Matta 25

1Ɗo wûun Fay a faktiturum rèenji ni sapri ây ra atke pittirla ta waw, aw dik ngam aw kpàanji ni nit ata maanji. 2Kèrèw a tîim waw aw dii raya, kèrèw ngaa aw dii ni hakkilo. 3A sapri ây tâage raya gi aw arre pittirla ta waw, amma aw at num ba. 4A sapri ây tâage ni hakkilo gi aw arre pittirla ta waw, ni num a kîrnga ây ɗa. 5Ye tâa nit ata maanji tòorage dàarra, nistikûum mòo daw da sapri ây nà pî, de kûun. 6Amma a tîim tuma de ragin tibimni gàarre: E rri yey nit ata maanji dàararre. Anin un dik un kpàanji ni ey! 7A sapri ây nà pî de anin, de mbangsisin pittirla ta waw. 8A sapri ây tâage raya nà de gàan daw da sapri ây tâage ni hakkilo gi: Hîirran dot num wun, ngam pittirla ta worro kûyrre. 9A sapri ây tâage ni hakkilo nà de gàan daw: Oow, ge getna dorro ni un ɗa ba. Ndika un dik a gin nit sàangum ây, un sàa ngam wun. 10A ye digin sàarra num gi, nit ata maanji kpèrrage. A sapri ây tâage mbangsumya nà, de leknjin ni ey a àay siirra siir ata maanji. De fante nin. 11A dat maan ngirra sapri ây nà de dàaran, de bimin de gàan: Nitcoorra, Nitcoorra, faarina! 12Amma nit ata maanji de gàara daw: Takundi mi gàanurre, mi cèngnunu ba. 13Hû go mûyin, ngam un cèngni mgbàr maan koo unji maan ba. 14Mgbàr maan tâa ge tâa kà nirri yiɗi tayrra a dees kana kpâarriya. De 'naase nit tèem ta wàa, de hîi daw jàk ta wàa aw faawa. 15Di nit kpolo de hîiw seede kurra ujinè kèrèw, di nit kana kurra ujinè cuk, di nit kana ngaa ujinèerre, koo di wuna kày ge mbin faarra gi. De taye a dees kana kpâarriya. 16Nit tèem yey ngorge kurra ujinè kèrèw gi de dige yaale, de tèeni ni seede maan, de kpàasirra woy kana kurra ujinè kèrèw. 17Hû go ɗa nit tèem yey ngorge kurra ujinè cuk gi, de kpàasirra woy kana ujinè cuk. 18Amma nit tèem yey ngorge kurra ujinèerre gi, de dige e siptifa seede nit ɓèl wàa nà a deesi. 19A dat maan tòo dèy, nit ɓèl waw da nit tèem ây nà de koyra. De ɗaa gopnjum sakri bèeb wàa ni aw. 20Nit tèem yey ngorge nà kurra ujinè kèrèw gi, de hèewrra de gàa: Nit ɓèl mum, mu hîimi nà kurra ujinè kèrèw. E rri yey kurra ujinè kèrèw woy kana kpàanim ni erra gi. 21Nit ɓèl wàa de gàaw: Mu tèe delliya, mu nit tèem mbâra ɗi takundi. Mu tèe mbâra a jày càa, gò gim gòynum a jày dèy. Lek a kâwum nit ɓèl wey! 22Nit tèem yey ngorge nà kurra ujinè cuk gi, de hèewrra de gàa: Nit ɓèl mum, mu hîimi nà kurra ujinè cuk. E rri yey kurra ujinè cuk woy kana kpàanim ni erra gi. 23Nit ɓèl wàa de gàaw: Mu tèe delliya, mu nit tèem mbâra ɗi takundi. Mu tèe mbâra a jày càa, gò gim gòynum a jày dèy. Lek a kâwum nit ɓèl wey! 24Nit tèem yey ngorge nà kurra ujinèerre gi, de hèewrra de gàa: Nit ɓèl mum, mi cèngni muy mu nit ndèktiya ɗi. Mu ripɗe a gin tâa mu còk ba, mu kimjirre a gin tâa mu yòo ba. 25Miy de tolmi, de dikmi mi siptifa seede wey kurra ujinèerre gi a deesi. E rrum yey! 26Nit ɓèl wàa de goosi de gàaw: Mu nit tèem makta ɗi, nit taski! Ye tâa mu cèngni, mi ripɗe a gin tâa mi còk ba, mi kimjirre a gin tâa mi yòo ba gi, 27gesi ngin mu iifa seede mum a àay iirra seede, ngam to mi koyra go, gim kpàa ngin seede mum iisimdage. 