Matta 22

1Yeesu de yèe daw bak ni rèenjum yèy, de gàa: 2Wûun Fay a faktiturum rèenji ni wûun yey mbangse siir ata maanji di hàm wàa gi. 3De tèe da nit tèem ta wàa, ha aw kàl daw da nit 'naasum ây a siir ata maanji gi, aw dàara. Amma aw aw yiɗi aw dàara ba. 4De tèese bak da nit tèem ây kana, de gàa: Kàlin daw da nit 'naasum ây nà un gàa daw: E rri yey tiriit ata maanji mbangsumya ɗi. Mi gûuye gus ta mum ni lèri ta mum, mi mbangsige jày pî. Dàaran a siir ata maanji! 5Amma a nit 'naasum ây gi aw ii tuk waw a yèk maan ba. De tayrin nit kpolo a hèmna wàa, nit kana ngaa a gin sàangum jàk ta wàa. 6A nit ây ngaskirra gi de mòon daw da nit tèem ta wûun nà, de riisin daw 'màari, de ɓàrin daw. 7De ngòlu di wûun, de tèefa sooje ta wàa, aw gbeesifa daw da nit ây ɓàare nit tèem ta wàa gi, de sutfan àay rra waw. 8De gàa daw da nit tèem ta wàa: Siir ata maanji mbangsige, amma a nit 'naasum ây aw tèk ha aw dàara ba. 9Hû go digin a jalnji ot ây, un 'naasa koo wun kpàanu pî, e dàara a siir ata maanji. 10A nit tèem ây nà de digin a jalnji ot ây, de kimjan nit ây kpàan gi pî, a nit makta ây ni nit mbâr ây. Hû go àay gin riirra tiriit ata maanji mûu ni nit ây. 11Wûun ye lege a àay ngam e rapti da nit ây gi, de kpàa nit kana tâa ti mgbap lurra siir atnum maanji ba. 12De gàaw: Sooba, kà lekma muy ay gi, lurra siir atnum maanji cenum ba ya? Ey de tâaw baak baak. 13Wûun de gàa da nit tèem ta wàa: 'Mèmuwan kàn ta wàa ni nak ta wàa, un 'màktufa a tuma kulpi a gbaa a gin tâa umda rîsim ni riisum temgi. 14Ngam a nit 'naasum ây aw dii dèy, amma a nit ây catɗan gi aw dii càa. 15A ni-Farisa ây de digin aw yèenji a tîim waw, kày gaw mòow di Yeesu a yèk wàa gi. 16De tèefan lor ta waw, 'mèmsa ni nit ta Herode, a gin wàa aw gàawa: Nitkàlnjum, ot cèngni muy mu nit takundi ɗi, mu kàlnjirre ot Fay ni takundi. Mu tolle yèk nirri ba, mu raptirre nis nit ây 'nang 'nang ba. 17Kàlna kà dànuma! Gesi hîirra jomorrgol di Kaysara wûun gi yi, koo ti gesi ba yi? 18Amma Yeesu ye cèngni makta waw, de gàa daw: Un nit tibiw ây gi, ngam jâ rûfim un ya? 19Kàlnimin seede jomorrgol! De 'maawran seede sarrdi kpolo. 20De gun daw: Foto hak wun ɗi yey gi, ni kèta nîir wuna? 21De goosin: Foto Kaysara wûun ɗi. Yeesu de gàa daw: Hû go hîisuwan di Kaysara jày tâage jàk wàa, hîisuwan di Fay ngaa jày tâage jàk wàa. 22Ye ragin yèk yey, de tâa daw 'nang. De woowan di Yeesu de tayin. 23Mgbàr maan a ni-Saduki ây aw dàara a gin Yeesu. A nit ây maan aw gàarre, gûysum a wurra cen. De gunuwan, 24de gàan: Nitkàlnjum, Muusa gàa: To nirri wut go hàm cenu ba, sey kaa wàa e koyrra kin wàa mba ge kpàa go hàm, ha e gòyni yòot ɓèl wàa wutke gi. 25A hàm tooy kpolo aw tâaye nà jòròs a gin worro. Màrra arre kin, de wurre hàm cenu ba, de woowfa kin wàa di kaa wàa. 26Hû go futnje ni kaa wàa cukti, ni kaa wàa taanti ɗa ha aw jòròs pî. 27A dat waw pî kin maan ɗa wurre. 28Amma unji gûysum a wurra, kin maan kin wun ge tâa a tîim waw jòròs gi ya? Ngam aw ɗa pî aw arruge. 29Yeesu de goosi de gàa daw: Un dòpɗe, ngam un cèngni yèk defterre koo mbinum Fay ba. 30Ngam ye gaw gûysi a nit ây wutke gi, nihun ni nikin gaw atnji ba. Tâa gaw tâa kà malayka ây a faktiturum. 31Un haa janggum jày kàlnu Fay a yèk gûysum a wurra ba yi? ye gàa gi: 32Miy tâage Fak waw da Abraham, ni Isak, ni Yakob. Hû go Fay ti tâa Fak nit wutiya ây ba, amma Fak nit beenga ây ɗi. 33Mûsa nit ây ye ragin yèk Yeesu kà yey, de kpul daw jungci isi a kàlnjum wàa kàlnji daw gi. 34A ni-Farisa ây ye ragin, Yeesu suni daw ni yèy da ni-Saduki ây gi, de kimjin a gin ti kpolo. 35Nirri kpolo a tîim waw, nit cèngnum yèk mgbèngda, de gunu ngam e rûfuwa, de gàaw: 36Nitkàlnjum, yèk hâ hòmge 'mita a yèk mgbèngda gi ya? 37De goosi de gàaw: Yiɗi Fak wey Tooy Ɓèl ni tinîir wey pî, ni jungci is wey pî, ni dànda wey pî. 38Yey tâage woy màrra, hòmge 'mita a yèk mgbèngda gi. 39E rri yey yèk cukti a yèk mgbèngda rèenji ni yey gi: Yiɗi nit tâanjum wey kà yey yiɗum hak wey. 40Yèk mgbèngda pî, ni yèk nit lònum ây pî gòyrre a yèk ây cuk gi. 41A ni-Farisa ây ye kimjin gi, Yeesu de guni daw, 42de gàa: Ji dànnu a hak Kristu gi hàm wun ɗi ya? De goosin de gàawan: Hàm Dawda ɗi. 43De gàa daw: Ɗo kà rri Dawda ye yèe ni Jungci Delliya, 'naasu «Nitcoorra» gi ya? ye gàa: 44Tooy Ɓèl gàa di Nitcoorra mum: Tâa a riina mum, ha mi ii nit yiir ta wey a gin nafta nak wey. 45To Dawda 'naasu go «Nitcoorra», kà tâani Kristu hàm wàa gi ya? 46Cen nirri a tîim waw kpàagu goosum yèy di Yeesu ba. Diga unji maan aw tolu gunda jàk gunda.

will be added

X\