Matta 18

1Mgbàr maan a lor ta Yeesu de hèewrran aw gunuwa: Wun ge hòm 'mita a wûun Fay a faktiturum gi ya? 2Yeesu de 'naase hàm kaa, de gòynu a tîim waw, 3de gàa: Takundi mi gàanurre, to un ir go un tâa kà hàm ây ba, gun lek a wûun Fay a faktiturum ba sam. 4Koo wun luusi hak wàa kà hàm yey ya, ey ge hòm 'mita a wûun Fay a faktiturum. 5Nit yey ngorge hàm kpolo kà yey gi ngam nîir mum, ngorimge dim. 6Amma nit yey iigu timgbòlnji di nirri kpolo a tîim nit luusa ây goosim dim gi, hòmu della aw cîiwrra ɗekli ɓèl a gûn wàa, aw 'màktufa a càng sòo ɓèl. 7'Màari waawrre di kparri ngam iirra timgbòlnji da nit goosum ây gi! Gesi timgbòlnji ây aw dàara, amma 'màari waawrre di nit yey iige timgbòlnji gi! 8To kàn wey koo nak wey leknum go a jàk maarra, njaafa mu 'màktifa. Lekta a gin gûyrra tâam timgbàri ni kàn kpolo koo ni nay kpolo, hò ge hòmum della ni yaarra a eb ɓèl tâam timgbàri ni kàn ta wey cuk, koo ni nak ta wey cuk gi. 9To nis wey kpolo leknum go a jàk maarra, hòlfa mu 'màktifa. Lekta a gin gûyrra tâam timgbàri ni nisi kpolo, hò ge hòmum dellani yaarra a eb ɓèl ni nis ta wey cuk gi. 10Yeesu de gàa daw bak: Faasin hak wun, ta un yiisi di nirri kpolo a tîim nit luusa ây gi ba! Ngam mi gàanurre, a malayka ta waw aw dii aw gòyrre koo ni-ngàa a ɗàm kpees Too mum a faktiturum.( 11Ngam Hàm nirri dàarage e saani jày gbeege gi.) 12Kà dànnu a hak nirri tâage ni mgbâay ây temèrre ya? To kpolo gbeerra go a tîim waw, ge woofa mgbâay ây ra ngaskàm sàm ngaskàm kpolo a gopri, e dik e kàmra woy gbeege gi ba yi? 13Takundi mi gàanurre, to kpàasa go gi, kâ ge kâwu a tinîir wàa yèk mgbâay maan, hò ge hòmu kâwrra ni mgbâay ây ra ngaskàm sàm ngaskàm kpolo tâa aw gbee ba gi. 14Hû go ɗa Too wun a faktiturum, ti yiɗi ha nirri kpolo a tîim nit luusa ây gi e gbee ba. 15To kor wey mbir go jàk maarra, dikmu yèewa un cuk. To ragum go, mu kpàasuge. 16Amma to ragum go ba, kàm nirri kpolo koo cuk ngam un yèenji, ha yèy pî e gòy a jày gàan nit seedum ây cuk koo taan. 17To hàw daw go rakta, sak daw yèk maan da nit kimjum ây. To hàw daw go rakta da nit kimjum ây ɗa, sey mu raptu kà nit èca yèk Fay koo kà nit ngota jomorrgol. 18Takundi mi gàanurre: Jày pî cîinu a deesi gi, tâa ge tâa cîirriya a faktiturum. Jày pî njelnu a deesi gi, tâa ge tâa njelliya a faktiturum. 19Mi gàanurre ɗa: To a nit ây cuk a tîim wun a deesi aw raknji go aw waa koo jàk jâ, Too mum tâage a faktiturum hîi ge hîi daw. 20Ngam a gin 'mèmsin a nit ây cuk koo taan a nîir mum gi, mi dii a tîim waw. 21Piyèr de hèewrra di Yeesu, de gunu: Nitcoorra, nak mèn gesi mi yaafu di kor mum mbirim go jàk maarra gi ya? Ha nak jòròs yi? 22Yeesu de goosu: Mi gàamde, naa nak jòròs amma nak ra jòròs nde jòròs. 23Ngam maan wûun Fay a faktiturum rèenji ni wûun kàmge gopnjum sakri bèeb wàa ni nit tèem ta wàa. 24Ye ɗaa gopnjum sakri maan, de 'maawran nit kana atke nà kiri kurra ujinè ra. 25Amma ye tâa nit maan seede cenu ngam e jinggu ba, wûun de gàa aw sàanu sàay ni kin wàa, ni hàm ta wàa ɗa, ni jày tâagu gi pî, ngam kpàasum kiri maan. 26Nit tèem nà de gbâygi a ɗàm kpees wàa, de gàa: Ndògòn, gobim 'maton, èf tinîiri, ji gim jinggum pî. 27Wûun de gobu 'maton di nit tèem nà gi, de woowfa kiri maan pî, de woow e tayi. 28Amma nit tèem nà ye yuu gi, de kpàanjin ni nirri kpolo a tîim kor nit tèenjum ta wàa atku nà kiri kurra ra. De mòow de hèwu a gûn, de gàaw: Jinggim kiri mum! 29Kor nit tèenjum wàa nà de gbâyge a ɗàm kpees wàa, de waaw de gàa: Ndògòn, gobim 'maton, èf tinîiri, ji gim jinggum. 30Amma ey de hàwe, de dige e leknu a kultuma ha e jinggu kiri wàa. 31A kor nit tèenjum ta wàa di nit tèem nà ye rabin jày mbirge gi, de ày daw tinîiri dèy, de digin aw sagu di wûun yèk maan pî. 32Wûun de 'naasu di nit tèem wàa nà, de gàaw: Mu nit makta ɗi, mi woomfage kiri pî, ngam mu waame. 33Naa gesi ngin muy ɗa mu gobu 'maton di kor nit tèenjum wey, kà yey gobum dum 'maton gi naa? 34De ngòlu dèy di wûun, de hîiw di nit tèem nà a kàn sooje ây ha aw riisu 'màari e jing kiri furru gi pî. 35Hû go ge mbitnu Too wun tâage a faktiturum ɗa, to koo wuna a tîim wun yaafu go di kor wàa ni tinîiri pî ba gi.

will be added

X\