Nitcoorra, ot lòni yèk Fay ni nîir wey ba yi, ot yuuni tindòom ây ni nîir wey ba yi, ot tèe jàk kayeefi ây dèy ni nîir wey ba yi? 23Gàa gim gàa daw: Mi haanu cèngnum ba. Hèesin a gin mum un woomi, un nit tèerra tèem èca yèk mgbèngda ɗi! 24Hû go koo wun rake yèk mum, tèege kà yey gàa gi, rèenji ni nit hakkilo jâage àay wàa a kpata. 25Buun ye yaa gi sòo sîiye, hiski ngaa wâaye dèy, de dènggu di àay maan, amma ti yaa ba, ngam tâa jâarriya a kpata. 26Amma koo wun rake yèk mum, tâa ti tèe kà yey gàa yèk maan ba, rèenji ni nit ray jâage àay wàa a kaksoori. 27Buun ye yaa gi sòo sîiye, hiski ngaa wâaye dèy, de mgbewu di àay maan, de yaa tiyaani ɓèl rât. 28Yeesu ye gbèe yèerra yèk ây gi, de naa daw hay da mûsa nit ây a jày kàlnji daw gi. 29Ngam ey kàlnji dawge kà nit yey tâage ni mbinum, ti tâa kà nit còycum ta waw ba.

will be added

X\