1 Ni ndamji birit a dat unji wuysum, mgbàr màrra a asaweerre, Mariya sàni-Magdala, ni Mariya kana nà de digin gopta gebi. 2 E rri yey deesi yûu dèy. Malayka Tooy Ɓèl cira a faktiturum, de kiwsifa gòok kuptum a nin gebi nà, de tâarra ton a farra. 3 Tiigi wàa finde kà tâyrra buun, lurra wàa dii burriya kà jòmsi. 4 Yèk wàa tolin a sooje ây faage gebi nà, malin gi, de tâan kà nit ây wutke gi. 5 Malayka de yèe daw da nikin ây nà, de gàa: Ta un tol ba! Mi cèngni, un kàmde Yeesu nit yey gbaluwan a minjum kpiiri gi. 6 Ti cenda ay ba, gûysige kà yey gàa nà. Dàaran un rapti a gin kûu nà gi. 7 Digin kènu un kàl da lor ta wàa, gûysige a wurra. Ɗàa ge ɗàanu dikta a dees Galile, a farra gun rabuwa. Mi gàanu kà yey. 8 A nikin ây nà de anin a gebi, de tayin yaale ni tolnji, ni kâwum tinîiri ɗa dèy, de 'nòon aw sakra da lor ta wàa di Yeesu. 9 E rri yey Yeesu de kpàanji ni aw a orri, de gàa daw: Kâwsin tinîir wun! De hèewrran de mòon nak wàa, de coowan. 10 De gàa daw: Ta un tol ba, amma digin un kàl daw da kor ta mum, aw dik a dees Galile. A farra gaw rabimi. 11 A nikin ây a ye tayin gi, a nit ây kana a tîim sooje ây faage gebi nà, de iran a riiy ɓèl gi, de sagin da nit ɓèl ta waw da nit daprum ây jày mbirge gi pî. 12 A nit ɓèl ta waw da nit daprum ây de kimjin ni toonji ây. Ye yèenjin gi, de hîin daw seede dèy da sooje ây faage gebi nà, 13 de gàan daw: Sagin da nit ây un gàa, a lor ta Yeesu dàaga ni tuma, oose is wàa ye tâa orro ot kûurre gi. 14 Amma to yèk yey kpèt go a gin ngomna gi, orro got mbangsi yèk maan a gin wàa, ta un dànji ba, yuu got yuununu a 'màar wun. 15 A sooje ây nà ye ngorin seede gi, de mbirin kà yey gàan daw gi. Yèk rèeng maan yeskige a tîim ni-Yude ây ha niyey. 16 A lor ta Yeesu ra sàm kpolo de digin a dees Galile, a gopri yey kàl daw nà. 17 Ye rabuwan gi, de gbâygin aw coo. Amma a nit ây kana a tîim waw aw hàanjige. 18 Yeesu de hèerra daw de gàa: Fay hîimi mbinum pî a faktiturum ni deesi. 19 Hû go digin un iimda lor ây a yòot nit dees ây pî, un iirra daw baptisma ni nîir Tooy, ni Hàm, ni Jungci Delliya. 20 Kàlnjin daw ha aw fut jày gàam dun gi pî. E rri yey mi tâanjirre ni un unji pî ha lòorra kparri.
