Matta 4

1A dat maan Jungci Delliya de 'maaw di Yeesu a tîim nûri, ngam ha Seyɗan e rûfuwa. 2Yeesu ye woofa riirra tiriici unji ra naan tuma ra naan, fey de àyuwa. 3Seyɗan tooy rûfrum de dàara a gin wàa, de gàaw: To muy mu Hàm Fay ɗi go, gàa daw da gòok ây gi aw ir tàarri. 4De goosi de gàaw: Dii kètiya a defterre Fay: Nirri ge gûy ni tàarri gbè ba, amma ni yèk ây pî yuuga a mgbelyèk Fay. 5Seyɗan de 'maaw a riiy ɓèl tâage riiy delliya gi, de gòynu a fak àay Fay, 6de gàaw: To muy mu Hàm Fay ɗi go, yaafa u furi. Ngam dii kètiya a defterre Fay: Gàa ge gàa daw da malayka ta wàa aw togum ni kàn waw, ngam ta nak wey e mgbòl a gòoy ba. 7Yeesu de gàaw: Dii kètiya ɗa: Ta mu rûfu di Fak wey Tooy Ɓèl ba. 8Seyɗan de naanu a fak gopri ɓèl yâktiya, de kàlnu mûsa wûun kparri lang ni 'mita waw, 9de gàaw: A jàk ây gi pî hîi gim hîimu, to mu gbâygi go a ɗàm kpees mum mu coom gi. 10Yeesu de gàaw: Seyɗan, tayi! Ngam dii kètiya: Di Fak wey Tooy Ɓèl dey gum gbâygi mu coowa, dey gbè gum dapri. 11Seyɗan de woow yaale de taye. E rri yey malayka ây de dàaran de mgbaanjuwan. 12Yeesu ye rage aw leknu di Yuhanna a kultuma, de dige a dees Galile. 13Ye woofa Nasaret, de dige e tâa a Kafernahum. Riiy maan dii a cewci sòo ɓèl a Galile, a 'mîik Jabulon ni Neftalim. 14Mbire kà yey ngam ha e gbèe jày gàa nà Isaya nit lònum yèk Fay: 15Mu dees Jabulon ni Neftalim gaarra a sòo ɓèl gi, a taga Yurdun, mu Galile gin tâam nit ây èege yèk Fay ɗi! 16Mûsa nit ây tâage a kulpi aw rabe kayang ɓèl. Kayang lòtɗa dawge da nit ây tâage a riiy wurra ni bingi wurra. 17Mgbàr maan Yeesu ɗaa sakta Yèk Kâwrra, gàarre: Inin tinîir wun, ngam wûun Fay a faktiturum hèerage. 18Yeesu ye gîre a cewci sòo ɓèl a Galile, de rabe lor ây cuk, a hàm tooy kpolo, Simon înuwan Piyèr ni Andere kaa wàa. Aw 'màktirre tidepni a sòo ɓèl, ngam aw a nit depta cîit ây ɗi. 19Yeesu de gàa daw: Dàaran un furrimi! Ii gim iinu nit depta nit ây kà yey depnu cîici a sòo gi. 20De woofan tidepni waw yaale, de furruwan. 21Yeesu ye dige a ɗàm kpeesi càa, de rabe lor ây kana cuk, a hàm ta Jebede, Yakuba ni Yuhanna kaa wàa. Aw dii a koombowal ni Jebede too waw, aw mbangsisirre tidepni waw. Yeesu de 'naasi daw. 22De woofan too waw ni koombowal yaale, de furruwan. 23Yeesu de gîre a dees Galile pî, de kàlnji da nit ây a àay gin kimjum ta waw, de sage Yèk Kâwrra wûun Fay, de ndòose daw da nit ây àyci waw ni jày loosi daw gi pî. 24Yèk Yeesu yeskige a dees Siriya lang. De 'maaran a gin wàa nit ây pî tâage ni àyci 'nang 'nang, riige 'màari ni jàk àyrra ây, koo nit tindòom ây, ni nit ây mòo daw tibûu, ni nit wuta is ây gi. De ndòosi daw. 25Mûsa nit ây dèy de furruwan di Yeesu. Aw anage a dees Galile ni dees yey înin riiy ra, ni Yerusalem, ni dees Yude, ni taga Yurdun.

will be added

X\