1 Yeesu de yuu a àay Fay. A ye gàa e tay gi, a lor ta wàa de hèewrran ngam aw kàlnu jâarra àay Fay. 2 Amma ey de gàa daw: Un raptirre jàk ây gi pî yi? Takundi mi gàanurre: Gòoy ge ngasɗa a fak gòok kana ba, kpu gaw kpulgifa pî a deesi. 3 Yeesu ye tâa a gopri korrom, a lor ta wàa de hèewrran aw kpolo waw, de gunuwan: Kàlna, ningàa ge mbir jàk yey yèem gi ya? Ji ge lòni dàarra wey ni lòorra kparri gi ya? 4 Yeesu de goosi de gàa daw: Faasin hak wun, ta koo wuna e rûfnu ba! 5 Ngam a nit ây dèy dàa gaw dàara ni nîir mum, gaw gàa: Miy mi Kristu ɗi. Rû gaw rûfi nit ây dèy. 6 Ra gun rak tapnjum bàpri ni yèk bàpri. Faasin hak wun, ta jungci isi e kpulnu ba. Sey jàk ây gi e mbiri, amma lòorra kparri ɗà kpèrra ba. 7 A nit dees ây a gaw an a gin nit dees ây kana, wûun a ge an a gin wûun kana aw tapnji bàpri. Fek ɓèl ii ge ii, deesi ɗa yûu ge yûu a gin kana 'nang 'nang. 8 Amma a jàk ây gi pî tâa ge tâa kà ɗaarra 'màari a ciisum hàm. 9 Hîi gaw hîinu a kàn nit ɓèl ây ngam aw riisunu 'màari, ɓà gaw ɓàtnu. A nit dees ây pî yii gaw yiinu ngam nîir mum. 10 Mgbàr maan a nit ây dèy mgbò gaw mgbòli aw woofa goosum, hîi gaw hîinji ni gâra a kàn nit ây kana, yii gaw yiinji a tîim waw. 11 A nit lònum yèk rèeng ây dèy a gaw an, rû gaw rûfri nit ây dèy. 12 Ye tâa tèem makta iisirrarre mûurra gi, yiide a gin nit ây dèy a ge atnji. 13 Amma nit yey èfke tinîir wàa ha gbèeni gi, kpàa ge kpàa saarra. 14 Sa gaw sak Yèk Kâwrra wûun Fay koo u hâ a kparri lang, ngam ha e tâa seedamku a gin nit dees ây pî. A dat maan ge tâa mgbàr gbèeni gi. 15 A ye gun rap jàk kpulla jungci isi ni mboysum jàk ây yèe nà Daniyel nit lònum yèk Fay gi, tâarre a gin tâam delliya gi, sey nit janggum yèk yey e cèngni jàk ây gi. 16 Mgbàr maan a nit ây tâage a dees Yude, sey aw ɗul aw 'nòo a gopri. 17 Nirri dii go a fak àay, ta e cir ngam ata jàk ta wàa ba. 18 Nirri dii go a hèmna, ta e ir u gbaa ngam ata lurra wàa ba. 19 Amma 'màari dii daw da kin himni ây ni nikin ây âwsi hàm ây a mgbàr maan! 20 Waan Fay ngam ta jàk ây gi e mbir a cot ngisim, koo a unji wuysum ba! 21 Ngam mgbàr maan 'màar ɓèl ii ge ii, kà yey tâa ti haa iirra diga ɗaarra kparri ba ha kòsòng. Ge haasirra ɗa iirra hû go ba. 22 To Fay atnjifa go ngin a unji 'màar ây gi ba, koo nirri kpolo ge kpàa saarra ba. Amma atnjifage a unji ây maan yèk nit ta wàa carre gi. 23 To nirri dàara go, e gàanu «e rri yey Kristu ay gi», koo «e rri yey go ay go», ta un goosu ba. 24 Ngam Kristu rèengda rèeng ây ni nit lònum yèk rèeng ây, a gaw ani aw lòni jàk kayeefi ɓèl ây, ngam rûfnum da nit ây carre Fay gi to gaw kpàa go orri. 25 E rri yey mi ɗàanu kàlla jàk ây gi diga mgban. 