Matta 5

1Yeesu ye rabe mûsa nit ây gi, de naa a gopri, de tâa a farra. A lor ta wàa de dàaran a gin wàa. 2De ɗaa daw kàlnjum yèy de gàa: 3Kâwum tinîiri dii daw da nit ây tâage nit èca a dànda yèk jungci is waw, ngam gin tâam waw dii daw a wûun Fay a faktiturum. 4Kâwum tinîiri dii daw da nit ây umge gi, ngam Fay rûu ge rûusi daw. 5Kâwum tinîiri dii daw da nit ây tâage ni fetkum tinîiri, ngam deesi tâa ge tâa jàk koyrra waw. 6Kâwum tinîiri dii daw da nit ây ày daw fey, ɓòy daw yèk gòyrra ɗèm gi, ngam Fay o ge olsi daw. 7Kâwum tinîiri dii daw da nit ây tâage ni 'maton, ngam Fay go ge gop daw 'maton. 8Kâwum tinîiri dii daw da nit ây tâage ni tinîir ɓet ɓet, ngam ra gaw rabu di Fay. 9Kâwum tinîiri dii daw da nit ây raknjini tâam mbâri gi, ngam Fay 'naa ge 'naasi daw hàm ta wàa. 10Kâwum tinîiri dii daw da nit ây ɗàan daw ɗàari yèk gòyrra ɗèm gi, ngam gin tâam waw dii daw a wûun Fay a faktiturum. 11Kâwsin tinîir wun, to a nit ây aw lètnu go, aw ɗàanu go ɗàari, aw rèengnu go koo ni yèk makta hâ a hak wun ngam mum gi. 12Kâwsin delsin tinîir wun, ngam bèeb tèem wun diinu dèy a faktiturum. Da nit ây lòni yèk Fay ɗaagunu mgban gi, daw ɗa aw ɗàa daw nà ɗàari kà yey. 13Un un tâage kà sama a kparri. Amma to sama gbeesi go ngangji wàa, ni jâ gaw ngaksusu ya? Ge tèe koo jâ ba, sey 'màktum u gbaa, a nit ây aw nafnjifa. 14Un tâage kà kayang a kparri. Riiy yey jâan a fak gopri ge kpàaw fûurra ba. 15Nirri ge mòosi ebi a pittirla e ii a mîis taang ba, amma ii ge ii njet a gin iirra pittirla, ha e kayngi da nit ây pî tâage a àay. 16Woon kayang wun e kayngi a ɗàm kpees nit ây, ngam ha aw rap tèem wun mbâriya, aw 'misu di Too wun tâage a faktiturum gi. 17Yeesu de gàa daw bak: Ta un dàn, mi dàarage ngam mi njelfa yèk mgbèngda koo yèk nit lònum ây ba. Mi dàara ngam mi njelfa ba, amma ngam mi kpèwsi yèk maan. 18Takundi mi gàanurre: Ɗoko faktiturum ni deesi e lòo gi, hàm jàk kèta koo kpolo a yèk mgbèngda ge lòo ba, sey to jày pî gbèe go gi. 19Hû go nit yey atnjifa koo yèy kpolo a jày hòmge luurra a yèk mgbèngda, kàlnji ɗa da nit ây kà yey gi, 'naa gaw 'naasu nit hòmda luurra a wûun Fay a faktiturum. Amma nit yey tèege kà yey gàa yèk mgbèngda, kàlnji ɗa da nit ây aw goosi yèk maan gi, 'naa gaw 'naasu nit hòmda 'mita a wûun Fay a faktiturum. 20Miy mi gàanurre: To gòyrra ɗèm wun hòmu go di gòyrra ɗèm waw da nit còycum ta wun ni ni-Farisa ây ba, gun lek a wûun Fay a faktiturum ba sam. 21Un rage, aw gàa daw da wosom ta wun: Ta mu ɓàr nirri ba. Nit yey ɓàrge nirri gi, le ge lek kiita. 