Matta 27

1Ndamji ye kayge gi, a nit ɓèl ta waw da nit daprum ây, ni toonji ta waw da ni-Yude ây de yèenjin a hak Yeesu ha aw ɓàruwa. 2De 'mèmuwan, de 'maawan aw hîiw a kàn Pilatu tâage ngomna gi. 3Yuda nit mòorra Yeesu ni gâra ye rabe, aw yaanu di Yeesu a kiita gi, de ngòlu a tinîir wàa. De kànsi daw seede sarrdi ra taan gi da nit ɓèl ta waw da nit daprum ây, ni toonji ây, 4de gàa: Mi mbire jàk maarra, ngam mi hîi nit yey tâage delliya aw ɓàruwa. De gàawan: Ji tâagirra dot dorro ya? Yèk wey ɗi! 5Yuda de 'màktifa daw seede maan a àay Fay. De taye, e dik e hèwsi. 6A nit ɓèl ta waw da nit daprum ây de arrin seede nà, de gàan: Ti gesi ot leknifa a seede àay Fay ba, ngam seede njîim ɗi. 7Ye raknjin gi, de sàan ni erra hèmna nit jâargum taang, ngam e tâa gin siptum ni-wooy ây. 8Ngam maan aw 'naasurre di hèmna nà hèmna njîim ha niyey. 9Kà yey gbèe jày gàa nà Yeremiya nit lònum yèk Fay gi: Aw arre seede sarrdi ra taan, yey gàan ni-Israyel ây gesi aw jinggu di nit yey dànin gi, 10de sàan hèmna nit jâargum taang, kà yey gàam nà Tooy Ɓèl gi. 11Yeesu ey gòyrre a ɗàm kpees Pilatu ngomna. Pilatu de gunu: Muy tâage wûun ni-Yude ây gi yi? De goosi de gàa: Hû go gàa muy. 12A nit ɓèl ta waw da nit daprum ây, ni toonji ây ye 'maaran yèy a hak Yeesu gi, ti goosi koo jâ ba. 13Pilatu de gàaw: Mu rak yèk ây pî 'maaran a hak wey gi ba yi? 14Amma Yeesu de tâa ti goosu yèy koo kpolo ba, ha de tâaw 'nang dèy di Pilatu ngomna. 15A daprum Paska pî ngomna hû waa e yuuna daw da nit ây nit kultuma kpolo, nit yey yiɗin gi. 16Mgbàr maan nit maktiya nîir wàa Barabba dii a kultuma. 17Mûsa nit ây ye kimjin gi, Pilatu de gun daw: Wun yiɗunu mi woonu ya? Barabba koo Yeesu înuwan Kristu gi yi? 18Gun daw kà yey ngam ey cèngnige, aw hîiwe Yeesu a kàn wàa yèk ngèeri gbè. 19Pilatu ye tâa a gbaat kiita, kin wàa de tèera a gin wàa aw gàaw: Ta mu mbiru koo jâ di nit ɗèm gi ba. Ngam mi rii 'màari dèy ni tuma yey yèk nit maan. 20Amma a nit ɓèl ta waw da nit daprum ây, ni toonji ây de kpèwsin da mûsa nit ây, ha aw waaw di Pilatu e woo daw Barabba, aw ɓàru di Yeesu. 21Pilatu ngomna de gun daw: Wun yiɗunu mi woonu a tîim nit ây cuk gi ya? De goosin de gàan: Barabba. 22De gàa daw: Ji yiɗunu mi mbiru di Yeesu 'naasuwan Kristu gi ya? Aw pî de gàan: Sey aw gbalu a minjum kpiiri! 23De gun daw: Maarra ji mbire kan ya? Amma a nit ây de bimin dèy de gàan: Sey aw gbalu a minjum kpiiri! 24Pilatu ye rabe yèk wàa mbir koo jâ ba, amma gbaarra yèy ande gi, de ɗuge sòo a taasaw, de kòle kàn wàa a ɗàm kpees mûsa nit ây de gàa: Miy mi lekɗa a njîim nit yey ba. Yèk wun ɗi! 25A nit ây pî de gàan: Nge njîim wàa e ira a hak worro ni hàm ta worro! 26De woo daw Barabba. Amma di Yeesu de lèfuwan, de hîi daw ha aw gbalu a minjum kpiiri. 27A sooje ta wàa di Pilatu de leknuwan di Yeesu a àay. De kimjan mûsa sooje ây pî a gin wàa. 28De borruwan di Yeesu lurra ta wàa, de mgbapsurran lurra cal. 29De arrin cikci aw yuu tikangni hay, de iiwrra a hak wàa. De leknurran suu a kàn riina wàa. De gbâygin a ɗàm kpees wàa aw wâskuwa, de gàawan: Soko, wûun ni-Yude ây! 30De yîmurran ticèkti, de asin suu nà de lurruwan a hay. 31Ye waskuwan hûy gi, de borruwan lurra cal nà, de mgbapsusurran lurra wàa. De 'maawan ngam ha aw gbalu a minjum kpiiri. 32A ye yuuran a riiy gi, de kpàan ni-Kirene nîir wàa Simon. De ndaguwan e tokfa minjum kpiir Yeesu. 