28Nit ɓèl nà de gàa da nit ây: Arrin seede kurra ujinèerre a gin wàa gi, un hîiw di nit yey tâage ni kurra ujinè ra nà! 29Ngam koo wun tâage ni jày, kpàa ge kpàasirra jày dèy. Amma nit yey èege jày, a gaw arri koo jày tâagurra càa gi. 30'Màktufan di nit tèem ɓa hû go gi a tuma kulpi a gbaa, a gin tâa umda rîsim ni riisum temgi! 31Ye ge dàara Hàm nirri a 'mita wàa ni mûsa malayka ây pî, tâa ge tâa a gbaat wûun wàa ni 'mita. 32Ki gaw kimja mûsa nit dees ây pî a ɗàm kpees wàa, ɗò ge ɗòlnji daw kà hàm faaci ɗòlnji mgbâay ây ni bii ây. 33Gò ge gòyni mgbâay ây a riina wàa, a bii ây ngaa a mgbaala wàa. 34A dat maan wûun gi gàa ge gàa da nit ây gòyge a riina wàa: Dàaran un nit ây mbârsi dun Too mum gi, un koyrra wûun yey tâage mbangsumya ngam wun diga ɗaarra kparri gi. 35Ngam a ye àyim nà fey gi, un hîimi tiriici. Ye ɓòyim nà sòo gi, un hîimi mi njoo. Ye tâami nà nit wooy gi, un ngorimge. 36Ye tâami nà isi kpong gi, un mgbapsimge lurra. Ye tâami nà àyciya gi, un gobimge. Ye tâami nà a kultuma gi, un difage a gin mum. 37A nit gòyrra ây ɗèm gi gu gaw gunu: Nitcoorra, ningàa kpàam ot fey àyumde, hîim ot tiriici gi ya? Ningàa kpàam ot sòo ɓòyumde, hîim ot sòo gi ya? 38Ningàa kpàam ot mu nit wooy ɗi, ngorum ot gi ya? Ningàa kpàam ot mu dii isi kpong, mgbapsum ot lurra gi ya? 39Ningàa kpàam ot mu dii àyciya malla mu dii a kultuma, difa ot a gin wey ot gobum gi ya? 40Wûun nà goo ge goosi e gàa daw: Takundi mi gàanurre, jày pî mbitnu di nirri kpolo a tîim kor ta mum hòmge luurra gi, dim mbitnu. 41A dat maan gàa ge gàa da nit ây gòyge a mgbaala wàa: Hèesin a gin mum, un nit ây lèrri dun Fay gi, digin a eb ɓèl tâam timgbàri, yey tâage mbangsumya ngam Seyɗan ni malayka ta wàa gi! 42Ngam a ye àyim nà fey gi, un hîim tiriici ba. Ye ɓòyim nà sòo gi, un hîim mi njoo ba. 43Ye tâami nà nit wooy gi, un ngorim ba. Ye tâami nà isi kpong gi, un hîim lurra ba. Ye tâami nà àyciya, malla ye tâami nà a kultuma gi, un difa un gobim ba. 44A nit ây tâage lètiya gi gu gaw gunu: Nitcoorra, ningàa kpàam ot fey àyumde, malla sòo ɓòyumde, malla mu nit wooy ɗi, malla mu dii isi kpong, malla mu dii àyciya, malla mu dii a kultuma, amma ot tèemda ba ya? 45Goo ge goosi e gàa daw: Takundi mi gàanurre, jày pî tâa un mbir di nirri kpolo a tîim nit ây hòmge luurra gi ba, un mbirim dim ɗa ba. 46A nit ây gi di gaw dik a kiita tâam timgbàri, amma a nit gòyrra ây ɗèm gi di gaw dik a gûyrra tâam timgbàri.

will be added

X\