26 To aw gàanu go «e rri yey Kristu dii a nûri, ta un dik ba. To aw gàanu go «e rri yey Kristu dii fûurre a àay», ta un goosi daw ba. 27 Ngam dàarra Hàm nirri tâa ge tâa kà yey tâye buun diga ɓani unji, kaynge ha lekni unji gi. 28 A gin tâa wurra jày, a farra kimjin a teel ây. 29 A mgbàr maan yaale a dat 'màar ây nà, unji ku ge kupti yiriya kurrum, corri ɗa woo ge woofa kayngum wàa. A tibiskum ây a faktiturum yaa gaw yaari. Kpèw kpèw jàk ây gòyni faktiturum gi yûu gaw yûu. 30 Ticèngsunum dàarra Hàm nirri lò ge lòt a faktiturum. Mûsa yòot nit ây a deesi pî cu gaw cupsi gbetki aw umi, ra gaw rap Hàm nirri dàararre a titurum ni 'mita wàa, ni mbinum dèy. 31 Tèe ge tèera malayka ta wàa ni uta ti uta ɓèl a gbèeni deesi pî, ha aw kimji da nit ta wàa carre gi. 32 Engnin yèk futifay. A jalnji ây aw baararre go, aw gosi waasi, un cèngni cot iiy hèerage. 33 Hû go un ngaa a ye gun rap jàk ây gi mbitɗe go, cèngnin Hàm nirri hèera a nin. 34 Takundi mi gàanurre: A nit ây tâarra yey gaw wut ba, sey to jàk ây gi pî mbir go. 35 Faktiturum ni deesi lòo ge lòo, amma yèk mum ge lòo ba sam. 36 Amma cen nirri cèngni mgbàr maan ni unji maan ba, koo malayka ây a faktiturum, koo Hàm nirri aw cèngni ba, sey Tooy Ɓèl gbè. 37 Unji dàarra Hàm nirri tâa ge tâa kà yey tâa nà a mgbàr Nuhu. 38 Ngam a mgbàr maan, ɗoko mûurra sòo ii a deesi gi, a nit ây aw riirre nà aw njoorre nà, aw atɗe kin, aw hîirre sapri ta waw aw arri, ha unji yey lege Nuhu a koombowal gi. 39 Aw cèngni nà ba ha mgbàr yey ii mûurra sòo a deesi gi, gbeesi daw da mûsa nit ây pî. Hû go ge tâa ɗa a unji dàarra Hàm nirri gi. 40 Mgbàr maan a nit kana cuk tâa gaw tâa a hèmna, Fay a ge atɗa kpolo, e woofa kpolo. 41 A nikin ây cuk nà gaw nàm tirri, Fay a ge atɗa kpolo, e woofa kpolo. 42 Hû go mûyin! Ngam un cèngni unji yey ge dàara Nitcoorra wun gi ba. 43 Ragin: To nit àay cèngni go ngin mgbàr yey ge dàara oori gi, faa ge faa ngin àay wàa, ngam ta nirri e lek ba. 44 Hû go tâan mbangsumya! Ngam Hàm nirri dàa ge dàara a mgbàr yey tâa un dàn ba. 45 Tâan kà nit tèem mbâra ni hakkilo, yey gòynu nit ɓèl wàa de faa da nit tèem ây kana, ha e hîi daw tiriici a ye ge ày daw fey gi. 46 Kâwum diiw di nit tèem maan, to nit ɓèl wàa koyra go, e kpàaw tèerra hû go gi. 47 Mi gàanurre: Takundi, nit ɓèl wàa gò ge gòynu di nit tèem nà e faa jàk ta wàa pî. 48 Amma to nit tèem maan tâa go ngin maktiya, e gàa a tinîir wàa: Nit ɓèl mum ge kîra koyrra ba, 49 e ɗaa lutkum da kor nit tèenjum ta wàa, e riinji e njoonji ni nit râmda mbàl ây, 50 nit ɓèl wàa ko ge koyra unji kana tâa nit tèem ti dàn ba, a mgbàr yey tâa ti cèngni ba. 51 'Mè ge 'memsu di nit tèem nà a kiita ni nit tibiw ây, gûu ge gûuwa, e leknu a gin tâa umda rîsim ni riisum temgi.
