Matta 17

1A dat unji yira Yeesu de arre Piyèr, ni Yakuba, ni kaa wàa Yuhanna aw diknji, de naan a fak gopri yâktiya aw kpolo waw. 2Is wàa di Yeesu de bunje a ɗàm kpees waw, tiigi wàa kayngirre kà unji, lurra ta wàa aw ire burriya tal. 3E rri yey Muusa ni Eliya aw lòtɗa dawge, de yèenjin ni Yeesu. 4Piyèr de gàaw di Yeesu: Nitcoorra, a gin mbâra tâana ay gi. Mu yiɗi go, mba gim mbangsi ndûkci ây taan, kpolo ngam wey, kpolo ngam Muusa, kpolo ngaa ngam Eliya. 5Ye tâa yèerre kà yey gi, titurum kayngumya dàa butɗa dawge. E rri yey gûn ana a titurum nà gàarre: Yey hàm mbâr mum ɗi, mi yiɗurre, kâwsimde tinîiri. Raguwan! 6A lor ta wàa ye ragin yèk yey, de ûunin tiigi waw a deesi, ngam aw tole dèy. 7Yeesu de dàara de banggirra daw, de gàa: Anin, ta un tol ba! 8Ye aanjin nis waw gi, aw rap koo nit kana ba, sey Yeesu kpolo wàa. 9A ye cisan a gopri maan, Yeesu de mgbènggi daw de gàa: Ta un sak koo di wuna jày rapnu gi ba, sey to Hàm nirri gûysi go a wurra. 10A lor ta wàa de gunuwan: Ngam ji gàan a nit còycum ây, sey Eliya e dàara ɗà ya? 11De goosi de gàa daw: Takundi, Eliya sey e dàara e mbangsi jày pî. 12Amma mi gàanurre: Eliya dàarage mgban, a nit ây aw cèngsu ba, amma aw mbiru kày yiɗin gi pî. Hù go ɗa Hàm nirri ge rii 'màari a gin waw. 13A lor ta wàa de cèngnin, yèe dawge yèk Yuhanna nit iirra baptisma. 14Ye kpèrran a gin tâan mûsa nit ây, nirri de dàara de gbâygi a ɗàm kpees Yeesu, 15de gàaw: Nitcoorra, gobu 'maton di hàm mum hàm nihun gi, ngam dii ni àyci tibûu, riisurre 'màari dèy. Nak mûsi jày yaanurre a ebi, koo a sòo. 16Mi 'maawrage a gin lor ta wey, amma aw kpàaw ndòosum ba. 17Yeesu de gàa: Kay, un yòot èca goosum, jalge orri gi! Ha ningàa gim tâanji ni un ya? Ha ningàa gim èf tinîir mum ngam wun ya? 'Maamran hàm maan ay gi! 18Yeesu de kpânu di tibûu, ha de woow di hàm maan. De ndòow yaale. 19A dat maan a lor ta Yeesu de hèewrran aw kpolo waw, de gunuwan: Ngam jâ ɗi tâa orro ot kpàaw yuunum àyci tibûu gi ba ya? 20Yeesu de goosi de gàa daw: Ngam èca goosum wun de tâa un kpàaw ba. Takundi mi gàanurre, to un dii go ni goosum koo luurriya kà yòot mutar gi, gàa gun gàaw di gopri yey «an ay gi mu hèesi u ɓày go», hèe ge hèesi. Cen jày tâa gun kpàaw tèerra ba ba.( 21Amma sey ni waarra Fay, ni coorra riirra tiriici gaw kpàaw yuunum yòot tindòom kà yey.) 22A lor ta Yeesu ye kimjin pî a dees Galile, de gàa daw: Hîi gaw hîiw di Hàm nirri a kàn nit ây, 23ɓà gaw ɓàruwa, amma unji taanti gû ge gûysi. De ngòl daw da lor ta wàa dèy. 24Yeesu ni lor ta wàa ye kpèrrin a Kafernahum, a nit ngota jomorrgol ây ngam àay Fay gi de dàaran a gin Piyèr de gunuwan: Nitkàlnjum wun jingde jomorrgol ngam àay Fay yi? 25De goose: Eeye, jingde. Ye legin a àay, Yeesu de ɗàaw gunda di Piyèr, de gàa: A wûun ây a kparri gaw ngor jomorrgol a gin hàm dees ây koo a gin nit ây kana yi? Kà dànum muy ya, Simon? 26De goosi de gàaw: Ngo gaw ngor a gin nit ây kana. Yeesu de gàaw: Hû go a hàm dees ây gaw jomni ba. 27Amma ngam ta ot aanji daw ngòlnji ba, dik a sòo ɓèl mu 'màkti timòoni cîit wey. Cîit yey gum mòow màrra gi, hàangi mgbelyèk wàa, kpàa gum kpàa seede sarrdi. Mu at mu hîi daw da nit ngota jomorrgol ây ngam mum ni muy.

will be added

X\