33Ye kpèrrin a gin înuwan Golgata, kà gàarra gin sek hay, 34de hîiwan di Yeesu mbàl jamjumya ni jàk ɗalliya ngam e njoo. Ye haaw gi, de hàwe njoorra. 35De gbaluwan a minjum kpiiri. De haan saasa, aw mîinji lurra ta wàa. 36De tâan a farra aw faawa. 37De iin yèk hak Yeesu kètiya a fak minjum kpiiri, gàarre kà yey: Nit yey tâage Yeesu wûun ni-Yude ây. 38De gbalnjuwan ni nit ây cuk, nit ngorgum jàk ây, kpolo a cewci riina, kpolo a cewci mgbaala. 39A nit hòmda ây a farra de ɓòtin hay, de maasuwan di Yeesu, 40de gàan: Muy mu nit yey gàage, aa gum aasi àay Fay mu jâasi unji taan, to muy mu Hàm Fay ɗi go, saani hak wey mu cir a minjum kpiiri gi! 41Hû go wâskuwan ɗa nit ɓèl ta waw da nit daprum ây, 'mèmsa ni nit còycum ây ni toonji ây, de gàan: 42Saanige da nit ây kana, ge kpàaw saanum hak wàa ba yi? To ey tâage go wûun ni-Israyel ây, sey e cir kòsòng a minjum kpiiri, orro ɗa goo got goosuwa. 43Ey ii dànda tinîir wàa a gin Fay. Sey Fay e saanu kòsòng, to yiɗu go. Ngam gàa nà: Miy tâage Hàm Fay. 44Hû go njàmruwan ɗa nit ây cuk gbalnjuwan ni ey gi. 45Kulpi ii a deesi pî diga unji a tîim hay ha unji mbona. 46A unji mbona Yeesu de bime ni tibimni ɓèl, de gàa: Eli eli, lema sabaktani, kà gàarra: Fak mum Fak mum, ngam jâ woomfa dim ya? 47A nit ây kana a tîim nit ây gòyge a farra gi ye ragin kà yey, de gàan: 'Naasirre Eliya. 48Nirri kpolo a tîim waw de 'nòo yaale de arre ndàksi jày, de bûu a mgbewnji mbàl, de ii a samsi. De hîiw di Yeesu ha e sûu. 49Ngirra nit ây kana de gàan: Dàan ot raptuwa, to Eliya dàa ge dàara go e saanu gi! 50Yeesu de bime bak ni tibimni ɓèl, de woofa yîngda de wurre. 51E rri yey jimda jàk joorra woy minjum a àay Fay ngarre a tîim, diga u fay ha u furi. Deesi de yûuye, a kpata ây de walgin, 52a geb ây de kuplin, is nit ây dèy tâage nit della ta Fay de gûysin. 53A dat yey gûyse Yeesu a wurra gi, de yuuran a geb ây, de legin a riiy ɓèl delliya, aw lòtɗa dawge da nit ây dèy. 54Nit ɓèl waw da sooje ây, ni nit ây tâanji ni ey ngam faarra Yeesu gi, ye rabin yûurra deesi ni jàk ây mbirge gi, de tolin dèy de gàan: Takundi, nit yey Hàm Fay ɗi! 55A nikin ây dèy aw gòyrre kpâarriya a farra, aw gopɗe. Aw futku nà di Yeesu diga dees Galile gi ngam aw tèewrra aw mgbaanjuwa. 56A tîim waw aw dii Mariya sàni-Magdala, ni Mariya nuu waw da Yakuba ni Yosef, ni nuu waw da hàm ta Jebede. 57Ye cii mbona, Yosef ni-Arimatiya nit bèebi de dàara. Ey ɗa lor Yeesu ɗi. 58De dige a gin Pilatu de waaw is Yeesu. Pilatu de gàa aw hîiwa. 59De cini is Yeesu a minjum kpiiri, de forgu ni jàk joorra woy ɓèl burriya. 60De iiw a geb wàa fûuya tâage nà cèerriya a kpata gi. De kiwsa gòok ɓèl e kuptini nin gebi, de taye. 61Mariya sàni-Magdala, ni Mariya kana nà aw tâarre a farra a ɗàm kpees gebi nà. 62Ni ndamji a unji wuysum, a nit ɓèl ta waw da nit daprum ây, ni ni-Farisa ây de kimjan a gin Pilatu. 63De gàawan: Nitcoorra, ot ɓaysirre yèk nit rèengrum rèeng nà ye tâa nà beengiya gi, gàa gû ge gûysi a unji taanti. 64Hû go gàa aw faa gebi gi mbâra ha unji taanti e gbèe, ngam ta a lor ta wàa aw dàara aw oosi is wàa ba, ha aw gàa da nit ây, gûysige a wurra, ha yèk rèeng maan e hòmu di woy mgbanti ba. 65Pilatu de goosi de gàa daw: E rri yey a sooje ây. Diknjin ni aw, un faa gebi mbâra kà yey mbinnu gi. 66De digin aw faa geb maan ni faacu. De iin mèn ticèngsunum a gòok kuptum a nin gebi nà, de gòynin sooje ây aw faa.

will be added

X\