Matta 14

1Mgbàr maan Herode wûun ni-Yude ây rage yèk Yeesu. 2De gàa daw da nit tèem ta wàa: Nit yey tâage Yuhanna nit iirra baptisma, gûysige a wurra. Ngam maan dii ni mbinum tèerra tèem kayeefi ây gi. 3Ngam Herode mòowe nà di Yuhanna, 'mèmuge leknu a kultuma. Mbiru kà yey yèk Herodiya kin Filip kaa wàa. 4Ngam Yuhanna gàawe nà di Herode: Ti gesi ha mu at kin kaa wey ba. 5Herode yiɗi ngin e ɓàruwa, amma tolle da nit ây, ngam aw pî aw raptuge kà nit lònum yèk Fay. 6Amma unji ɓaysum kpàarra Herode ye kpèrre gi, sapri wàa di Herodiya de sii siiri a ɗàm kpees nit 'naasum ây. De delu dèy di Herode, 7ha de hàaw ni tihàani, hîi ge hîiw koo jâ ge gunu gi. 8Sapri nà ye tâa rage yèk nuu wàa, de gàaw: 'Maamra ay gi hak Yuhanna nit iirra baptisma a gàngna. 9Yèk maan de àyu tinîiri di Herode wûun. Amma ngam tihàani yey hàa a ɗàm kpees nit tâanjum ta wàa gi, de gàa aw hîiwa. 10De tèe a kultuma aw njaara hak Yuhanna nit iirra baptisma gi. 11De 'maaran hay gi a gàngna, de hîiwan di sapri nà. Ey ngaa de 'maa di nuu wàa. 12A lor ta wàa di Yuhanna de dàaran aw at is wàa, de siptin. De digin aw sagu yèk maan di Yeesu. 13Yeesu ye rage kà yey, de ane a farra e dik ni koombowal ha e kpèt a nûri, a gin ge tâa kpolo wàa. Mûsa nit ây ye ragin gi, de furrufan ni nay. 14Yeesu ye yuura a koombowal gi, de rabe mûsa nit ây, tinîiri de àyu ngam waw. De ndòosi daw da nit ây tâage ni àyci a tîim waw. 15Ye cii mbona, a lor ta wàa de dàaran a gin wàa de gàawan: Ay gi tîim nûri ɗi, unji ɗa ciiye. Was daw da nit ây gi aw dik a riiy kaa ây, aw sàa jàk tiriici aw rii. 16Amma Yeesu de gàa daw: Gayam cen ha aw tay aw sàa jày ba. Un gun hîi daw aw rii! 17De gàawan: Tiriici cenna ba, sey tàarri kèrèw ni cîici cuk gbè tâagina. 18Yeesu de gàa daw: 'Maamran ay gi. 19De gàa daw da mûsa nit ây, aw tâa a bàsi. De arre tàarri kèrèw ni cîici cuk nà, de toole nisi u faktiturum, de gàa mbew ngam tiriici gi. De cèenje tàarri de hîi daw da lor ta wàa, a lor ta wàa ngaa de mîinjin daw da mûsa nit ây. 20Aw pî aw riiye aw ole. De atin ngirra tiriici, de mûunin tuuni ra sàm cuk. 21A nit ây riige gi aw tâa nihun ây jày gaw kpèt ujinè kèrèw, cen sakta nikin ây ni hàm ây. 22A dat maan Yeesu de gàa da lor ta wàa aw lek a koombowal, ngam aw ɗàaw yewrra a taga yey go, ha e wasra da mûsa nit ây. 23Ye was daw gi, de naa a fak gopri ey kpolo wàa ngam e waa Fay. Ye cii mbona gi, ey dii tâarre kpolo wàa a farra. 24Ye tâa koombowal kpâanji mgban ni deesi, aw riirre 'màari yèk gîirra sòo a koombowal, ngam hiski waarre a ɗàm kpees waw. 25Amma tuma ndamji Yeesu dàararre a gin waw, nafrarre a fak sòo. 26A lor ta wàa ye rabuwan nafrarre a fak sòo gi, de kpul daw jungci isi, de gàan: Yey ni-gebi ɗi! De taasin tolnji. 27Yeesu de yèera daw yaale, de gàa: Miy ɗi, ta un tol ba, mòosin tinîir wun! 28Piyèr de gàaw: Nitcoorra, to muy ɗi go, gàam mi difa a gin wey, mi naffa a fak sòo gi. 29Yeesu de gàawfa: Dàara! De yuu a koombowal, de nafe a fak sòo e dik a gin Yeesu. 30Amma Piyèr ye rabe hiski, de tole. De ɗaa cita a mîis sòo, de bime de gàa: Nitcoorra, saanimi! 31Yeesu de parre kàn wàa yaale, de mòow de gàaw: Mu nit èca goosum, ngam jâ hàanjum a tinîir wey ya? 32Piyèr ni Yeesu ye legin a koombowal gi, hiski de gòye. 33A nit ây tâage a koombowal gi, de gbâygin a ɗàm kpees Yeesu aw coow, de gàan: Takundi, muy mu Hàm Fay ɗi! 34De kpèrrin a taga dees Genesaret. 35A nit ây tâage a farra ye cèngsuwan di Yeesu gi, de tèen a dees maan lang aw 'maara nit àyci ây pî a gin wàa. 36De waawan ha nit àyci ây aw bangda koo a pètki lurra wàa. A nit ây pî banggurra gi, àyci waw ndòo dawge.

will be added

X\