Matta 15

1A ni-Farisa ây ni nit còycum ây anga a Yerusalem gi de dàaran a gin Yeesu, de gunuwan: 2Ngam jâ a lor ta wey yewin yèk hàar wosom ây gi ya? Ngam aw kòlle kàn waw ɗoko aw rii gi ba. 3Amma Yeesu de gàa daw: Ngam ji rri a futa yèk hàar wun un yewrre yèk mgbèngda Fay gi ya? 4Fay gàa nà: Coo too wey ni nuu wey. Nit yey njàmge di too wàa koo di nuu wàa, kpàa ge kpàa kiita wurra. 5Amma un un kàlnjirre: To nirri gàaw go di too wàa koo di nuu wàa: «Jàk yey gesi ngin ha mi hîim gi, hîi gim hîi di Fay», 6gayam ge tâaw a dat maan ha e coo di too wàa koo di nuu wàa ba. Kà yey un mboysirre yèk Fay ni hàar wun. 7Un nit tibiw ây, yèk Isaya nit lònum yèk Fay kpèrre mbâra a hak wun ye gàa nà: 8A nit ây gi aw coomde ni mgbelyèy, amma tinîir waw kpâanji ni miy. 9Aw daprimde ɓa hû go, ngam aw kàlnjirre jày gàarra nirri. 10Yeesu de 'naasi mûsa nit ây aw hèera a gin wàa, de gàa daw: Raksin ha un cèngni jàk yey: 11Ti tâa jày yey leke a mgbelyèk nirri ge 'miskunu di nirri ba. Amma jày yuuga a mgbelyèk nirri gi, e ge 'miskunuwa. 12A dat maan a lor ta wàa de hèewrran di Yeesu, de gàawan: Mu cèngni a ni-Farisa ây ye ragin yèk yey ngòl dawge ba yi? 13De goosi de gàa daw: Jàk gakta ây pî tâa Too mum a faktiturum gake ba gi, u gaw uffa. 14Woon daw, aw a râay ây ɗi, a nit nàta râay ây. To nit râay nàtɗe go râay gi, aw ɗa cuk yaa gaw yaa a gooy. 15Piyèr de gàaw di Yeesu: Lònina rèenjum yèk yey yèemu nà gi. 16De goosi de gàa daw da lor ta wàa: Ha yey un ɗa un kpàawrre cèngnum jày ba yi? 17Un cèngni, jày pî leke a mgbelyèk nirri gi, ge cir a himni e yuu a ɓutki ba yi? 18Amma jày yuuga a mgbelyèk nirri gi, a tinîir wàa ana, ey ge 'miskunuwa. 19Ngam a tinîir nirri ana dànda maktiya, ge 'maaw a ɓàta nirri, ni iirra njeenu, ni mboysum sapri, ni oorra oori, ni njeerra yèk rèeng, ni maasum yèy. 20A jàk ây gi gaw 'miskunu di nirri. Amma riirra tiriici cen kòlla kàn gi, ge 'miskunu ba. 21Yeesu de ane a farra de dige ha a cewci riiy Tiiru ni Sidon. 22E rri yey kin ni-Kanana ana a dees maan, de dàara a gin Yeesu, de bime de gàa: Nitcoorra hàm Dawda, gobim 'maton! Hàm mum hàm nikin dii ni tindòom makta, riisurre 'màari dèy. 23Amma Yeesu ti goosu koo jâ ba. A lor ta wàa de dàaran, de waawan de gàan: Wasu di kini gi, ngam futnarra ni tibimni. 24Yeesu de gàa daw: Mi tâa tèerriya a gin kana ba, sey a gin ni-Israyel ây tâage kà mgbâay gbeerra ây gi. 25Amma kini nà de dàara de gbâygi a ɗàm kpees wàa, de gàaw: Ndògòn, Nitcoorra, mgbaanjimi! 26Yeesu de gàa: Ti del ata tiriit hàm ây aw còoni da dun ây ba. 27Kini nà de gàa: Hû go rri, Nitcoorra. Amma a dun ây hû riin woy yaatum nit ɓèl ta waw a deesi. 28Yeesu de goosi de gàaw: Mu kini gi, goosum wey 'mirre! E mbirum kà yey yiɗum gi. Ayci ndòowe di sapri wàa yaale. 29Yeesu ye ansa a riiy maan, de ira a cewci sòo ɓèl a Galile, de naa a gopri e tâa a farra. 30Mûsa nit ây dèy de dàaran a gin wàa, de 'maaran nit èskum ây, ni nit wuta is ây, ni râay ây, ni muukaw ây, ni nit àyci ây kana dèy, de iin daw a ɗàm kpees wàa. De ndòosi daw. 31De tâa daw 'nang da mûsa nit ây, ye rabin muukaw ây aw yèerre, nit wuta is ây aw tâarre mbâra, nit èskum ây aw dikɗe, râay ây aw rapɗe gi. De 'misin nîir Fak ni-Israyel ây. 32Yeesu de 'naasi da lor ta wàa aw hèewra, de gàa daw: Tinîir mum àyimde, ngam mûsa nit ây gi aw tâanji ni miy ay unji taan, aw cen ni jàk riirra ba. Mi yiɗi mi was daw kà yey ba, ngam yaa gaw yaa fey a orri. 33A lor ta wàa de gunuwan: U hâ got kpàara tiriici ay a tîim nûri gi, ha e gerri daw da mûsa nit ây dèy kà yey aw ol ya? 34Yeesu de gun daw: Tàarri mèn tâanu ya? De goosin: Tàarri jòròs, ni cîici càa. 35De gàa da mûsa nit ây aw tâa a deesi. 36De arre tàarri jòròs ni cîici nà, de gàa mbew di Fay. De mîinje de hîi daw da lor ta wàa, a lor ta wàa ngaa de hîin daw da mûsa nit ây. 37Aw pî aw riiye, aw ole. De kimjin ngirra tiriici pakrak jòròs. 38A nit ây riige gi aw dii nihun ây ujinè naan, cen sakta nikin ây ni hàm ây. 39Yeesu de was daw da mûsa nit ây gi aw koyi. De lege a koombowal e dik a dees Magadan.

will be added

X\