Matta 6

1Faasin hak wun, ta un mbir mbâr wun a ɗàm kpees nit ây ngam ha aw raptunu ba. To un mbitɗe go kà yey, gun kpàa bèeb tèem a gin Too wun a faktiturum ba. 2Mu hîirre go hîiri da nit èca ây, ta mu ur kà ti uta a ɗàm kpees wey ba, kà yey mbirin nit tibiw ây a àay gin kimjum ây ni ot ây gi, ngam ha a nit ây aw 'misi daw. Takundi mi gàanurre: Aw aw kpàa bèeb tèem waw mgban. 3Amma to mu hîirre go hîiri gi, ta kor wey e cèngni jày mbirum gi ba, 4ngam ha hîirra hîir wey e tâa fûurriya. Too wey ngaa rapke a gin fûurriya gi, ji ge jinggumu. 5Un waarre go Fay, ta un mbir kà nit tibiw ây ba. Ngam a waarra Fay aw yiɗi gòyrra a àay gin kimjum ây ni jalnji ot ây, ha a nit ây aw rapti daw. Takundi mi gàanurre, aw aw kpàa bèeb tèem waw mgban. 6Amma to muy mu waarre go Fay, lek a ara wey, fanti nin, mu waaw di Too wey tâage a gin fûurriya gi. Too wey ngaa rapke a gin fûurriya gi, ji ge jinggumu. 7A waarra Fay ta un gbaasi yèy kà yey mbirin a nit ây èege yèk Fay ba. Ngam aw dànde, a mûusum yèk waw Fay ra ge ragi daw. 8Ta un mbir kà aw ba! Ngam Fay Too wun cèngnige mgban jày gaygunu ɗoko un ɗà un waaw ba gi. 9E rri yey kày gun waa gi: Too worro tâage a faktiturum, nîir wey e tâa delliya, 10wûun wey e dàara! Jày yiɗum gi e mbir a deesi, kà yey mbire a faktiturum. 11Hîina tiriici ha e getna niyey gi. 12Yaafina jàk maarra worro, kà yey yaafina orro da nit ây mbirgina jàk maarra gi. 13Ta mu leknina a 'màar jàk rûfrum ba, amma saanina a mamji. (Ngam a gin wey dii wûun, ni mbinum, ni 'mita tâam timgbàri. Amen.) 14Ngam to un yaafi daw go jàk maarra waw da nit ây gi, Too wun tâage a faktiturum ɗa yaa ge yaafunu. 15Amma to un yaafi daw go da nit ây ba, Too wun ɗa ge yaafunu jàk maarra wun ba. 16Un coorre go riirra tiriici, ta un gbufnji kà yey mbirin nit tibiw ây ba. Ngam aw womde tiigi waw, ha aw lòni da nit ây aw coorre riirra tiriici. Takundi mi gàanurre, aw kpàa bèeb tèem waw mgban. 17Amma muy mu coorre go riirra tiriici, bòr tiigi wey mu fòogi num a hak wey, 18ngam ta mu lòni da nit ây mu coorre riirra tiriici ba, amma sey di Too wey tâage a gin fûurriya gi. Too wey ngaa rapke a gin fûurriya gi, ji ge jinggumu. 19Ta un kimji bèebi ngam wun a kparri ba. Ngam fûy ni tibarîirri mbo ge mboysifa, oori ngaa pu ge pup e oo. 20Amma iin bèeb wun a faktiturum, a gin tâa fûy ni tibarîirri aw cen ha aw mboysifa ba, a gin tâa a oor ây gaw hèerra aw pup aw oo ba. 21Ngam a gin tâa bèeb wey gi, tinîir wey ɗa a farra ge tâa. 22Nisi tâage kayang a isi. Hû go to nis wey rapɗe go mbâra, is wey lang tâa ge tâa ni kayang. 23Amma to nis wey rapɗe go mbâra ba, is wey lang tâa ge tâa ni kulpi. To kayang a gin wey tâa go kulpiya, kulpi maan yi ge yir dèy. 24Cen nirri ge kpàaw tèerra tèem ngam nit ɓèl ây cuk ba. Ngam yii ge yii di nit kpolo, yi ge yiɗu di nit kana, koo luu ge luusu di nit kpolo, 'mè ge 'mèmsi mbâra ni nit kana. Gun kpàaw tèerra tèem Fay ni tèerra tèem bèebi ɗa cuk ba. 25Ngam maan mi gàanurre: Ta un loosi tinîiri a dànda yèk jungci wun un gàa «ji got rii ya, ji got njoo ya» ba, koo yèk is wun un gàa «ji got mgbap ya» ba. Jungci ge hòmu di tiriici ba yi? Isi ge hòmu di lurra ba yi? 26Raptin daw da jooy ây gîrge a faktiturum gi! Aw còkɗe hèmna ba, aw kimjirre jàk wakli ba, aw dukɗe jày a dooy ba, amma Too wun tâage a faktiturum riisi dawrre. Un gun hòm daw ba yi? 27Wun ɗi a tîim wun, ge kpàaw e iisirra koo unji kpolo a yer wàa ni loca dànda tinîir wàa ya? 28Ngam jâ loosunu tinîir wun a dànda yèk lurra ya? Raptin daw da bista jàk ây kày 'mirrin gi! Aw tèerre tèem ba, aw fetɗe jòmsi ɗa ba. 29Amma mi gàanurre: Koo Salomu ni 'mita wàa lang ti haa mgbapta lurra delge kà bista jàk ây gi ba. 30A bista jàk ây aw gòyrre unji yey, ni ndamji aw uf aw 'màktifa daw a ebi. To Fay delsi dawrre go kà yey, kà tâa ge mgbapsunu dun nit èca goosum ây ba ya? 31Hû go ta un loosi tinîir wun un gàa «ji got rii ya, koo ji got njoo ya, koo ji got mgbap ya» ba. 32Ngam a nit ây èege yèk Fay aw kàmjirre jàk ây gi pî. Too wun tâage a faktiturum cèngni un dii ni gayam jàk ây gi pî. 33Hû go kàmin màrra wûun Fay ni gòyrra ɗèm a gin wàa. A dat maan ii ge iisirra dun jàk ây gi pî. 34Kà yey ta un loosi tinîir wun a dànda yèk ndamji ba, ngam ndamji 'maa ge 'maara loca dànda wàa. Koo unji hâ pî gerre ni 'màar wàa.

will be added

X\