Matta 23

1A dat maan Yeesu de kàl daw yèy da mûsa nit ây ni lor ta wàa, 2de gàa: A nit còycum ây ni ni-Farisa ây aw ii hak waw ha aw kàlnji yèk mgbèngda Muusa. 3Hû go un tèen jày pî gàan dun gi, un fut yèk maan. Amma ta un tèe kà yey tèen aw gi ba. Ngam aw gàarre jày, amma aw tèerre kà yey gàan gi ba. 4Aw 'mèmde titokri bûtiya, aw toksirra daw da nit ây. Amma aw ni hak waw aw yiɗi aw yûusu titokri maan koo ni mbèerri kàn waw ba. 5Tèem waw pî aw tèerre ngam a nit ây aw rapti daw. Aw mgbòksirre jày mgbabin gi ni ɗerreeji yèk Fay, aw 'misirre còngda pètki lurra waw ngam kàlnum waarra waar waw. 6Aw yiɗi gin tâam màrra a riirra tiriici, ni tâarra a ɗàm kpeesi a àay gin kimjum ây. 7Aw yiɗi a nit ây aw kèbi daw kèpri a luumu, aw 'naasi daw «Nitkàlnjum». 8Amma un ta un woo daw da nit ây aw 'naasunu «Nitkàlnjum» gi ba. Ngam Nitkàlnjum wun dii kpolo, un pî un kor ây ɗi. 9Ta un 'naasi koo di wuna a deesi «Tooy» gi ba. Ngam Too wun dii kpolo tâage a faktiturum gi. 10Ta un woo daw ɗa da nit ây aw 'naasunu «Nit ɓèl» ba. Ngam Nit ɓèl wun dii kpolo, Kristu ɗi. 11Amma nit yey hòmge 'mita a tîim wun, sey e ir nit tèerra tèem wun. 12Koo wun 'misi hak wàa ya, Fay luu ge luusuwa. Amma koo wun luusi hak wàa ya, Fay 'mi ge 'misuwa. 13Yeesu yèerre bak de gàa: 'Màari waanurre, un nit còycum ây ni ni-Farisa ây, un nit tibiw ây! Ngam un fantirre gin lekta a wûun Fay da nit ây. Un ni hak wun un lekɗa a farra ba, un woo daw ɗa da nit ây yiɗi lekta, aw lek ba.( 14'Màari waanurre, un nit còycum ây ni ni-Farisa ây, un nit tibiw ây! Ngam un atkirre jày tâagi daw da kin wurra ây, un yâksirre waarra Fay a nis nit ây. Ngam maan kpàa gun kpàa kiita woy hòmge àyrra.) 15'Màari waanurre, un nit còycum ây ni ni-Farisa ây, un nit tibiw ây! Ngam un gîtɗe koo u hâ a deesi ni sòo ɓèl, ha un kpàa nirri kpolo e fut yèk wun. Amma ir go nit futa gi, un inuge nirri getke lekta a eb ɓèl, hòmgunu dun nak cuk. 16'Màari waanurre, dun râay ây nàtke nit ây kana, gàage: To nirri hàa go ni àay Fay, tihàani wàa takundi ɗi ba. Amma to hàa go ni kangeerri àay Fay, tihàani wàa takundi ɗi. 17Un rak ây, un râay ây ɗi! Ji hòmge 'mita ya, kangeerri malla àay Fay delsu di kangeerri gi yi? 18Un gàarre bak: To nirri hàa go ni gin gûurra jàk gurfum, tihàani wàa takundi ɗi ba. Amma to hàa go ni jàk hîiri tâage a gin gûurra jàk gurfum gi, tihàani wàa takundi ɗi. 19Un râay ây! Ji hòmge 'mita ya, jàk hîiri malla gin gûurra jàk gurfum delsu di jàk hîiri gi yi? 20Hû go nit yey hàage ni gin gûurra jàk gurfum gi, hàani ni gin maan, ni jàk ây tâage a farra ɗa pî. 21Nit yey hàage ni àay Fay, hàani ni àay maan, ni Fay tâage ɗa a farra gi. 22Nit yey hàage ni faktiturum, hàani ni gbaat wûun Fay, ni Fay ɗa tâage a farra gi. 23'Màari waanurre, un nit còycum ây ni ni-Farisa ây, un nit tibiw ây! Ngam un atɗe jày kpolo a jày kpètke ra, koo a waas minti, ni waas mgbirgumya, ni sita, un hîirre kà dîm. Amma un woofa jày hòmge 'mita a yèk mgbèngda gi, kà gòyrra ɗèm, ni 'maton, ni goosum. Sey un tèe jàk ây gi, cen woorra woy ngasta. 