22Amma miy mi gàanurre: Koo wun ange ni ngòlòm a gin kor wàa ya, le ge lek kiita. Koo wun gàage di kor wàa «mu ray ɗi», le ge lek kiita nit ɓèl raknjum ây. Koo wun gàage di kor wàa «mu tidoogum ɗi», le ge lek a eb ɓèl. 23Hû go to mu 'maarre go jàk hîiri di Fay a gin gûurra jàk gurfum, mu ɓaysi go a farra, kor wey dii ni yèk kana a hak wey, 24woofa jàk hîir wey a ɗàm kpees gin gûurra jàk gurfum, dik ɗà mu raknjasa ni kor wey, a dat maan mu ira mu hîi jàk hîir wey. 25Mu diknjirre go ni nit lètnjum wey a àay kiita, raknji ni ey kènu ye tâa un futnjirre a orri gi, ngam ta e hîim a kàn nit hiitum ba, nit hiitum ngaa e hîim a kàn sooje ba, ha ey ngaa e leknum a kultuma ba. 26Takundi mi gàamde, gum yuu a farra ba sam, sey to mu jing go jàk maan pî ha a dalla gbèeni. 27Un rage, yèk mgbèngda gàa: Ta mu ii njeenu ba. 28Amma miy mi gàanurre: Koo wun raptu di kin nit kana ha gayam mòow gi, ii njeenu mgban ni ey a mîis tinîir wàa. 29Hû go to nis riina wey leknum go a jàk maarra, hòlfa mu 'màktifa. Ngam hò ge hòmum della jày kpolo a is wey e gbee, ni is wey lang aw 'màktum a eb ɓèl gi. 30To kàn riina wey leknum go a jàk maarra, njaafa mu 'màktifa. Ngam hò ge hòmum della jày kpolo a is wey e gbee, ni is wey lang aw 'màktum a eb ɓèl gi. 31Yèk mgbèngda gàa ɗa: Nit yey mànge kin wàa, sey e hîiw ɗerrewol tiɗòlnjunum. 32Amma miy mi gàanurre: Koo wun màngifa kin wàa, sonaa kin maan tâa go tigîtnjum, iiwe tikàm toonji to dik go di nit kana. Nit yey atke ɗa kin màndiya, ire tikàm kin. 33Un rage, aw gàa daw da wosom ta wun: Ta mu hàa ni tihàani yèk rèeng ba, amma mu mòo yèk tihàani ta wey hàam a ɗàm kpees Tooy Ɓèl gi. 34Amma miy mi gàanurre: Woofan hàarra koo ni tihàani jâ pî! Ta un hàa ni faktiturum ba, ngam gbaat wûun Fay ɗi. 35Ta un hàa ni deesi ba, ngam gin nafta nak wàa ɗi. Ta un hàa ɗa ni Yerusalem ba, ngam riiy wûun ɓèl ɗi. 36Ta mu hàa ni hak wey ba, ngam gum kpàaw bunjum di gimsi hak wey kpolo e tâa burriya koo yiriya ba. 37Amma yèk wun sey e tâa eeye koo oowo, ngam yèy hòmgu di yey ana a jàk makta. 38Un rage yèk mgbèngda gàa: Insum nisi ni nisi, insum temgi ni temgi. 39Miy mi gàanurre: Ta un ansurra yèy di nit yey mbirgunu maarra ba. Amma koo wun lòskum a kpalnga riina wey, inuwa woy mgbaala ɗa. 40To nirri yiɗi go e 'maam kiita ha e at lurra wey gi, woow e at godo wey ɗa. 41To nirri ndagum go dikta kilomèeta kpolo, diknji kilomèeta cuk ni ey. 42Hîiw jày di nit yey waagum gi. Di nit yey gungum kiri, ta mu inu màrngi ba. 43Un rage yèk mgbèngda gàa: Yiɗi nit tâanjum wey, yiiw di nit yiir wey. 44Amma miy mi gàanurre: Yiɗin nit yiir ta wun, waan Fay ngam nit ây ɗàagunu ɗàari gi, 45ha un tâa hàm ta Fay, yey tâage a faktiturum gi. Ngam ey ɓasarre unji wàa a gin nit makta ây ni nit mbâr ây, àmsarre buun da nit ây gòyge ɗèm, ni nit ây tâa aw gòy ɗèm ba. 46To un yiɗi go da nit ây yiɗunu gi gbè, bèeb jâ gun kpàa ya? Naa a nit jomnum ây ɗa aw mbitɗe hû go naa? 47To un kèpɗe go da kor ta wun gbè, jàk ɓèl ji mbitnu ya? Naa a nit ây èege yèk Fay ɗa aw mbitɗe hû go naa? 48Ngam maan tâan getiya, kà yey tâa Too wun a faktiturum getiya gi!

will be added

X\