24Un râay ây nàtke nit ây kana! Un kpuurre jày ngam un tuusifa tiwâynji, amma un mitɗe ngeeloba ây. 25'Màari waanurre, un nit còycum ây ni ni-Farisa ây, un nit tibiw ây! Ngam un kòlle dat sey ni taasaw, amma u mîisi mûurre ni jày ngorgunu a gayam wun gi. 26Muy mu ni-Farisa, mu râay ɗi, kòl màrra mîis sey, ha dat maan ɗa e tâa kòlliya! 27'Màari waanurre, un nit còycum ây ni ni-Farisa ây, un nit tibiw ây! Ngam un rèenji ni geb ây lòrin burriya, delge u gbaa raptum a nisi, amma u mîisi mûurre ni kòpti wurra ây, ni jàk 'miskum ây 'nang 'nang. 28Kà yey tâanu un ɗa. A tiigi wun un lònirre kànit ây gòyge ɗèm, amma a tinîir wun mûurre ni yèk tibiw, ni yèk makta. 29'Màari waanurre, un nit còycum ây ni ni-Farisa ây, un nit tibiw ây! Ngam un cèerre geb fûuya danit ây lòni nà yèk Fay, un delsirre gin siptum nit ây gòyge ɗèm. 30Un gàarre: To ot tâa go ngin a mgbàr too rra worro, got 'mèmsi ngin ni aw a tuusum njîim nit lònum ây gi ba. 31Kà yey un kàlnirre un ni hak wun, un hàm ta waw ɗi da nit ây ɓàrge nà nit lònum ây gi. 32Iisirran dikta ɗàm kpeesi, ha un gbèesi tèem makta yey tèen nà a too rra wun gi! 33Un jòoy ây, un yòot mbîigum ây! Kà gun 'nòo a kiita eb ɓèl gi ya? 34Yeesu de gàa daw bak: Ngam maan tèe gim tèefa dun nit ây gaw lòni yèk Fay, ni nit ây tâage còycumya, ni nit ây cèngni yèk defterre Fay. Amma ɓà gun ɓàt daw da nit ây kana a tîim waw, da nit ây kana gba gun gbali daw a minjum kpiiri, da nit ây kana ngaa lè gun lèfi daw a àay gin kimjum ta wun, ɗàa gun ɗàa daw ɗàari un màn daw a riiy yey ha a riiy kana. 35Mbi ge mbir kà yey, ngam ha njîim nit ây gòyge ɗèm tuusin a deesi gi, e ira a hak wun, diga njîim Abel nit gòyrra ɗèm ha njîim Jakariya hàm Bakariya, yey ɓàtnu a tîim gin gûurra jàk gurfum ni àay Fay gi. 36Takundi mi gàanurre, jàk ây gi pî kpè ge kpèt daw da yòot nit ây tâarra yey gi. 37Yeesu de gàa: Yerusalem, Yerusalem, mu ɓàre da nit ây lòni yèk Fay, mu aa daw ni gòok ây da nit ây tèefa daw Fay a gin wey gi! Nak mèn kàmmi kimjum nit ta wey kà ɗeeki kimji hàm ta wàa a mîis kapci gi ya? Amma un un yiɗi ba. 38E rri yey àay wun i ge ir âwa. 39Mi gàanurre: Gun rabim ba sam, diga niyey ha mgbàr yey gun gàa: Mbâri e tâaw di nit yey dàaga ni nîir Nitcoorra gi!

will be added

X\